ແຂວງອັດຕະປື ໄດ້ຈັດພິທີ ທໍາລາຍຊິ້ນສ່ວນພາຫະນະປະເພດລົດຈັກ ທີ່ບໍ່ຖືກຕາມເຕັກນິກ ຂື້ນທີ່ກອງບັນຊາການປ້ອງກັນຄວາມສະຫງົບເມືອງຊານໄຊ ແຂວງອັດຕະປື.
ເຊິ່ງສາມາດກັກລົດຈັກທີ່ດັດແປງສະພາບເຕັກນິກທັງໝົດ 64 ຄັນ, ປະເພດທໍ່ແຕ່ງຈໍານວນ 64 ທໍ່, ປະເພດຢາງນອ້ຍຈໍານວນ 30 ເສັ້ນ, ປະເພດຕາສີຈໍານວນ 5 ດອກ, ປ້າຍປອມ 2 ຄັນ. ຕໍ່ກັບຜູ້ລະເມີດກົດລະບຽບຈະລາຈອນ ແລະ ຜູ້ທີ່ໄດ້ມີການດັດແປງສະພາບເຕັກນິກພາຫະນະປະເພດລົດຈັກ ແມ່ນທາງເຈົ້າໜ້າທີ່ວິຊາສະເພາະໄດ້ມີການສຶກສາອົບຮົມກ່າວເຕື່ອນພ້ອມເຮັດບົດບັນທຶກ ແລະ ໃຫ້ພວກກ່ຽວປົດຊິ້ນສ່ວນຂອງພາຫະນະທີ່ໄດ້ມີການດັດແປງສະພາບເຕັກນິກ ດັ່ງກ່າວນັ້ນ ໃຫ້ຢູ່ໃນສະພາບເດີ່ມ ເຊິ່ງມີຈໍານວນຜູ້ທີ່ຖືກລະເມີດ ແລະ ສຶກສາອົບຮົມທັງໝົດ 64 ລາຍ, ຍິງ 2 ລາຍ.
ທ່ານ ພັທ ພູມີ ແກ້ວບົວລະພາ ຫົວໜ້າກອງບັນຊາການປ້ອງກັນຄວາມສະຫງົບເມືອງ ໄດ້ລາຍງານໃຫ້ຮູ້ວ່າ: ຜ່ານມາ ຄະນະພັກ-ຄະນະກອງບັນຊາການ ປກສ ເມືອງຊານໄຊ ໄດ້ເອົາໃຈໃສ່ນໍາພາ-ຊີ້ນໍາ ແລະ ຊຸກຍູ້ ລົງເຄື່ອນໄຫວໂຄສະນາເຜີຍແຜ່ກົດລະບຽບຈະລາຈອນໃນການນຳໃຊ້ລົດໃຊ້ຖະໜົນ ຢູ່ບັນດາໂຮງຮຽນແຫ່ງຕ່າງໆ ແລະ ບັນດາບ້ານໃນທົ່ວເມືອງຢ່າງຕໍ່ເນື່ອງ, ເພື່ອເຮັດໃຫ້ເຂົາເຈົ້າມີຄວາມຮັບຮູ້, ເຂົ້າໃຈຕໍ່ວຽກງານດັ່ງກ່າວ ທັງເຮັດໜ້າທີ່ສຶກສາອົບຮົມໃຫ້ພໍ່ແມ່ຜູ້ປົກຄອງເດັກ ໄດ້ກ່າວເຕືອນລູກຫຼານ ໃຫ້ມີສະຕິລະວັງຕົວໃນການນຳໃຊ້ລົດ ໃຊ້ຖະໜົນ, ເພື່ອຕ້ານ, ສະກັດກັ້ນ ແລະ ແກ້ໄຂບັນຫາປະກົດການຫຍໍ້ທໍ້ໃນສັງຄົມ ໂດຍສະເພາະກຸ່ມແກ້ງໄວລຸ້ນ ທີ່ໄດ້ມີການເຄື່ອນໄຫວ ດັດແປງສະພາບເຕັກນິກພາຫະນະລົດຈັກ ແລະ ບັນຫາອື່ນໆທີ່ຜິດຕໍ່ກົດລະບຽບຈາລະຈອນ.
ຂ່າວ: ອັດອີສານ ບຽດມະນີ