ປັດຈຸບັນນີ້, ວິທີການດູດເງິນອອກຈາກບັນຊີມີຫຼາກຫຼາຍແບບທີ່ພວກມິດສາຊີບຄິດຄົ້ນອອກມາ, ເຊິ່ງເຮັດໃຫ້ຜູ້ເສຍຫາຍຫຼາຍທ່ານຕົກເປັນເຫຍື່ອ.
ອີງຕາມບົດສຳພາດຜ່ານລາຍການຂ່າວ ຈາກສະຖານີໂທລະພາບໄທລັດຂອງປະເທດໄທ ກ່ຽວກັບຄຳໃຫ້ການຂອງອະດີດແກ໊ງຄໍເຊັນເຕີທີ່ຖືກເຈົ້າໜ້າທີ່ຈັບກຸມໄດ້ໃຫ້ຮູ້ວ່າ: ການດູດເງິນຈາກບັນຊີມີຫຼາຍຮູບແບບ, ໃນເມື່ອກ່ອນຈະເປັນການສົ່ງລິ້ງຜ່ານທາງຂໍ້ຄວາມ,ເພື່ອໃຫ້ຜູ້ເສຍຫາຍກົດເຂົ້າລິ້ງ ຫຼື ໂຫຼດແອັບໃດໜຶ່ງ, ຫຼັງຈາກນັ້ນຈະທຳການດູດເງິນ, ແຕ່ປັດຈຸບັນນີ້ມີຮູບແບບໃໝ່ອອກມາຄື: ກຸ່ມມິດສາຊີບຈະໂທຫາຜູ້ເສຍຫາຍ ແລ້ວອ້າງວ່າເປັນເຈົ້າໜ້າທີ່ທະນາຄານ ຫຼື ເຈົ້າໜ້າທີ່ພາກລັດ ເພື່ອທຳການສອບຖາມຂໍ້ມູນສ່ວນຕົວຈາກຜູ້ເສຍຫາຍເຊັ່ນ: ເລກບັດປະຈຳຕົວ, ລະຫັດຜ່ານຕ່າງໆ, ຫາກຜູ້ເສຍຫາຍໃຫ້ຂໍ້ມູນດັ່ງກ່າວ ແລະ ລົມສາຍດົນເກີນ 2 ນາທີ ຈະຖືກເຄື່ອງດູດເງິນທຳການເເຮັກຂໍ້ມູນ, ເນື່ອງຈາກມິດສາຊີບໄດ້ທຳການເອົາໂທລະສັບທີ່ກຳລັງລົມສາຍກັບຜູ້ເສຍຫາຍໄປສຽບກັບຕົວເຄື່ອງດູດເງິນ, ຫຼັງຈາກນັ້ນລະບົບຂອງເຄື່ອງຈະທຳການແຮັກຂໍ້ມູນ ແລະ ດູດເງິນອອກຈາກບັນຊີ, ຫາກໂທລະສັບເປັນລຸ້ນໄອໂຟນຖ້າເຫັນວ່າໂທລະສັບຂອງທ່ານ ຂຶ້ນຈໍສະແດງຜົນວ່າໃຊ້ງານບໍ່ໄດ້ 1 ນາທີ ຫຼື ຖ້າເປັນລະບົບແອນດອຍ ຈະເຫັນຈໍວ່າ ຂໍ້ມູນບໍ່ຖືກຕ້ອງໃຫ້ຖືສາຍລໍຖ້າ, ຖ້າຂຶ້ນເປັນສອງແບບນີ້ແປວ່າທ່ານກຳລັງຖືກແຮັກຂໍ້ມູນ ແລະ ກຳລັງຖືກດູດເງິນອອກຈາກບັນຊີ, ເມື່ອປິດເຄື່ອງແລ້ວເປີດຂຶ້ນມາໃໝ່ກໍຈະເຫັນວ່າເງິນໃນບັນຊີໄດ້ບັນຊີໄດ້ຫາຍໄປແລ້ວ.
ນອກນີ້, ອະດີດມິດສາຊີບຄົນດັ່ງກ່າວຍັງໄດ້ເຕືອນອີກວ່າ: ເມື່ອມີເບີແປກໂທມາ, ອ້າງວ່າເປັນເຈົ້າໜ້າທີ່ຕ່າງໆແລ້ວຊວນລົມສາຍເພື່ອສອບຖາມຂໍ້ມູນສ່ວນຕົວແມ່ນໃຫ້ຮີບຕັດສາຍປະຕິເສດທັນທີ, ເນື່ອງຈາກເຄື່ອງດັ່ງກ່າວຈະບໍ່ຕັດສາຍເອງ ຕ້ອງແມ່ນເຈົ້າຂອງໂທລະສັບເປັນຜູ້ຕັດສາຍເອງເທົ່ານັ້ນ.
ຫຼ້າສຸດນີ້,ໃນສັງຄົມລາວຂອງເຮົາຫາກໍ່ມີເຫດການຄ້າຍໆດັງກ່າວເກີດຂຶ້ນ, ເຊິ່ງຈະເປັນໃນຮູບແບບຂອງການສົ່ງລິ້ງເຂົ້າຫາຜ່ານຂໍ້ຄວາມທາງ Messenger ເມື່ອຜູ້ເສຍຫາຍກົດເຂົ້າລິ້ງໄປ ກໍພົບວ່າເງິນໃນບັນຊີຖືກດູດໄປແລ້ວ.
ດັ່ງນັ້ນ, ເພື່ອບໍ່ໃຫ້ຕົກເປັນເຫຍື່ອຂອງກຸ່ມມິດສາຊີບດັ່ງກ່າວ, ຢາກຝາກໃຫ້ທຸກຄົນຈົ່ງມີສະຕິລະມັດລະວັງຕົວຄື: ຫ້າມກົດເຂົ້າລິ້ງຕ່າງໆທີ່ຮູ້ສຶກຜິດປົກກະຕິ, ຫ້າມຮັບໂທລະສັບເບີແປກໆ ແລ້ວໃຫ້ຂໍ້ມູນສ່ວນຕົວກັບປາຍສາຍເດັດຂາດ, ເພື່ອສະກັດກັ້ນປາກົດການຫຍໍ້ທໍ້ໃນຄັ້ງນີ້ໄປນຳກັນ.