ເມື່ອບໍ່ດົນມານີ້ໄດ້ມີກຸ່ມມິດສາຊີບສົ່ງລິ້ງຜ່ານຂໍ້ຄວາມ WhatsApp, Messenger ຫຼື LINE ໄປຫາຫຼາຍທ່ານ, ພາໃຫ້ບາງທ່ານຕົກເປັນຜູ້ເສຍຫາຍ,ເນື່ອງຈາກຫຼົງກົດລິ້ງດັ່ງກ່າວ, ພາຍຫຼັງທີ່ກົດລິ້ງເຂົ້າໄປແລ້ວ ປາກົດວ່າຖືກດູດເງິນອອກຈາກບັນຊີແບບບໍ່ທັນໄດ້ຕັ້ງຕົວ.
ຫຼ້າສຸດເມື່ອວັນທີ 20 ກຸມພາທີ່ຜ່ານມາທະນາຄານການຄ້າຕ່າງປະເທດລາວ ມະຫາຊົນໄດ້ອອກແຈ້ງເຕືອນເຖິງບັນດາພໍ່ແມ່ປະຊາຊົນກ່ຽວກັບການຫ້າມກົດ ຫຼື ເຂົ້າໄປຕື່ມຂໍ້ມູນໃນລິ້ງທີ່ຖືກສົ່ງຜ່ານຂໍ້ຄວາມ WhatsApp, Messenger ຫຼື LINE ຢ່າງເດັດຂາດເພາະອາດຕົກເປັນເຫຍື່ອຂອງກຸ່ມມິດສາຊີບ, ໂດຍມີເນື້ອໃນໂພສວ່າ: ທະນາຄານການຄ້າຕ່າງປະເທດລາວ ມະຫາຊົນ ຂໍແຈ້ງໃຫ້ຊາບວ່າ ປັດຈຸບັນໄດ້ມີບຸກຄົນບໍ່ຫວັງດີແອບອ້າງສ້າງລິ້ງປອມລໍ້ລ່ວງແຈກເງິນລາງວັນ ແລະ ສ້າງລິ້ງປອມແອບອ້າງເປັນແອັບ BCEL One ເພື່ອໃຫ້ຄົນເຂົ້າໄປ ຕື່ມຂໍ້ມູນ. ພວກເຮົາຂໍຢືນຢັນວ່າ ທາງທະນາຄານການຄ້າຕ່າງປະເທດລາວ ມະຫາຊົນ ບໍ່ໄດ້ຈັດ ຫຼື ມີສ່ວນກ່ຽວຂ້ອງໃດໆກັບກິດຈະກຳດັ່ງກ່າວນີ້ ແລະ ຂໍໃຫ້ພວກທ່ານຢ່າຫຼົງເຊື່ອເດັດຂາດ.
⚠️ ຮູບແບບການລໍ້ລວງແມ່ນທ່ານອາດຈະໄດ້ຮັບລິ້ງຜ່ານ WhatsApp, Messenger ຫຼື LINE, ເຊິ່ງທ່ານຕ້ອງແຊຣ໌ລົງກຸ່ມ ຫຼື ໃຫ້ໝູ່ ພ້ອມຕອບຄຳຖາມເພື່ອຮັບລາງວັນເງິນສົດ. ຖ້າໃນກໍລະນີ ທ່ານ ພົບເຫັນ ຫຼື ໄດ້ຮັບຂໍ້ຄວາມຮູບແບບນີ້, ກະລຸນາບໍ່ກົດເຂົ້າ, ແຊຣ໌ ຫລື ສົ່ງຕໍ່ ເພາະລິ້ງເວັບໄຊ້ ດັ່ງກ່າວເປັນລິ້ງ “SCAM” ເຊິ່ງອາດລໍ້ລວງເອົາຂໍ້ມູນສ່ວນໂຕຂອງທ່ານເພື່ອນຳໄປໃຊ້ໃນທາງເສຍຫາຍໄດ້.
? ເມື່ອທ່ານພົບເຫັນການໂຄສະນາທີ່ໜ້າສົງໄສ ທ່ານສາມາດສອບຖາມຂໍ້ມູນຕ່າງໆໄດ້ຜ່ານຊ່ອງທາງທີ່ເປັນທາງການຂອງ ທຄຕລ ດັ່ງລາຍລະອຽດລຸ່ມນີ້:
1. ຕິດຕໍ່ສອບຖາມ ແລະ ແກ້ໄຂບັນຫາ ຜະລິດຕະພັນ ແລະ ການບໍລິການຂອງ ທຄຕລ ແມ່ນໂທສາຍດ່ວນ 1555 ຫຼື ໂທອອນລາຍ, ສົ່ງຂໍ້ຄວາມຫາທີມງານ OneCare Support ຜ່ານແອັບ BCEL One ໄດ້ຕະຫລອດ 24/7.
2. ການຕິດຕາມຂໍ້ມູນຂ່າວສານຂອງ ທຄຕລ ແມ່ນຜ່ານຊ່ອງທາງ Website: www.bcel.com.la, Facebook Fan Page: BCEL Bank, BCEL Promotion, OneHeart.la, BCEL Property for Sales, IG: bcelbank, YouTube: BCEL Channel ແລະ TikTok: BCEL Bank.
?ໝາຍເຫດ: ທຄຕລ ຈະບໍ່ໃຊ້ຊ່ອງທາງ App ຫຼື Social ອື່ນ ນອກເໜືອທີ່ບຸໄວ້ໃນຂໍ້ 1 ໃນການຕິດຕໍ່ຫາລູກຄ້າ ໂດຍສະເພາະແມ່ນທາງ Facebook, Instagram, Messenger, Website, WhatsApp… ຫາກພົບເຫັນກໍລະນີລັກສະນະນີ້ ແມ່ນໃຫ້ມີສະຕິເພາະອາດຈະເປັນການຕົວະຍົວະຫຼອກລວງຂອງກຸ່ມຄົນບໍ່ຫວັງດີ.
ນອກນີ້, ທະນາຄານຍັງໄດ້ຢໍ້າເຕືອນອີກວ່າ: ຢຸດຫຼົງເຊື່ອການກົດລິ້ງທີ່ບໍ່ຮູ້ຈັກເພື່ອຮັບລາງວັນ ແລະ ໃຫ້ສິດອະນຸຍາດໃຫ້ເຂົ້າເຖິງຂໍ້ມູນຜ່ານລະຫັດ, OTP ຫຼື ສະແກນລາຍມື-ໃບໜ້າ ເພາະນີ້ຄືການອະນຸຍາດໃຫ້ຜູ້ບໍ່ຫວັງດີ ເຂົ້າເຖິງບັນຊີທ່ານໄດ້
?ຖ້າຫາກຫຼົງກົດ ຫລື ໃຫ້ຂໍ້ມູນໄປແລ້ວໃຫ້ປະຕິບັດດັ່ງນີ້:
✅ ເຂົ້າໄປລັອກບັດຜ່ານແອັບ BCEL One.
✅ ປ່ຽນລະຫັດລ໋ອກອິນເຂົ້າ BCEL One ໃໝ່.
✅ ຖ້າຍັງບໍ່ທັນລົງທະບຽນໃບຫນ້າ ໃຫ້ຮີບລົງທະບຽນໄວ້.
ເມື່ອສັງຄົມປັດຈຸບັນກຳລັງຜະເຊີນກັບປາກົດການຫຍໍ້ທໍ້ຈາກກຸ່ມຄົນບໍ່ຫວັງດີແບບນີ້, ຢາກຝາກເຖິງທຸກຄົນໃຫ້ມີສະຕິລະມັດລະວັງຕົວ ແລະ ຢ່າຫຼົງເຊື່ອໄປກົດລິ້ງທີ່ຖືກສົ່ງເຂົ້າມາຢ່າງເດັດຂາດ, ເພາະຖ້າບໍ່ດັ່ງນັ້ນ ທ່ານອາດຈະຕົກເປັນເຫຍື່ອໄດ້.