ໃນສັງຄົມປັດຈຸບັນ, ຫຼາຍທ່ານອາດເຄີຍເຫັນຍິນຂ່າວກໍລະນີການຖືກດູດເງິນອອກຈາກບັນຊີທະນາຄານາ, ໂດຍການສົ່ງລິ້ງແປກໆເຂົ້າມາທາງຂໍ້ຄວາມ SMS ຫຼື ທາງ Messenger, ເມື່ອຫຼົງກົດເຂົ້າໄປປາກົດວ່າຖືກດູດເງິນອອກຈາກບັນຊີໂດຍບໍ່ທັນໄດ້ຕັ້ງຕົວ, ເຊິ່ງເຫດການທີ່ເຄີຍເກີດຂຶ້ນເຮົາອາດຈະເຫັນວ່າມັກເກີດຂຶ້ນຢູ່ຕ່າງປະເທດ. ຫຼ້າສຸດ, ມີບັນຊີຜູ້ເຟສບຸກທ່ານໜຶ່ງໄດ້ອອກມາແບ່ງປັນປະສົບການ ພ້ອມທັງເຕືອນໄພທີ່ຫຼົງກົດເຂົ້າລິ້ງທີ່ສົ່ງເຂົ້າມາໃນຂໍ້ຄວາມ SMS ຫຼື ທາງ Messenger ຈົນເຮັດໃຫ້ລາວເສຍເງິນອອກຈາກບັນຊີແບບບໍ່ທັນຕັ້ງຕົວ.
ຈາກກໍລະນີມີຜູ້ໃຊ້ເຟດບຸກທ່ານໜຶ່ງອອກມາເຕືອນໄພກ່ຽວກັບການກົດລິ້ງອອນລາຍທີ່ສົ່ງມາຜ່ານຂໍ້ຄວາມ SMS ຫຼື ທາງ Messenger, ເນື່ອງຈາກຜູ້ເສຍຫາຍໄດ້ຫຼົງກົດລິ້ງດັ່ງກ່າວເຂົ້າໄປ, ພາຍຫຼັງທີ່ກົດເຂົ້າໄປກໍຖືກດູດເອົາເງິນອອກຈາກບັນຊີ, ເຊິ່ງເນື້ອໃນໂພສຂອງຜູ້ເສຍຫາຍໄດ້ເລົ່າວ່າ: ສະບາຍດີໝູ່ຄູ່ຊາວເຟສບຸກທຸກທ່ານ, ຂ້າພະເຈົ້າຢາກມາຝາກເຕືອນໃຫ້ທຸກຄົນໄດ້ມີສະຕິລະວັງຕົວໃນການໃຊ້ຊື່ອອນລາຍຕ່າງໆ…ເພາະມິດສາຊີບມັນຈະມາທຸກຮູບແບບໂດຍທີ່ເຮົາບໍ່ທັນໄດ້ຕັ້ງໂຕຖ້າມີຂໍ້ຄວາມແປກໆສົ່ງເຂົ້າມາທາງ SMS ຫລື Messenger ແລະຫຼາຍໆຊ່ອງທາງຫ້າມກົດເຂົ້າໄປເບິ່ງເດັດຂາດເພາະທ່ານອາດຕົກເປັນເຫຍື່ອຂອງມັນໂດຍບໍ່ຮູ້ໂຕ, ມື້ວານນິໄດ້ມີຂໍ້ຄວາມສົ່ງເຂົ້າມາທາງເຟສບຸກຂອງຂ້າພະເຈົ້າແລ້ວໃຫ້ເຮົາກົດເຂົ້າເບິ່ງຂ້າພະເຈົ້າໄດ້ຫຼົງກົດເຂົ້າໄປແລ້ວມັນຈະເຊື່ອມເຂົ້າບັນຊີ BCEL one ໂດຍອັດຕະໂນມັດເລີຍ (ມັນເດັ້ງຂຶ້ນມາໃຫ້ເຮົາສະແກນລາຍນິ້ວມືເພາະໂທລະສັບຂ້າພະເຈົ້າຕັ້ງສະແກນລາຍນິ້ວມືຂອງແອັບໄວ້) ໂດຍທີຂ້າພະເຈົ້າກະບໍ່ທັນໄດ້ຄິດ. ຫຼັງຈາກເຂົ້າໄປບໍ່ເກີນ2-3ນາທີ ມັນກໍດູດເງິນໃນບັນຊີອອກຢ່າງໄວຈົນໝົດເລີຍໂດຍທີ່ເຮົາບໍ່ທັນໄດ້ຕັ້ງໂຕເລີຍ, ເງິນໃນບັນຊີຂອງຂ້າພະເຈົ້າທີ່ມັນໄດ້ໄປວານນີ້ແມ່ນປະມານ4ລ້ານປາຍໂດຍທີ່ເຮົາບໍ່ສາມາດເຮັດຫຍັງທັນເລີຍ, ໂທຫາທະນາຄານກະຊ່ວຍຫຍັງບໍ່ໄດ້ເລີຍຈົນຕອນນີ້ບໍ່ກ້າຮອດເອົາເງິນເຂົ້າບັນຊີໄວ້ແລ້ວຍັງກັງວົນ ແລະ ຕົກໃຈຫຼາຍ.
ດັ່ງນັ້ນ, ຈຶ່ງຢາກອອກມາຝາກເຕືອນທຸກທ່ານໃຫ້ມີສະຕິລະມັດລະວັງຕົວ, ຢ່າຫຼົງກົດເຂົ້າລິ້ງແປກໆທີ່ສົ່ງເຂົ້າມາທາງຂໍ້ຄວາມ SMS ຫຼື Messenger ປົກກັນໄວ້ກ່ອນດີທີ່ສຸດ.