ໃນວັນທີ 20 ທັນວາ 2023 ຜ່ານມາ, ເຈົ້າໜ້າທີ່ວິຊາສະເພາະ ພະແນກຕຳຫຼວດ ປກສ ເມືອງ ປາກຊ່ອງ ໄດ້ຮັບການລາຍງານຈາກພາກສ່ວນທີ່ກ່ຽວຂ້ອງວ່າ: ໄດ້ມີເຫດການຄາຕະກຳ ແລະ ການທຳຮ້າຍຮ່າງກາຍ ຢູ່ເຂດບ້ານ ຫ້ວຍຈຽດ ເມືອງປາກຊ່ອງ ແຂວງຈຳປາສັກ.
ຫຼັງຈາກໄດ້ຮັບລາຍງານຈາກພາກສ່ວນກ່ຽວຂ້ອງ ເຈົ້າໜ້າທີ່ວິຊາສະເພາະ ໄດ້ສົມທົບກັບພາກສ່ວນກ່ຽວຂ້ອງລົງສະຖານທີ່ເກີດເຫດໄດ້ເກັບກຳຂໍ້ມູນຈຶ່ງສາມາດຮູ້ໄດ້ວ່າ: ຜູ້ກໍ່ເຫດຊື່ທ້າວ ຄອງ ພູມມີໄຊ ອາຍຸ 37 ປີ ອາຊີບເຮັດສວນ ບ້ານຫ້ວຍຈຽດ ເມືອງປາກຊ່ອງ ແຂວງຈຳປາສັກ ໄດ້ໃຊ້ໄມ້ຄ້ອນຍາວຕີໃສ່ບໍລິເວນຫົວ ແລະ ແຂນຂອງທ້າວເມັ່ງ ຈົນເສຍຊີວິດ ແລະ ທຳຮ້າຍຮ່າງກາຍ ທ້າວວັນໄຊ ຈົນໄດ້ຮັບບາດເຈັບສົມຄວນ ເນື່ອງຈາກວ່າຜູ້ກ່ຽວໄດ້ເສບຢາຈົນເກີດອາການມຶນເມົາຈົນຫຼອນ ເມື່ອມາຮອດເວລາ 15:30 ນາທີຂອງວັນດຽວກັນ ຈຶ່ງໄດ້ກັກຕົວຜູ້ກໍ່ເຫດມາດຳເນີນຄະດີ ຕາມຂັ້ນຕອນຂອງກົດໝາຍ.
ທີ່ມາ: ຫ້ອງຂ່າວກອງບັນຊາການ ປກສ ແຂວງຈຳປາສັກ