ຫຼັງຈາກເຫດເຮືອບິນຕຳກັນ ທີ່ສະໜາມບິນຮານາເດະຈົນເກີດໄຟໄໝ້ເຮືອບິນດັ່ງກ່າວ ໃນວັນທີ 2 ມັງກອນ ທີ່ຜ່ານມາ, ຍີ່ປຸ່ນກໍພົບກັບຂ່າວເສົ້າອີກຄັ້ງ ເພາະເກີດເຫດໄຟໄໝ້ ທີ່ສູນລວມຮ້ານຂາຍເຄື່ອງຍອດນິນຍົມ ຂອງຄົນຍີ່ປຸ່ນ ແລະ ນັກທ່ອງທ່ຽວ.
ອີງຕາມສຳນັກຂ່າວຕ່າງປະເທດ ໃຫ້ຮູ້ວ່າ: ເວລາປະມານ 15:10 ນາທີ (ຕາມເວລາທ້ອງຖິ່ນ) ຂອງວັນທີ 3 ມັງກອນທີ່ຜ່ານມາ, ເກີດເຫດການໄຟໄໝ້ບໍລິເວນ ອູໂອມາຈິ ກິນເທນໄກ ເປັນເຂດສູນລວມຮ້ານຂາຍເຄື່ອງ (ຊັອບປິງ) ຊື່ດັງ ແລະ ເກົ່າແກ່ທີ່ສຸດ ຂອງເມືອງຄິຕະຄິວຊູ, ແຂວງຟຸກຸໂອກະ, ປະເທດຍີ່ປຸ່ນ ເຫດການດັ່ງກ່າວໄດ້ສ້າງຄວາມແຕກຕື່ນ ແລະ ຕົກໃຈໃຫ້ແກ່ນັກທ່ອງທ່ຽວ ທີ່ກຳລັງທ່ຽວຊົມ.
ສຳນັກງານຄວບຄຸມໜ່ວຍດັບເພີງ ໃນເມືອງຄິຕະຄິວຊູລາຍງານວ່າ: ພາຍຫຼັງໄດ້ຮັບແຈ້ງກໍໄດ້ນຳລົດດັບເພີງຈຳນວນ 20 ຄັນ ລົງໄປຄວບຄຸມເພີງ, ໂດຍຕົ້ນເພິງແມ່ນເລີ່ມຈາກບໍລິເວນທີ່ຕັ້ງຮ້ານອາຫານແຫ່ງໜຶ່ງໃກ້ກັບໂທໂຣມາຈິໂຊຄຸໂດໄກ ຢູ່ຫ່າງຈາກສະຖານີລົດໄຟ ເຈອາ ປະມານ 300 ແມັດ ເປັນເຂດທີ່ເຕັມໄປດ້ວຍຮ້ານອາຫານ ແລະ ນັກທ່ອງທ່ຽວຈຳນວນຫຼາຍ, ເຊິ່ງເຈົ້າໜ້າທີ່ໄດ້ທຳການອົບພະຍົບປະຊາຊົນໃຫ້ອອກຈາກທີ່ເກີດເຫດຢ່າງໄວທີ່ສຸດ. ສຳລັບເຫດການທີ່ເກີດຂຶ້ນໃນຄັ້ງນີ້ ເຈົ້າໜ້າທີ່ຍັງບໍ່ທັນໄດ້ມີການລາຍງານຜູ້ເສຍຊີວິດ ຫຼື ຜູ້ໄດ້ຮັບບາດເຈັບແຕ່ຢ່າງໃດ.
ອູໂອມາຈິ ກິນເທນໄກ ເປັນເຂດສູນລວມຮ້ານຂາຍເຄື່ອງ (ຊັອບປິງ) ຊື່ດັງ ແລະ ເກົ່າແກ່ທີ່ສຸດແຫ່ງໜຶ່ງໃນແຂວງຟຸກຸໂອກະ, ສ້າງຂຶ້ນຕັ້ງແຕ່ປີ 1951 ແລະ ເປັນບ່ອນໃນຮົ່ມແຫ່ງທຳອິດຂອງປະເທດຍີ່ປຸ່ນ, ມີຮ້ານຄ້າຈຳນວນຫຼາຍຮ້ານຕັ້ງຢູ່ສອງຟາກທາງຍາວປະມານ 400 ແມັດ.
ຂໍໃຫ້ທຸກຄົນປອດໄພຈາກເຫດການໃນຄັ້ງນີ້ ແລະ ມີສະຕິລະມັດລະວັງຕົວໃນການໄປທ່ຽວທຸກຄັ້ງ ເພາະອຸບັດຕິເຫດ ຫຼື ເຫດການທີ່ບໍ່ຄາດ ຄິດອາດເກີດຂຶ້ນໄດ້ຕະຫຼອດເວລາ.