ໃນວັນທີ 30 ເມສາ 2024 ສຳນັກຂ່າວຮອຍເຕີລາຍງານວ່າ: ພູເຂົາໄຟຮວງ ຢູ່ແຂວງສຸລາເວສີເໜືອ ປະເທດອິນໂດເນເຊຍ ເກີດລະເບີດຂຶ້ນອີກຄັ້ງຢ່າງຮຸນແຮງ ຫຼັງຈາກກ່ອນໜ້ານີ້ລະເບີດໄປເມື່ອຕົ້ນເດືອນຜ່ານມາ ສົ່ງຜົນໃຫ້ທາງການອິນໂດເນເຊຍປະກາດເຕືອນໄພຂັ້ນສູງສຸດ.
ການລະເບີດດັງກ່າວເກີດຂຶ້ນຕັ້ງແຕ່ຊ່ວງເຊົ້າ ໂດຍພູເຂົາໄຟປະທຸລາວາ ແລະ ຂີ້ເຖົາຂຶ້ນເທິງຟ້າສູງເຖິງ 2 ກິໂລແມັດ ເຮັດໃຫ້ທາງການຕ້ອງສັ່ງປິດສະໜາມບິນບໍລິເວນໃກ້ຄຽງ, ຈາກການລະເບີດຫຼ້າສຸດທາງສູນປ້ອງກັນໄພພູເຂົາໄຟ ປະກາດເຕືອນປະຊາຊົນບໍ່ໃຫ້ເຂົ້າໄປໃກ້ພູເຂົາໄຟດັ່ງກ່າວໃນໄລຍະ 6 ກິໂລແມັດ ພ້ອມເຕືອນອີກວ່າອາດຈະເກີດລະເບີດຮຸນແຮງອີກ.
ເຈົ້າໜ້າທີ່ສູນປ້ອງກັນໄພພູເຂົາໄຟຄາດວ່າການລະເບີດຄັ້ງຫຼ້າສຸດນັ້ນສອດຄ່ອງກັບແຮງສັ່ນສະເທືອນທີ່ວັດແທກໄດ້ກ່ອນໜ້ານີ້ໃນບໍລິເວນໃກ້ຄຽງ ແລະ ເກີດຂຶ້ນຫຼັງພູເຂົາໄຟລະເບີດໄປຫຼາຍຄັ້ງເມື່ອຕົ້ນເດືອນທີ່ຜ່ານມາ ເຮັດໃຫ້ມີປະຊາຊົນຫຼາຍຮ້ອຍຄົນອົບພະຍົບ ແລະ ສ້າງຄວາມເສຍຫາຍໃຫ້ປະຊາຊົນທີ່ອາໃສຢູເກາະບໍລິເວນນັ້ນ.