ພາກັນຕົກຕະລຶງໝົດງານ! ເມື່ອມີຄົນຫຼົງຖ່າຍໜັກກາງງານປະກາດລາງວັນແກ່ສິລະປິນເກົາຫຼີ (2024 Hanteo Music Awards) ທີ່ປະເທດເກົາຫຼີໃຕ້, ໃນວັນທີ 18 ກຸມພາ ທີ່ຜ່ານມາ, ພາໃຫ້ຜູ້ທີ່ຢູ່ໃນງານໄດ້ແກ່ບັນດາສິລະປິນ, ແຟນຄລັບ ແລະ ຜູ້ຈັດງານຕ່າງກໍພາກັນປິດດັງ,ປິດປາກ ແລະ ມີທ່າທີຮູ້ສຶກຢາກອາຈຽນໄປຕາມໆກັນ. ເຊິ່ງໃນງານດັ່ງກ່າວກໍມີສິລະປິນດັງຫຼາຍວົງເຂົ້າຮ່ວມເຊັ່ນ: NCT DREAM, AESPA, ATEEZ, ZEROBASEONE, KISS OF LIFE
ກ່ຽວກັບເຫດການທີ່ເກີດຂຶ້ນໄດ້ມີລາຍງານວ່າ: ຜູ້ຊົມທີ່ຢືນຢູ່ແຖວໜ້າຕິດເວທີໄດ້ນັ່ງຖ່າຍໜັກ, ເຊິ່ງໃນບໍລິເວນນັ້ນເຕັມໄປດ້ວຍຜູ້ຄົນຢ່າງຫຼວງຫຼາຍ ແລະ ຫຼ້າສຸດມີຜູ້ໃຊ້ສື່ໂຊຊຽວມີເດຍທ່ານໜຶ່ງລະບຸວ່າ: ຜູ້ທີ່ກໍ່ເຫດດັ່ງກ່າວແມ່ນຕົນເອງ, ເຮັດໄປໂດຍບໍ່ໄດ້ຕັ້ງໃຈ, ຮູ້ສຶກຜິດທີ່ທຳລາຍບັນຍາກາດຂອງງານ ແລະ ພ້ອມຊົດໃຊ້ຄ່າເສຍຫາຍຫາກວ່າໄດ້ເຮັດໃຫ້ເສື້ອຜ້າຂອງຜູ້ໃດເປື້ອນ.ຕໍ່ກັບເຫດການທີ່ເກີດຂຶ້ນຫຼາຍຄົນກໍຕັ້ງຂໍ້ສັງເກດວ່າ ເຫດການນີ້ອາດເກີດຈາກຄວາມຕັ້ງໃຈກໍເປັນໄດ້, ເພາະຜູ້ກໍເຫດໄດ້ໂພສຄຳວ່າ ”ອຸດຈະລະ” ລົງໃນໂຊຊຽວມີເດຍຂອງລາວເມື່ອ 3 ມື້ກ່ອນງານ.
ເຖິງຢ່າງໃດກໍຕາມ, ເຫດການທີ່ເກີດຂຶ້ນກໍກາຍເປັນເລື່ອງທີ່ຖືກເວົ້າເຖິງຢ່າງເປັນວົງກວ້າງໃນສື່ສັງຄົມອອນລາຍພາຍໃນປະເທດ ແລະ ຕ່າງປະເທດ, ເນື່ອງຈາກເປັນເຫດການທີ່ຊວນຕົກຕະລຶງ ແລະ ບໍ່ມີໃຜຄາດຄິດວ່າຈະເກີດຂຶ້ນ.
ຂ່າວ: Khaosod