ເມື່ອບໍ່ດົນມານີ້, ໄດ້ມີພິທີວາງສີລາລຶກ ໂຄງການກໍ່ສ້າງໂຮງແຮມສາກົນ ຫົວພັນ ພຣາຊາ ຢູ່ທີ່ເດີ່ນຮ້ານຄ້າເກົ່າ ບ້ານພັນໄຊ ເມືອງຊຳເໜືອ ແຂວງຫົວພັນ ໂດຍແມ່ນ ບໍລິສັດ ເທັກໂນໂລຢີ ມິ້ນນິ້ງລາວ ຫົວພັນ ຈຳກັດ ເປັນຜູ້ສຳປະທານທີ່ດິນລັດ ແລະ ລົງທຶນໃນການກໍ່ສ້າງ 100%.

ໃນພິທີດັ່ງກ່າວ, ທ່ານ ຄຳແພງ ໄຊສົມແພງ ເຈົ້າແຂວງຫົວພັນ ໄດ້ຍົກໃຫ້ເຫັນຄວາມສໍາຄັນຂອງການລົງທຶນພັດທະນາແຂວງຫົວພັນໃນດ້ານຕ່າງໆ, ເຊິ່ງອຳນາດການປົກຄອງແຂວງຫົວພັນກໍພ້ອມທີ່ຈະໃຫ້ຄວາມຮ່ວມມື. ພ້ອມທັງສະແດງຄວາມເຊື່ອໝັ້ນວ່າ: ບໍລິສັດທີ່ຮັບເໝົາການກໍ່ສ້າງ-ລົງທຶນໃນຄັ້ງນີ້, ຈະໃຫ້ສຸມທຸກທ່າແຮງ, ເງື່ອນໄຂ ເພື່ອເຮັດໃຫ້ການກໍ່ສ້າງໄດ້ດໍາເນີນຖືກຕ້ອງຕາມມາດ ຖານເຕັກນິກການອອກແບບ ແລະ ສຳເລັດຕາມແຜນການທີ່ວາງໄວ້; ພາຍຫຼັງໂຮງແຮມສາກົນ ຫົວພັນ ພຣາຊາ ກໍ່ສ້າງສຳເລັດ ຈະສາມາດຮອງຮັບແຂກຄົນທັງພາຍໃນ ແລະ ຕ່າງປະເທດເຂົ້າມາພັກເຊົາ ແລະ ທ່ຽວຊົມແຂວງຫົວພັນໃຫ້ສະດວກສະບາຍກວ່າເກົ່າ, ທັງເປັນການສ້າງວຽກເຮັດງານທຳໃຫ້ຊາວໜຸ່ມ ແລະ ປະຊາຊົນ,ມີລາຍຮັບເຂົ້າສູ່ຄອບຄົວຫຼາຍຂຶ້ນ, ກ້າວໄປເຖິງການຫຼຸດພົ້ນຈາກຄວາມທຸກຍາກເທື່ອລະກ້າວ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງຫົວພັນ ຕາມ 5 ທ່າແຮງຂອງແຂວງໃຫ້ປະກົດຜົນເປັນຈິງ.

ໂຄງການກໍ່ສ້າງໂຮງແຮມ ສາກົນຫົວພັນ ພຣາຊາ ມີເນື້ອທີ່ດິນທັງໝົດ 2.580 ຕາແມັດ.ໃນນີ້, ເນື້ອທີ່ການກໍ່ສ້າງມີ 1.750 ຕາແມັດ, ເປັນຕຶກ 12 ຊັ້ນ, ສູງປະມານ 60 ແມັດ, ເປັນໂຮງແຮມແບບລວມສູນ ລະດັບ 5 ດາວ ລວມມູນຄ່າການກໍ່ສ້າງທັງໝົດ 100 ລ້ານໂດລາສະຫະລັດ, ໂດຍຈະເລີ່ມລົງມືການກໍ່ສ້າງນັບແຕ່ມື້ວາງສີລາລຶກເປັນຕົ້ນໄປ,ຄາດວ່າຈະໃຊ້ເວລາການກໍ່ສ້າງທັງໝົດ 18 ເດືອນໃຫ້ສຳເລັດ.

ຂ່າວ: ໄມຄໍາ
ພາບ: ນິດຖະໜອມ