ໃນຕອນເຊົ້າວັນທີ 5 ກຸມພາທີ່ຜ່ານມາທີ່ນະຄອນຫຼວງວຽງຈັນ; ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຍື່ນສານຕາຕັ້ງຂອງບັນດາທ່ານທູດຈາກປະເທດເພື່ອນມິດ ເພື່ອມາດຳລົງຕໍາແໜ່ງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມ ປະຈໍາ ສປປ ລາວ ເຊິ່ງມີ 4 ທ່ານເຂົ້າຍື່ນສານຕາມລຳດັບດັ່ງນີ້:
1. ທ່ານ ນາງ ເມແກນ ອີລິຊາເບທ ໂຈເນສ (Megan Elizabeth Jones) ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ອົສຕຣາລີ ຄົນໃໝ່ ປະຈໍາ ສປປ ລາວ ຊຶ່ງມີສຳນັກງານສະຖານທູດຕັ້ງຢູ່ ນະຄອນຫຼວງວຽງຈັນ.
2. ທ່ານ ຟິໂລມີໂນ ອາເລັກໂຊ ຊີວວາ (Filomeno Aleixo da Silva) ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ຕີມໍແລັດສະເຕ ຄົນໃໝ່ ປະຈໍາ ສປປ ລາວ ຊຶ່ງມີສຳນັກງານສະຖານທູດຕັ້ງຢູ່ ນະຄອນຫຼວງວຽງຈັນ.
3. ທ່ານ ນາງ ແຣັດເທີ ໂຣຈ ວາເຣຍອາວາ (Heather Roach Variava) ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສະຫະລັດອາເມຣິກາ ຄົນໃໝ່ ປະຈໍາ ສປປ ລາວ ຊຶ່ງມີສຳນັກງານສະຖານທູດຕັ້ງຢູ່ ນະຄອນຫຼວງວຽງຈັນ.
4. ທ່ານ ອ໋ອງ ໂກ (Aung Ko) ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ສະຫະພາບມຽນມາ ຄົນໃໝ່ ປະຈໍາ ສປປ ລາວ ຊຶ່ງມີສຳນັກງານສະຖານທູດຕັ້ງຢູ່ ນະຄອນຫຼວງວຽງຈັນ.
ໃນໂອກາດຕ້ອນຮັບການເຂົ້າຍື່ນສານຂອງແຕ່ລະທ່ານທູດ, ທ່ານ ທອງລຸນ ສີສຸລິດ ກໍໄດ້ກ່າວຕໍ່ທ່ານທູດແຕ່ລະທ່ານ ເຊິ່ງມີເນື້ອໃນໂດຍລວມແມ່ນໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍບັນດາທ່ານເອກອັກຄະລັດຖະທູດແຕ່ລະທ່ານທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມຄົນໃໝ່ ປະຈໍາ ສປປ ລາວ ໃນຄັ້ງນີ້, ພ້ອມທັງສະແດງຄວາມຫວັງວ່າ: ໃນໄລຍະທີ່ດຳລົງຕຳແໜ່ງເປັນເອກອັກຄະລັດຖະທູດປະຈຳ ສປປ ລາວ, ບັນດາທ່ານທູດຈະເປັນຂົວຕໍ່ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີໃຫ້ນັບມື້ແຕກດອກອອກຜົນຍິ່ງໆຂຶ້ນໃນອະນາຄົດ, ເຊິ່ງລັດຖະບານ ແລະ ພາກສ່ວນກ່ຽວຂ້ອງຕ່າງໆຂອງລາວພ້ອມທີ່ຈະໃຫ້ການຮ່ວມມື, ສະໜັບສະໜູນ ແລະ ອໍານວຍຄວາມສະດວກ ເພື່ອໃຫ້ບັນດາທ່ານທູດສາມາດເຮັດສໍາເລັດໜ້າທີ່ທີ່ໄດ້ຮັບມອບໝາຍຢ່າງຈົບງາມ; ພ້ອມດຽວກັນ, ທ່ານປະທານປະເທດກໍຍັງໄດ້ສະເໜີໃຫ້ບັນດາທ່ານທູດຊ່ວຍສືບຕໍ່ຊຸກຍູ້ການຮ່ວມມືໃນດ້ານຕ່າງໆ, ໂດຍສະເພາະໃນປີ 2024 ນີ້ທີ່ ສປປ ລາວ ຈະໄດ້ຮັບກຽດເປັນປະທານອາຊຽນ ແລະ ຫວັງຢ່າງຍິ່ງວ່າຈະໄດ້ຮັບການສະໜັບສະໜູນຊ່ວຍເຫຼືອ ແລະ ການຮ່ວມມືຈາກບັນດາທູດທັງໝົດເພື່ອເຮັດໃຫ້ການເປັນປະທານອາຊຽນຂອງ ສປປ ລາວ ປະສົບຜົນສໍາເລັດຢ່າງຈົບງາມ.
ຕອນທ້າຍວາລະການເຂົ້າຍື່ນສານຂອງທ່ານທູດແຕ່ລະປະເທດ, ທ່ານທູດແຕ່ລະທ່ານກໍໄດ້ສະແດງຄວາມຂອບໃຈຕໍ່ຄໍາເວົ້າອັນຈົບງາມຂອງປະທານປະເທດແຫ່ງ ສປປ ລາວ ແລະ ກ່າວສະແດງຄວາມຍິນດີທີ່ຈະສືບຕໍ່ຊຸກຍູ້ສົ່ງເສີມສາຍພົວພັນມິດຕະພາບອັນດີງາມ ແລະ ການຮ່ວມມືຢ່າງມີໝາກຜົນລະຫວ່າງປະເທດຂອງຕົນ ກັບ ສປປ ລາວ ໃຫ້ນັບມື້ນັບໄດ້ຮັບການເສີມຂະຫຍາຍ ແລະ ແຕກດອກອອກຜົນຍິ່ງໆຂຶ້ນ.
(ຂ່າວ-ພາບ: ສຸກສະຫວັນ)