ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອສະໜັບສະໜູນໂຄງການສະໜອງອຸປະກອນເກັບຮັກສາ ແລະ ຂົນສົ່ງເລືອດໃຫ້ແກ່ສະຖາບັນເລືອດແຫ່ງຊາດ ອົງການກາແດງລາວ ເພື່ອຍົກລະດັບການນຳສົ່ງເລືອດ ໃນ 6 ແຂວງພາກເໜືອພາຍໃຕ້ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP) ມູນຄ່າປະມານ 188.000 ໂດລາສະຫະລັດ,ພິທີເຊັນສັນຍາເປັນການລົງນາມການຊ່ວຍເຫຼືອດັ່ງກ່າວຈັດຂຶ້ນເມື່ອບໍ່ດົນມານີ້ທີ່ ນະຄອນຫຼວງວຽງຈັນ,ຕາງໜ້າເຊັນລະຫວ່າງ ທ່ານ ໂຄບະຢະຊິ ເຄັນອິຈິ ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ ແລະ ທ່ານ ຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດໂດຍມີ ທ່ານ ພູທອນ ເມືອງປາກ ປະທານອົງການກາແດງລາວ ແລະ ທ່ານ ຊິນຊຸເກະ ໂອກິລິ ຜູ້ອຳນວຍການບໍລິສັດ ໄດໂດ ຈຳກັດຜູ້ດຽວ ໃຫ້ກຽດເຂົ້າຮ່ວມເປັນສັກຂີພະຍານ.
ທ່ານ ພູທອນ ເມືອງປາກ ໄດ້ຕາງໜ້າໃຫ້ການອົງການກາແດງລາວ ກ່າວຄຳເຫັນໃນພິທີເຊັນສັນຍາເຖິງການຊ່ວຍເຫຼືອຈາກປະເທດຍີ່ປຸ່ນໃນຄັ້ງນີ້ທີ່ໄດ້ປະກອບສ່ວນອັນໃຫຍ່ຫຼວງ ເຂົ້າໃນການຍົກລະດັບລະບົບຂົນສົ່ງເລືອດ ໃນ 6 ແຂວງພາກເໜືອ, ໂຄງການດັ່ງກ່າວຊ່ວຍສ້າງຄວາມເຂັ້ມແຂງໃຫ້ແກ່ສູນເລືອດແຂວງຫຼວງພະບາງໃນການຕອບສະໜອງເລືອດ ແລະ ສ່ວນປະກອບຂອງເລືອດໃຫ້ແກ່ບັນດາແຂວງໃກ້ຄຽງ, ພ້ອມທັງເປັນການປະກອບສ່ວນເຂົ້າໃນການປັບປຸງການບໍລິການດ້ານສາທາລະນະສຸກຂອງລັດຖະບານລາວ, ໂດຍຜ່ານການພັດທະນາແຜນຍຸດທະສາດເລືອດແຫ່ງຊາດ 2021-2030, ໂຄງການນີ້ແມ່ນລັດຖະບານຍີ່ປຸ່ນຈະໄດ້ສະໜອງອຸປະກອນການແພດທີ່ມີຄຸນະພາບສູງຜ່ານການຮ່ວມມືກັບ ບໍລິສັດ ໄດໂດ ຈຳກັດຜູ້ດຽວ ປະເທດຍີ່ປຸ່ນ.
ທ່ານ ໂຄບະຢະຊິ ເຄັນອິຈິ ໄດ້ໃຫ້ຄຳເຫັນວ່າ: ສູນເລືອດແຂວງຫຼວງພະບາງເປັນສູນເລືອດທີ່ມີຂະໜາດໃຫຍ່ເປັນອັນດັບ 2 ໃນທົ່ວປະເທດ,ຍັງມີໜ້າທີ່ສຳຄັນຄືເປັນສູນເລືອດທີ່ສ້າງ ແລະ ນຳສົ່ງຖົງເລືອດໃຫ້ແກ່ 6 ແຂວງພາກເໜືອອີກດ້ວຍ, ເລືອດມີຄວາມຈຳເປັນໃນກໍລະນີເກີດອຸບັດຕິເຫດ ແລະ ມີການຜ່າຕັດ, ແຕ່ເນື່ອງຈາກວ່າຢູ່ໃນປະເທດລາວມີຄົນເຈັບທີ່ມີພະຍາດເລືອດຕິດໂຕມາແຕ່ກຳເນີດເປັນຈຳນວນຫຼາຍເຮັດໃຫ້ຜະລິດຕະພັນເລືອດທີ່ໄດ້ຮັບຈາກສູນເລືອດແຂວງຫຼວງພະບາງກາຍເປັນສິ່ງຊູຊີບທີ່ຈຳເປັນສຳລັບຄົນເຈັບ, ແຕ່ປັດຈຸບັນສູນເລືອດແຂວງຫຼວງພະບາງແມ່ນມີການເກົ່າແກ່ຊຸດໂຊມລົງເຮັດໃຫ້ຫຍຸ້ງຍາກໃນການນຳສົ່ງຜະລິດຕະພັນເລືອດທີ່ມີຄຸນະພາບສູງ ແລະ ປອດໄພໄປບ່ອນອື່ນໄດ້”.
ຂ່າວ: ວຽງຈັນໃໝ່.