ຈາກກໍລະນີທີ່ມີເຟສບຸກຊື່ວ່າ Manichith Haemany ໄດ້ອອກມາໂພສ ຝາກເຕືອນໝູ່ເພື່ອນທຸກຄົນ ໃນວັນທີ 31 ມັງກອນ 2024 ຜ່ານມາ, ກ່ຽວກັບການຈອງທີ່ພັກທີ່ຄາເຟຍົນ See Stars & Forest Resort ຢູ່ຈັງຫວັດສະກົນນະຄອນ ປະເທດໄທ ແລ້ວຕົນເອງຖືກຕົວະຈາກເພຈປອມໃຫ້ຊຳລະການຈອງຄ່າທີ່ພັກມູນຄ່າ 7000 ບາດ ຫຼື ປະມານເກືອບ 5 ລ້ານກີບ ເຊິ່ງສະຖານທີ່ດັ່ງກ່າວເປັນສະຖານທີ່ທີ່ນັກທ່ອງທ່ຽວກຳລັງຍອດຮິດທັງຄົນລາວ ແລະ ຄົນໄທເອງ.
ດັ່ງນັ້ນທາງທີມງານລາວໂພສຈຶ່ງມາແນະນຳກ່ຽວກັບຂໍ້ສັງເກດໃນການເບິ່ງເພຈແທ້ ກັບເພຈປອມ ດັ່ງນີ້: ສຳລັບເພຈແທ້ໃຫ້ສັງເກດຈາກໜ້າປົກມີຊ່ອງທາງການໂອນເງິນຢ່າງຊັດເຈນ ແລະ ຝາກເບີໂທສອບຖາມລາຍລະອຽດ ນອກຈາກນີ້ຍັງສັງເກດຈາກຄົນກົດໃຈຫຼາຍກວ່າ 160,000 ຄົນ ແລະ ຜູ້ຕິດຕາມໃນປັດຈຸບັນທີ່ມີຈຳນວນຫຼາຍກວ່າ 175,000 ຄົນ ຊຶ່ງເພຈແທ້ໄດ້ມີການອອກມາໂພສເຕືອນເຖິງເພຈປອມຕະຫຼອດເວລາເພື່ອບໍ່ໃຫ້ຄົນທີ່ມາໃຊ້ບໍລິການຕ້ອງຕົກເປັນເຫຍື່ອ.
ສ່ວນເພຈປອມສັງເກດຈາກໜ້າປົກບໍ່ມີຊ່ອງທາງການໂອນທີ່ຊັດເຈນ ແລະ ມີຍອດການກົດຖືກໃຈ ກັບຍອດຜູ້ຕິດຕາມນ້ອຍກວ່າເພຈຫຼັກ ແຕ່ຢ່າງໃດກໍຕາມຂໍໃຫ້ນັກທ່ອງທ່ຽວທຸກຄົນໃຫ້ມີສະຕິລະມັດລະວັງຕົວ ສຳລັບໃຜທີ່ກຳລັງຈະໄປໃຊ້ບໍລິການຄວນໂທສອບຖາມເບີໂທທີ່ຂຶ້ນຢູ່ໜ້າເພຈແທ້ກ່ອນ ເພື່ອບໍ່ໃຫ້ຕົກເປັນເຫຍື່ອອີກ.