PRFM News, ສື່ມວນຊົນຂອງອິນໂດເນເຊຍລາຍງານ ເຫດການທີ່ບໍ່ຄາດຄິດເກີດຂຶ້ນເມື່ອຟ້າຜ່າລົງມາກາງສະໜາມ ໃສ່ນັກກິລາຈົນເສຍຊີວິດ ໃນລະຫວ່າງເກມການແຂ່ງຂັນນັດອຸ່ນເຄື່ອງລະຫວ່າງ ເອັບຊີ ບັນດຸງ (FC Bandung) ກັບ ເອັບບີໄອ ຊູບັງ (FBI Subang) ທີ່ສະໜາມກິລາ ສິລີວັງກີ (Siliwangi) ທີ່ເມືອງ ບັນດຸງ Bandung ແຂວງ ຈາວາ (Java) ຕັ້ງແຕ່ວັນທີ 10 ກຸມພາ 2024.
ຕາມການລາຍງານຜູ້ເຫັນເຫດການລະບຸວ່າ: ໃນຂະນະທີ່ການແຂ່ງຂັນໄດ້ດໍາເນີນໄປເປັນປົກກະຕິ ນັກເຕະຂອງທີມເອັບບີໄປ ຊູບັງ FBI Subang ກໍາລັງຈ່າຍບານໃຫ້ທີມຕົນເອງ ແຕ່ແລ້ວຟ້າຜ່າລົງກາງສະໜາມ ຖືກຮ່າງກາຍຂອງທ້າວ ເຊັບຕຽນ ລາຣາຈາ Septian Raharja, ເຮັດໃຫ້ລາວລົ້ມທັງຢືນ.
ລາວໝົດສະຕິ ແລະ ນອນຢູ່ພື້ນ ແຕ່ຍັງບໍ່ໄດ້ເສຍຊີວິດທັນທີ ລາວໄດ້ຖືກສົ່ງໄປໂຮງໝໍໃກ້ຄຽງ ແຕ່ໃນທີ່ສຸດເຈົ້າໜ້າທີ່ກໍບໍ່ສາມາດຊ່ວຍຊີວິດຂອງລາວໄດ້ ແລະ ໄດ້ເສຍຊີວິດໃນເວລາຕໍ່ມາ ເນື່ອງຈາກຮ່າງກາຍຂອງລາວຖືກກະແສໄຟຟ້າຢ່າງກະທັນຫັນ.