ພາຍຫຼັງນະຄອນຫຼວງວຽງຈັນໄດ້ອອກແຈ້ງການກ່ຽວການປ່ຽນປ້າຍທະບຽນລົດຈາກກຳແພງນະຄອນ ມາເປັນນະຄອນຫຼວງວຽງຈັນເລີ່ມຕັ້ງແຕ່ວັນທີ 1 ມີນາ 2024 ເປັນຕົ້ນໄປ, ເຮັດໃຫ້ປະຊາຊົນຜູ້ທີ່ມີທະບຽໝົດອາຍຸ ຫຼື ບໍ່ໝົດອາຍຸ ພາກັນມາປ່ຽນປ້າຍ ຫຼື ໃສ່ປ້າຍໃໝ່ຢ່າງຫຼວງຫຼາຍ ຈຶ່ງເກີດບັນຫາຕາມມາພາຍຫຼັງ ກໍຄືການຂຶ້ນທະບຽນໃໝ່, ແມ່ນມີທັງຜູ້ຮັບຜິດຊອບແລ່ນເອກະສານຂອງບໍລິສັດເປັນຜູ້ດໍາເນີນການເຮັດໃຫ້ມີຄວາມສະດວກ, ແຕ່ກົງກັນຂ້າມກັບຜູ້ມາຕໍ່ທະບຽນ ຫຼື ປ່ຽນປ້າຍດ້ວຍຕົນເອງຍັງມີຄວາມຫຍຸ້ງຍາກ ແລະ ສັບສົນຍ້ອນບໍ່ຮູ້ຈະໄປແລ່ນເອກະສານຢູ່ປ່ອງໃດ ແລະ ຄົນກໍຫຼາຍ ເຮັດໃຫ້ມີຄວາມຈໍາເປັນຕ້ອງໃຊ້ບໍລິການນາຍໜ້າທີ່ມາຊູຊີ ແລ່ນເອກະສານປ່ຽນປ້າຍໃຫ້ຕາມລາຄາທີ່ຕົກລົງກັນ.
ທ່ານ ບຸນປອນ ບຸນສົມຫວັງ, ຫົວໜ້າກອງຄຸ້ມຄອງພາຫະນະ ແລະ ການຂັບຂີ່ນະຄອນຫຼວງວຽງຈັນ ໃຫ້ສໍາພາດຕໍ່ສື່ມວນຊົນວ່າ: ຍອມຮັບວ່າປາກົດການຫຍໍ້ທໍ້ຄື: ບັນຫານາຍໜ້າໃນການແລ່ນເອກະສານເພື່ອຂໍຂຶ້ນທະບຽນ ຫຼື ປ່ຽນປ້າຍທີ່ກໍາລັງຈັດຕັ້ງປະຕິບັດຢູ່ໃນປັດຈຸບັນແມ່ນມີຈິງແທ້ ເພາະໃນແຕ່ລະວັນກຸ່ມຄົນພວກນີ້, ໄດ້ມາລໍຖ້າ ເມື່ອເຫັນຜູ້ມາປ່ຽນປ້າຍ ແມ່ນຫຸ້ມໃສ່ ບາງຄັ້ງມີຮອດ 4-5 ຄົນ. ຜູ້ທີ່ບໍ່ຮູ້ ຫຼື ບໍ່ຢາກເສຍເວລາຈິ່ງວ່າຈ້າງຄົນຈໍາພວກນີ້ແລ່ນເອກະສານໃຫ້ຈົນກວ່າຈະໄດ້ປ້າຍ.
ເພື່ອແກ້ໄຂບັນຫາທີ່ເກີດຂຶ້ນ, ຂໍໃຫ້ຜູ້ທີ່ມາໃຊ້ບໍລິການ ເມື່ອມາເຖິງກອງຄຸ້ມຄອງພາຫະນະ ແລະ ການຂັບຂີ່ນະຄອນຫລວງວຽງຈັນ ໃຫ້ມາຫາເຈົ້າໜ້າທີ່ກ່ຽວຂ້ອງເພື່ອແນະນໍາການປະກອບເອກະສານ ແລະ ຍື່ນເອກະສານຕາມແຕ່ລະປ່ອງຢ່າງຖືກຕ້ອງ. ຊຶ່ງເຈົ້າໜ້າທີ່ຂອງກອງແຕ່ລະຄົນແມ່ນມີເຄື່ອງແບບ ແລະ ມີປ້າຍພະນັກງານແຂວນຄໍຕະຫລອດເວລາ.
ເພື່ອເຮັດໃຫ້ການປ່ຽນປ້າຍ ແລະ ຂຶ້ນປ້າຍໃໝ່ຈາກກໍາແພງນະຄອນວຽງຈັນ ມາເປັນນະຄອນຫລວງວຽງຈັນ ມີຄວາມສະດວກສະບາຍ, ຫົວໜ້າກອງຄຸ້ມຄອງພາຫະນະ ແລະ ການຂັບຂີ່ນະຄອນຫລວງວຽງຈັນ ຮຽກຮ້ອງມາຍັງຜູ້ທີ່ມີໃບທະບຽນບໍ່ທັນໝົດອາຍຸນໍາໃຊ້ໃບທະບຽນເກົ່າໄປກ່ອນ ເພື່ອຫລຸດຜ່ອນຄວາມແອອັດ ເພາະການປ່ຽນປ້າຍດັ່ງກ່າວນີ້, ບໍ່ແມ່ນການບັງຄັບປະຕິບັດມື້ໜຶ່ງຍາມດຽວ.
ທີ່ມາ: Lao Youth