ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ 7 ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 9 ທັນວາ
2014 ທີ່ຫໍປະຊຸມສະພາແຫ່ງຊາດ ໂດຍການເປັນປະທານຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ໃຫ້
ກຽດເຂົ້າຮ່ວມພິທີອັນມີຄວາມໝາຍ ແລະ ສຳຄັນຄັ້ງນີ້ ໂດຍທ່ານ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານ
ງານສູນກາງພັກ ປະທານປະເທດ ພ້ອມດ້ວຍບັນດາການນຳ-ອະດີດການນຳຂັ້ນສູງ ແລະ ສະມາຊິກສະພາແຫ່ງຊາດຂອບ
ເຂດທົ່ວປະເທດ ເຊິ່ງກອງປະຊຸມຈະໄດ້ດຳເນີນໄປເຖິງວັນທີ 26 ທັນວາ 2014 ຈິ່ງສຳເລັດ.
ທ່ານນາງ ປານີ ຢາທໍ່ຕູ້ ກ່າວວ່າ: ກອງປະຊຸມທີ່ມີຄວາມໝາຍ-ຄວາມສຳຄັນຄັ້ງນີ້ ໄດ້ດຳເນີນໄປໃນທ່າມກາງບັນຍາກາດ
ທີ່ທົ່ວພັກ ທົ່ວລັດ ແລະ ທົ່ວປວງຊົນລາວທັງຊາດ ຫາກໍ່ສຳເລັດການສະເຫຼີມສະຫຼອງວັນສະຖາປະນາ ສປປ ລາວ ຄົບຮອບ
39 ປີ ແລະ ພວມສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກ ແຜນພັດທະນາເສດຖະກິດ-ສັງຄົມ 5 ປີ
ຄັ້ງທີ 7 ໄລຍະທ້າຍສະໄໝ ກໍ່ຄືການຈັດຕັ້ງຜັນຂະຫຍາຍຜົນສຳເລັດ ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ
IX ສະໄໝທີ 9 ຜົນສຳເລັດ ກອງປະຊຸມວຽກງານ 3 ສ້າງທົ່ວປະເທດ ຕິດພັນກັບການຊຸກຍູ້ຂະບວນການສະເຫຼີມສະຫຼອງ
2 ວັນ ປະຫວັດສາດໃນປີ 2015 ໃຫ້ເປັນຂະບວນຟົດຟື້ນ ເຊິ່ງໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ
ຊຸດທີ 7 ນີ້ ບັນດາສະມາຊິກສະພາແຫ່ງຊາດ (ສສຊ) ພ້ອມດ້ວຍພາກສ່ວນກ່ຽວຂ້ອງ ຈະໄດ້ພ້ອມກັນສຸມໃສ່ຄົ້ນຄວ້າພິຈາ
ລະນາ ແລະ ຕົກລົງບັນຫາສຳຄັນຂອງຊາດ ເປັນຕົ້ນແມ່ນ ຜົນການຈັດຕັ້ງປະຕິບັດນະໂຍບາຍສົ່ງເສີມການຜະລິດເປັນ
ສິນຄ້າ ເພື່ອບັນລຸເປົ້າໝາຍສະຫັດສະວັດທີ 1 (MDGs1) ແນໃສ່ຫຼຸດຜ່ອນຄວາມທຸກຍາກຂອງປະຊາຊົນ ສະພາບການຈັດ
ຕັ້ງປະຕິບັດວຽກງານແຮງງານ ພິຈາລະນາ ແລະ ຮັບຮອງເອົາບົດລາຍງານຜົນການກວດສອບ ກ່ຽວກັບການສະຫຼຸບຂາດ
ຕົວການຈັດຕັ້ງປະຕິບັດ ແຜນງົບປະມານປະຈຳສົກປີ 2012-2013 ພິຈາລະນາ ແລະ ຮັບຮອງເອົາບົດລາຍງານວຽກງານ
ຂອງຄະນະປະຈຳສະພາແຫ່ງຊາດ ກ່ຽວກັບການຈັດຕັ້ງປະຕິບັດແຜນເຄື່ອນໄຫວວຽກງານ ລະຫວ່າງກອງປະຊຸມສະໄໝ
ສາມັນເທື່ອທີ 7-8 ແລະ ທິດທາງວຽກງານຂອງກອງປະຊຸມສະໄໝສາມັນເທື່ອທີ 8-9 ຂອງສະພາແຫ່ງຊາດ ຊຸດທີ 7 ພິຈາ
ລະນາ ແລະ ຮັບຮອງເອົາກົດໝາຍຈຳນວນ 7 ສະບັບ ໃນນັ້ນກົດໝາຍສ້າງໃໝ່ 4 ສະບັບຄື: ກົດໝາຍວ່າດ້ວຍການຄຸ້ມ
ຄອງເງິນຕາຕ່າງປະເທດ ກົດໝາຍວ່າດ້ວຍການຄຸ້ມຄອງຄົນເຂົ້າ-ອອກ ສປປ ລາວ ແລະ ການຄຸ້ມຄອງຄົນຕ່າງປະເທດ
ກົດໝາຍວ່າດ້ວຍການຄວບຄຸມເຄື່ອງດື່ມທີ່ມີທາດເຫຼົ້າ ແລະ ກົດໝາຍວ່າດ້ວຍການຕ້ານ ແລະ ສະກັດກັ້ນການໃຊ້ຄວາມ
ຮຸນແຮງຕໍ່ແມ່ຍິງ ແລະ ເດັກນ້ອຍ ກົດໝາຍປັບປຸງມີ 3 ສະບັບຄື: ກົດໝາຍວ່າດ້ວຍການແກ້ໄຂຄຳຮ້ອງທຸກ ກົດໝາຍ
ວ່າດ້ວຍພາສີ ແລະ ກົດໝາຍວ່າດ້ວຍການປິ່ນປົ່ວ ພ້ອມນັ້ນ ກອງປະຊຸມຍັງຈະໄດ້ຄົ້ນຄວ້າ ແລະ ປະກອບຄຳເຫັນຕໍ່ຮ່າງ
ປັບປຸງລັດຖະທຳມະນູນ ສະບັບປີ 2003 ບົນພື້ນຖານການສັງລວມກັ່ນຕອງເອົາຄວາມເຫັນ ຈາກຕົວແທນຂອງບັນດາ
ກະຊວງ ອົງການ ອຳນາດການປົກຄອງທ້ອງຖິ່ນ ແຂວງ ນະຄອນຫຼວງ ເມືອງ ສະຖາບັນ ແລະ ພາກສ່ວນກ່ຽວຂ້ອງທົ່ວ
ສັງຄົມ.
ສຳລັບການດຳເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ 7 ມື້ທຳອິດ ຜູ້ເຂົ້າຮ່ວມໄດ້ຮັບຟັງ ແລະ
ປະກອບຄຳເຫັນໃສ່ບົດລາຍງານ ກ່ຽວກັບໂຄງການຜະລິດເຂົ້າ ແລະ ສັດ ເພື່ອຄ້ຳປະກັນສະບຽງອາຫານ ແລະ ເປັນສິນຄ້າ
ປະກອບສ່ວນບັນລຸເປົ້າໝາຍສະຫັດສະວັດທີ 1 ເປັນຕົ້ນແມ່ນ ການແກ້ໄຂຄວາມທຸກຍາກ ແລະ ຄວາມອຶດຫິວ ຈາກທ່ານ
ວິໄລ ວັນ ພົມເຂ ລັດຖະມົນຕີວ່າການ ກະຊວງກະສິກຳ ແລະ ປ່າໄມ້ ບົດລາຍງານກ່ຽວກັບຜົນການຈັດຕັ້ງປະຕິບັດ ນະໂຍ
ບາຍສົ່ງເສີມການຜະລິດເປັນສິນຄ້າ ວຽກງານງານສົ່ງເສີມທຸລະກິດຂະໜາດນ້ອຍ-ກາງ ແນໃສ່ຫຼຸດຜ່ອນຄວາມທຸກຍາກ
ຂອງປະຊາຊົນ ຈາກທ່ານນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ແລະ ບົດລາຍ
ງານຂອງທ່ານນາງ ອ່ອນຈັນ ທຳມະວົງ ລັດຖະມົນວ່າການກະຊວງແຮງງານ ແລະ ສະຫວັດດີການ-ສັງຄົມ ກ່ຽວກັບວຽກ
ງານການພັດທະນາສີມືແຮງງານ ການຂາດແຄນແຮງງານ ແລະ ມາດຕະການໃນການຄຸ້ມຄອງແຮງງານ ທັງພາຍໃນ ແລະ
ຕ່າງປະເທດ.
ແຫລ່ງຂ່າວ: ວຽງຈັນໃໝ່