ສະພາເກົາຫຼີໃຕ້ຜ່ານຮ່າງກົດໝາຍ ຫ້າມຂາຍ ແລະ ບໍລິໂພກຊີ້ນໝາ.
ເມື່ອວັນທີ 9 ມັງກອນທີ່ຜ່ານມາ, ອີງຕາມ ສຳນັກຂ່າວຕ່າງປະເທດ ລາຍງານໃຫ້ຮູ້ວ່າ: ລັດຖະສະພາເກົາຫຼີໃຕ້ຜ່ານຮ່າງກົດໝາຍຫ້າມ ຄ້າຂາຍ ແລະ ບໍລິໂພກຊີ້ນໝາ, ເຊິ່ງກົດໝາຍນີ້ຈະຖືກນຳໃຊ້ຢ່າງເປັນທາງການໃນປີ 2027 ເປັນຕົ້ນໄປ, ສ່ວນສາເຫດທີ່ລັດຖະສະພາ ເກົາຫຼີໃຕ້ຈະເລີ່ມບັງຄັບໃຊ້ກົດໝາຍດັ່ງກ່າວໃນອີກ 3 ປີ ຂ້າງໜ້ານັ້ນ ເນື່ອງຈາກວ່າ ເປັນການໃຫ້ເວລາແກ່ ຜູ້ເພາະພັນລ້ຽງໝາເພື່ອ ຈຳໜ່າຍ, ເຈົ້າຂອງຮ້ານອາຫານທີ່ຂາຍເມນູທີ່ນຳໃຊ້ຊີ້ນໝາເປັນວັດຖຸດິບ ໄດ້ມີເວລາໃນການຫາອາຊີບໃໝ່ເພື່ອເຮັດແທນອາຊີບເດີມ.
ຮ່າງກົດໝາຍດັ່ງກ່າວໄດ້ລະບຸໄວ້ວ່າ: ຫ້າມເພາະພັນ, ຫ້າມຂ້າ, ຫ້າມແຈກຈ່າຍ ແລະ ຫ້າມຄ້າຂາຍຊີ້ນໝາ, ຫາກຜູ້ໃດທີ່ຝ່າຝືນກົດ ໝາຍຈະມີໂທດເຖິງຂັ້ນຈຳຄຸກ, ເຊິ່ງກົດໝາຍສະບັບນີ້ໄດ້ວາງໂທດໃຫ້ຜູ້ທີ່ກະທຳການຂ້າໝາເພື່ອນຳຊີ້ນມາຂາຍ ຈະຖືກລົງໂທດຈຳຄຸກ ເປັນເວລາ 3 ປີ, ສຳລັບຄົນທີ່ລ້ຽງໝາ ເພື່ອເອົາໄວ້ກິນ ແລະ ຄົນຈໍາໜ່າຍຊີ້ນໝາຈະຖືກລົງໂທດຈຳຄຸກສູງສຸດເຖິງ 2 ປີ.
ສະຖິຕິຈາກລັດຖະບານເກົາຫຼີໃຕ້ ໃນປີ 2023 ກ່ຽວກັບຈຳນວນຮ້ານອາຫານທີ່ນຳຊີ້ນໝາມາປຸງແຕ່ງເປັນເມນູອາຫານແມ່ນມີປະມານ 1,600 ຮ້ານ ແລະ ຟາມທີ່ລ້ຽງໝາເພື່ອຈຳໜ່າຍມີຈຳນວນ 1,150 ແຫ່ງ.