ແຫລ່ງທ່ອງທ່ຽວນໍ້າຕົກຕາດເຍືອງ ເມືອງປາກຊ່ອງ ແຂວງຈຳປາສັກ ໄດ້ຮັບລາງວັນການທ່ອງທ່ຽວ ປະຊາຊົນມີສ່ວນຮ່ວມແບບຍືນຍົງອາຊຽນ ໃນມະຫາກຳທ່ອງທ່ຽວອາຊຽນ ປະຈຳປີ 2024 ທີ່ ສປປ ລາວ ຮັບກຽດເປັນເຈົ້າພາບຈັດຂຶ້ນ ທີ່ນະຄອນຫລວງວຽງຈັນ.
ທ່ານ ນາງ ສອນທິດາ ອຸນາພົມ ປະທານ ບໍລິສັດ ພັດທະນາແຫລ່ງທ່ອງທ່ຽວນໍ້າຕົກຕາດເຍືອງ ເມືອງປາກຊ່ອງ ແຂວງຈຳປາສັກ ໄດ້ໃຫ້ສຳພາດໃນໂອກາດມອບລາງວັນມາດຕະຖານການທ່ອງທ່ຽວອາຊຽນ ປີ 2024 ເມື່ອບໍ່ດົນນີ້ວ່າ: ຜ່ານມາແຫລ່ງທ່ອງທ່ຽວນໍ້າຕົກຕາດເຍືອງ ກໍໄດ້ຮັບລາງວັນສຳຄັນຕ່າງໆ ເປັນຕົ້ນ ໃນປີ 2019 ໄດ້ຮັບລາງວັນຫ້ອງນໍ້າສະອາດ, ສາທາລະນະສະອາດອາຊຽນ, ປີ 2020 ໄດ້ຮັບລາງວັນການທ່ອງທ່ຽວ ປະຊາຊົນມີສ່ວນຮ່ວມ, ປີ 2022 ໄດ້ຮັບລາງວັນການທ່ອງທ່ຽວປະຊາ ຊົນມີສ່ວນຮ່ວມ ແບບຍືນຍົງອາຊຽນ ແລະ ໃນປີ 2024 ໄດ້ຮັບລາງວັນການທ່ອງທ່ຽວ ແບບປະຊາ ຊົນມີສ່ວນຮ່ວມ ແບບຍືນຍົງອາຊຽນ ອີກຄັ້ງ ເຊິ່ງການໄດ້ຮັບລາງວັນດັ່ງກ່າວໃນປີນີ້ ຖືເປັນໂອກາດທີ່ດີໃນການພັດທະນາການທ່ອງທ່ຽວ ຢູ່ໃນ ສປປ ລາວ ໂດຍສະເພາະຢູ່ພາກໃຕ້ ກໍຄື ແຫລ່ງທ່ອງທ່ຽວນໍ້າຕົກຕາດເຍືອງຂອງພວກເຮົາ.
ທ່ານ ນາງ ສອນທິດາ ອຸນາພົມ ຍັງໃຫ້ຮູ້ອີກວ່າ: ຜ່ານມາພວກເຮົາ ໄດ້ໃຫ້ການຊຸກຍູ້ສົ່ງເສີມປະຊາຊົນ ພ້ອມທັງບັນດາກິດຈະກຳຕ່າງໆທີ່ປິ່ນອ້ອມເຂດພັດທະນາການທ່ອງທ່ຽວ ໃຫ້ປະຊາຊົນໄດ້ມີສ່ວນຮ່ວມ ເປັນຕົ້ນ ການປູກ ແລະ ການລ້ຽງ ທີ່ພວກເຮົາໄດ້ເຮັດເປັນວົງຈອນການທ່ອງທ່ຽວຮ່ວມກັນ. ໃນຂະນະດຽວກັນ, ພາຍຫລັງກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 27 ທີ່ ສປປ ລາວ ໄດ້ຮັບກຽດເປັນເຈົ້າພາບໄດ້ສຳເລັດລົງ ພວກເຮົາຈະສືບຕໍ່ເຮັດກິດຈະກຳໂຮມສະເຕ ເພື່ອເປັນຕ່ອງໂສ້ໃນການພັດທະນາແຫລ່ງທ່ອງທ່ຽວ ແລະ ການທ່ອງທ່ຽວຍ່າງປ່າ ຊຶ່ງຈະເປັນກິດຈະກຳອັນໃໝ່ຂອງແຫ່ງທ່ອງທ່ຽວນໍ້າຕົກຕາດເຍືອງ.
ແຫລ່ງທ່ອງທ່ຽວນໍ້າຕົກຕາດເຍືອງ ເປັນໜຶ່ງໃນຫລາຍແຫລ່ງທ່ອງທ່ຽວ ທີ່ຢູ່ທາງພາກໃຕ້ຂອງ ສປປ ລາວ ເຊິ່ງໃນແຕ່ລະປີ ບັນດານັກທ່ຽວທັງພາຍໃນ ແລະ ຕ່າງປະເທດ ເຂົ້າໄປທ່ອງທ່ຽວ ແມ່ນມີຈຳນວນເພີ່ມຂຶ້ນຢ່າງຕໍ່ເນື່ອງ ແລະ ໃນໂອກາດທີ່ ສປປ ລາວ ເປີດມະຫາກຳທ່ອງທ່ຽວອາຊຽນ 2024 ແນ່ນອນວ່າ ແຫລ່ງທ່ອງທ່ຽວນໍ້າຕົກຕາດເຍືອງ ຈະເປັນອີກຈຸດໜຶ່ງທີ່ຈະດຶງດູດນັກທ່ອງທ່ຽວ ພາຍໃນ, ຕ່າງປະເທດ ເຂົ້າມາທ່ອງທ່ຽວ ແລະ ຈະເປັນຈຸດໜຶ່ງເພື່ອເປັນບ່ອນພົບປະ, ແລກປ່ຽນການທ່ອງທ່ຽວເຊິ່ງງກັນ ແລະ ກັນ ອີກດ້ວຍ.
ແຫຼ່ງຂ່າວ: ປະເທດລາວ