ດັ່ງທີ່ຮູ້ກ່ອນໜ້ານີ້, ເຈົ້າຊາຍ ອັບດູນ ມາທີນ ແຫ່ງບຣູໄນ ເປັນທີ່ໝາຍປອງຂອງສາວໆຫຼາຍຄົນ ເນື່ອງຈາກເປັນຄົນທີ່ເກັ່ງມີຄວາມສາມາດຫຼາຍໆດ້ານ ຈົນເຮັດໃຫ້ຫຼາຍຄົນຕ່າງກໍພາກັນລຸ້ນວ່າ ໃຜຈະເປັນຜູ້ໂຊກດີໄດ້ຄອບຄອງຫົວໃຈຂອງເຈົ້າຊາຍ. ເຊິ່ງບໍ່ດົນມານີ້ ກໍມີຂ່າວອອກມາວ່າ ເຈົ້າຊາຍຈະໄດ້ຮ່ວມພິທີສົມຣົດຂຶ້ນໃນເດືອນມັງກອນ 2024.
ຫຼ້າສຸດ, ພິທີອະພິເສກສົມຣົດແມ່ນໄດ້ເລີ່ມຈັດຂຶ້ນແລ້ວ, ໂດຍການເປັນສັກຂີພະຍານຂອງສົມເດັດພະລາຊາທິບໍດີ ສຸລະຕານ ຮັດຍີ ຮັດຊານັລໂບເກຍ ມູອິຊຊັດດິນວັດເດົາລະ ແຫ່ງບຣູໄນ, ເຊິ່ງຈັດຂຶ້ນທີ່ ພະລາດຊະວັງ ອິສຕານາ ນຸຣຸລ ອິມານ, ນະຄອນເສຣີເບກາວັນ ເນກາຣາບຣູໄນດາຣຸສສະລາມ ຢ່າງສົມກຽດ.
ອີງຕາມສຳນັກຂ່າວຕ່າງປະເທດລາຍງານວ່າ: ເມື່ອວັນທີ 7 ມັງກອນທີ່ຜ່ານມາ ພິທີອະພິເສກສົມຣົດຂອງເຈົ້າຊາຍບຣູໄນໄດ້ເລີ່ມຕົ້ນຂຶ້ນ ແລ້ວ ໂດຍໄດ້ມີການຈັດງານພິທີສູ່ຂໍເປັນທີ່ຮຽບຮ້ອຍ, ໃນວັນທີ 11 ມັງກອນຈະເປັນພິທີອະພິເສກສົມຣົດແບບອິດສະລາມ, ຈາກນັ້ນ ໃນວັນທີ 14 ມັງກອນຈະມີງານລ້ຽງສະຫຼອງພະຣາຊຊະພິທີເສກສົມຣົດ ແລະ ແຫ່ຂະບວນອ້ອມຮອບນະຄອນເສຣີເບກາວັນ, ຕໍ່ມາໃນ ຕອນແລງຂອງວັນທີ 15 ມັງກອນຈະມີພິທີການສະເຫຼີມສະຫຼອງງານອະພິເສກສົມຣົດ ແລະ ຂັ້ນຕອນການອະພິເສກສົມຣົ້ດທຸກຢ່າງ ຈະເສັດສິ້ນສົມບູນໃນວັນທີ 16 ມັງກອນ.
ສຳລັບພິທີອະພິເສກສົມຣົດໃນຄັ້ງນີ້ຖືວ່າເປັນຂ່າວທີ່ຫຼາຍຄົນໃຫ້ຄວາມສົນໃຈເພາະເປັນການຈັດງານທີ່ໃຊ້ເວລາເຖິງ 10 ມື້ ແລະ ກໍເປັນຂ່າວປະຊາຊົນຊາວບຣູໄນມີຄວາມປິຕິຍິນດີເປັນຢ່າງຍິ່ງ.