ເມື່ອບໍ່ດົນມານີ້, ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ ລົງເຄື່ອນໄຫວ ນຳພາ-ຊີ້ນຳ ບັນດາຂະແໜງການທີ່ກ່ຽວຂ້ອງ, ສອງກອງບັນຊາການ ປກສ-ປກຊ, ຊາວໜຸ່ມຕະລຸມບອນ ພະແນກການອ້ອມຂ້າງ ແລະ ບັນດາບ້ານໃກ້ຄຽງ ມອດໄຟໄໝ້ລາມປ່າ ເພື່ອສະກັດກັ້ນໄຟບໍ່ໃຫ້ໄໝ້ລາມສູ່ວົງກວ້າງ, ພ້ອມກັນສຸມໃສ່ມອດໄຟບາງຈຸດທີ່ເຫັນວ່າສາມາດເຂົ້າເຖິງໄດ້, ເຮັດແລວກັນໄຟ ເພື່ອບໍ່ໃຫ້ລາມໄປສູ່ບ່ອນໃໝ່ ແລະ ກວ້າງອອກກວ່າເກົ່າ.
ມາຮອດປັດຈຸບັນ ການມອດໄຟໄໝ້ລາມປ່າ ແມ່ນເຮັດໄດ້ດີ ແລະ ມີປະສິດທິພາບ (ສາມາດດັບໄຟໄດ້ເປັນສ່ວນໃຫຍ່) ແລະ ສາມາດສະກັດກັ້ນບໍ່ໃຫ້ໄຟໄໝ້ລາມໄປສູ່ປ່າເຂດອື່ນໆຕື່ມອີກ. ທັງນີ້ ກໍຍ້ອນຄວາມເອົາໃຈໃສ່ຂອງການນຳແຂວງ-ເມືອງ, ພະແນກການທີ່ກ່ຽວຂ້ອງ ແລະ ກຳລັງແຮງທຸກພາກສ່ວນ ທີ່ໄດ້ສຸມໃສ່ມອດໄຟໃນເຂດທີ່ຕົນຮັບຜິດຊອບໄດ້ທັນເຫດການ.
ນັບແຕ່ຕົ້ນປີ 2024 ຫາ ວັນທີ 9 ເມສາ ພະແນກກະສິກຳ ແລະ ປ່າໄມ້ແຂວງ ສົມທົບກັບຫ້ອງການກະສິກຳ ແລະ ປ່າໄມ້ເມືອງ ໄດ້ສຸມທຸກວິທີທາງ ເພື່ອສະກັດກັ້ນບໍ່ໃຫ້ເກີດມີໄຟໄໝ້ລາມປ່າ ໂດຍສະເພາະ ເຂດປ່າສະຫງວນ, ປ່າປ້ອງກັນ, ປ່າຜະລິດ ແລະ ປ່າປະເພດອື່ນໆ ດ້ວຍຫລາຍວິທີ ເຊັ່ນ: ໄດ້ລົງເຄື່ອນໄຫວໂຄສະນາເຜີຍແຜ່ ບັນດາກົດໝາຍ, ນິຕິກຳ ແລະ ເຮັດບົດບັນທຶກກັບຄອບຄົວ ທີ່ໄດ້ຖາງປ່າ ທຳການຜະລິດ ເພື່ອຫລີກລຽງ ບໍ່ໃຫ້ເກີດໄຟໄໝ້ລາມປ່າ.
ແຕ່ເຖິງຢ່າງໃດກໍ່ຕາມ ບໍ່ສາມາດປາສະຈາກໄດ້ ເຫດໄຟໄໝ້ລາມປ່າ ຢູ່ພາຍໃນຂອບເຂດຄວາມຮັບຜິດຊອບຂອງແຕ່ລະເມືອງ, ເຊິ່ງບາງເມືອງກໍ່ໃຫ້ເກີດມີຜູ້ເສຍຊີວິດ ຄື: ບ້ານມົກໂຄກາງ, ເມືອງປາກແບງ ແລະ ບ້ານພູວຽງໄຊ, ເມືອງຮຸນ. ນອກນີ້, ໄຟຍັງໄດ້ໄໝລາມເຂົ້າເຂດນອກ-ເຂດໃນ ຂອງປ່າສະຫງວນ ພາຍໃນ 7 ເມືອງ ທົ່ວແຂວງ ຈຳນວນ 60,27 ເຮັກຕາ, ປ່າປ້ອງກັນ 163,98 ເຮັກຕາ, ປ່າທຳການຜະລິດ ຈໍານວນ 5,30 ເຮັກຕາ ລວມທັງໝົດ 229,55 ເຮັກຕາ.
ຂ່າວ: ແສງອາທິດ