ຕາມການລາຍງານສຳນັກຂ່າວໄທ ລາຍງານໃນວັນທີ 10 ມັງກອນ 2024 ນີ້ວ່າເຈົ້າໜ້າທີ່ຕຳຫຼວດໄດ້ຮັບແຈ້ງເຫດວ່າມີການຜິດຖຽງກັນ ແລະ ທຳຮ້າຍຮ່າງກາຍ ທີ່ບ້ານປ່າໂນ ເມືອງນາເຊືອກ ແຂວງມະຫາສາລະຄາມ ເຈົ້າໜ້າທີ່ຈຶ່ງໄດ້ລົງກວດສອບຈຸດເກີດເຫດພົບວ່າ: ມີຜູ້ບາດເຈັບທັງໝົດ 5 ຄົນ ກ່ອນຈະນຳຕົວສົ່ງໂຮງໝໍ.
ຈາກການສອບຖາມ ທ້າວ ປີຊາ ອາຍຸ 61 ປີຜູ້ເປັນພໍ່ຂອງຜູ້ກໍ່ເຫດກ່າວວ່າ: ລູກຊາຍຂອງຕົນຄື ທ້າວ ປີຍະໜັດ ອາຍຸ 37 ປີ ເປັນລູກເຂີຍບ້ານຫຼັງເກີດເຫດ ເຊິ່ງລູກຕົນກັບລູກໃພ້ມີເລື່ອງຜິດຖຽງກັນມາໄລຍະໜຶ່ງແລ້ວ ເຊິ່ງທັງ 2 ມີລູກນຳກັນ 3 ຄົນ ແລະ ທີ່ຜ່ານມາເຄີຍຈະຍ່າຫ້າງກັນ ແຕ່ຝ່າຍຊາຍລືມເຄື່ອງໄວ້ບ້ານ ແລະ ອີກຄັ້ງເປັນຝ່າຍຍິງທີ່ລືມເຄື່ອງຄືກັນເລີຍຍັງບໍ່ໄດ້ຍ່າຫ້າງກັນ.
ຕາມການລາຍງານລະບຸວ່າ: ກ່ອນເກີດເຫດຜູ້ເປັນລູກເຂີຍມີອາການເມົາ ແລະ ຢາກໄປນອນບ້ານເມຍ ແຕ່ເມຍບໍ່ໃຫ້ນອນນຳຈຶ່ງເປັນເຫດຜິດຖຽງກັນ, ອີກສາເຫດມາຈາກການຊູ້ສາວ ເພາະຝັ່ງຜູ້ຊາຍບໍ່ຍອມຍ່າ ຢາກຈະເອົາທັງ 2 ຄົນ ສ່ວນຄົນໃໝ່ຢູ່ໝູ່ບ້ານຂ້າງມີລູກ 3 ຄົນ ສ່ວນເມຍຄົນປະຈຸບັນກໍມີລູກ 3 ຄົນ.
ເຈົ້າໜ້າທີ່ໄດ້ສອບສວນເບື້ອງຕົ້ນ ທ້າວ ປະສິດ ເຊິ່ງເປັນພໍ່ເຖົ້າໄດ້ລະບຸວ່າ: ຜູ້ເປັນລູກເຂີຍໄດ້ມາໂອ້ລົມກັນທີ່ບ້ານກ່ຽວກັບການຍ່າຫ້າງກັນ ເນື່ອງຈາກມີບັນຫາກັນພາຍໃນຄອບຄົວ ແຕ່ເກີດບໍເຂົ້າໃຈກັນ ລູກເຂີຍຈຶ່ງໄດ້ໃຊ້ອາວຸດປືນອັດລົມດັດແປງທີ່ສາມາດຍິງກະສຸນໄດ້ 10 ນັດ ເຊິ່ງຍິງຜູ້ເປັນປ້າກ່ອນ ຈາກນັ້ນກໍຍິງແມ່ເຖົ້າ ກ່ອນທີ່ຈະເຂົ້າໄປຍິງ ເມຍຕົນເອງ ແລະ ພໍ່ເຖົ້າ ສ່ວນຜູ້ກໍ່ເຫດຖືກພໍ່ເຖົ້າໃຊ້ມີດຟັນເຂົ້າບໍລິເວນຫົວ.
ທາງດ້ານເຈົ້າໜ້າທີ່ສາມາດນຳສົ່ງຄົນເຈັຍທັງ 5 ຄົນໄປໂຮງໝໍ ເຊິ່ງຕອນນີ້ຕ້ອງໄດ້ຖ້າອາການທັງໝົດດີຂຶ້ນກ່ອນຈຶ່ງຈະໄດ້ທຳການສືບສວນ-ສອບສວນເພີ່ເຕີມ ຈຶ່ງຈະສາມາດດຳເນີນຄະດີຕໍ່ຜູ້ກໍ່ເຫດໄດ້.