ອີງຕາມການລາຍງານຂອງ ທ່ານ ພັນໂທ ສຸລີວັນ ແກ້ວມະນີວົງ ຜູ້ຊີ້ນຳວຽກງານຕຳຫຼວດ ໄດ້ອອກມາຖະແຫຼງກ່ຽວກັບ ເຫດການເດັກນ້ອຍ 4 ຄົນຢູ່ບ້ານຫົວຊຽງ ໄດ້ອອກຈາກເຮືອນພ້ອມທັງຂຽນຈົດໝາຍອຳລາ.
ຕໍ່ກັບເຫດການດັ່ງກ່າວ ກອງບັນຊາການ ປກສ ເມືອງໄຊທານີ ໃຫ້ຮູ້ວ່າ: ໃນເບື້ອງຕົ້ນເວລາ 19:45 ນາທີ ຂອງວັນທີ 25 ທັນວາ 2023 ກອງບັນຊາການ ປກສ ເມືອງໄຊທານີ ໄດ້ຮັບແຈ້ງຄວາມຈາກຜູ້ປົກຄອງເດັກນ້ອຍນັກຮຽນວ່າ: ໄດ້ພົບເຫັນຊອງຈົດໝາຍຂອງລູກສາວ ໂດຍມີເນື້ອໃນວ່າ: ພໍ່ແມ່ບໍ່ຕ້ອງເປັນຫ່ວງລູກ ອີກ 2-3 ປີລູກຈະກັບມາ ຫຼັງຈາກນັ້ນຈຶ່ງໄດ້ໂທຫາລູກສາວ ບໍ່ສາມາດຕິດຕໍ່ໄດ້ ພາຍຫຼັງໄດ້ຮັບແຈ້ງຄວາມແລ້ວເຈົ້າໜ້າທີ່ ຈຶ່ງໄດ້ລົງຕິດຕາມກວດກາຈຶ່ງໄດ້ຮູ້ວ່າ: ໃນເວລາ 7:30 ໂມງເຊົ້າຂອງວັນທີ 26 ທັນວາ 2023 ໄດ້ມີຄົນຈະມາຮັບເອົາເດັກນ້ອຍຕື່ມອີກ ຈາກນັ້ນເຈົ້າໜ້າທີ່ຈຶ່ງໄດ້ສ້າງແຜນຕິດຕາມ, ຕົກມາຮອດເວລາ 8:00 ໂມງເຊົ້າຂອງວັນດຽວກັນ ຈຶ່ງສາມາດກັກຕົວ ນາງ ຄຳຫຼ້າ ຫຼື ຍີ ອາຍຸ 20 ປີ ອາຊີບວ່າງງານ ບ້ານສີລຳດວນ ເມືອງຈັນທະບູລີ ນະຄອນຫຼວງວຽງຈັນ ທີ່ກຳລັງຈະມາເອົາເດັກນ້ອຍອີກ ພ້ອມດ້ວຍຄົນຂັບແທັກຊີ່ 1 ຄົນ.
ພາຍຫຼັງການສອບສວນຈຶ່ງຮູ້ວ່າ: ຜູ້ກ່ຽວຮັບສາລະພາບໄດ້ມາຮັບເອົາເດັກນ້ອຍ 4 ຄົນ ແລະ ໄດ້ເອົາໄປສົ່ງໃຫ້ຮ້ານເສີມສວຍຂອງຄົນຫວຽດນາມ ຢູ່ເຂດບ້ານດົງປະລານ ເມືອງສີສັດຕະນາກ ນະຄອນຫຼວງວຽງຈັນ ໂດຍໄດ້ເງິນຄ່າຈ້າງ 3 ແສນກີບ, ຈາກນັ້ນເຈົ້າໜ້າທີ່ໄດ້ລົງກວດກາຮ້ານເສີມສວຍທັງ 2 ຮ້ານດັ່ງກ່າວ ຈຶ່ງໄດ້ພົບເຫັນເດັກນ້ອຍທັງ 4 ຄົນຈາກນັ້ນກໍໄດ້ກັກຕົວເຈົ້າຂອງຮ້ານມາສອບສວນຈຶ່ງຮູ້ວ່າ: ຜູ້ກ່ຽວໄດ້ຮັບຄົນລາວມາເຮັດວຽກຢູ່ຮ້ານເສີມສວຍໂດຍໃຫ້ເງິນເດືອນ 1 ລ້ານກີບ ສ່ວນກິນຢູ່ພັກເຊົາແມ່ນຜູ້ກ່ຽວຮັບຜິດຊອບ, ແຕ່ໃນເວລາຮັບຄົນເຂົ້າມາເຮັດວຽກນັ້ນຜູ້ກ່ຽວບໍ່ໄດ້ໄປແຈ້ງຕໍ່ອຳນາດການປົກຄອງບ້ານ ຫຼື ພາກສ່ວນກ່ຽວຂ້ອງຮັບຮູ້ນຳ.
ຍ້ອນເຫດນີ້ເຈົ້າຂອງຮ້ານເສີມສວຍຈຶ່ງໄດ້ຈ້າງນາງຄຳຫຼ້າໃຫ້ຫາຄົນມາເຮັດວຽກໃນຮ້ານເສີມສວຍ ໂດຍຈະໃຫ້ຄ່າຈ້າງເປັນເງິນ, ຕໍ່ກັບເຫດການດັ່ງກ່າວເຈົ້າໜ້າທີ່ສາມາດນຳຕົວເດັກນ້ອຍທັງ 4 ຄົນຄືນມາໄດ້ ແລະ ໄດ້ມອບຄືນຜູ້ປົກຄອງແລ້ວ ສ່ວນ ນາງ ຄຳຫຼ້າ ແລະ ເຈົ້າຂອງຮ້ານເສີມສວຍ ທັງສອງ ຈອ່ງຖືກດຳເນີນຄະດີ ຕາມຂັ້ນຕອນຂອງກົດໝາຍ.