ອີງຕາມບົດລາຍງານທ່ານ ທອງພັດ ອິນທະວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ ໄດ້ລາຍງານ ຕໍ່ກອງປະຊຸມສະຫຼຸບການຈັດຕັ້ງປະຕິບັດແຜນພັດທະນາວຽກງານພະລັງງານ ແລະ ບໍ່ແຮ່ ປະຈຳປີ 2023 ແລະ ວາງທິດທາງແຜນການ 2024 ຈັດຂຶ້ນໃນລະຫວ່າງວັນທີ 21-22 ທັນວານີ້, ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ.
ການຜະລິດກະແສໄຟຟ້າ: ປະຕິບັດໄດ້ 48.904 ລ້ານກິໂລວັດໂມງ, ມີມູນຄ່າ 58.285 ຕື້ກີບ, ທຽບໃສ່ຜົນຜະລິດປີຜ່ານມາ ຫຼຸດລົງ 4% (ສາເຫດຍ້ອນສະພາບໄພແຫ້ງແລ້ງເຮັດໃຫ້ບາງແຫຼ່ງຜະລິດພະລັງງານນໍ້າບໍ່ສາມາດຜະລິດໄດ້ຕາມແຜນ), ທຽບໃສ່ມູນຄ່າ (45.070 ຕື້ກີບ) ເພີ່ມຂຶ້ນ 29% (ເນື່ອງຈາກອັດຕາແລກປ່ຽນໃນແຕ່ລະຊ່ວງ ແຕກຕ່າງກັນ).
ການຈໍາໜ່າຍກະແສໄຟຟ້າພາຍໃນປະເທດ: ປະຕິບັດໄດ້ 11.800 ລ້ານກິໂລວັດໂມງ, ມີມູນຄ່າ 765 ລ້ານ ໂດລາສະຫະລັດ, ທຽບໃສ່ຜົນຜະລິດປີຜ່ານມາ ເພີ່ມຂຶ້ນ 22%, ທຽບໃສ່ມູນຄ່າ ເພີ່ມຂຶ້ນ 36%.
ຈໍາໜ່າຍກະແສໄຟຟ້າໄປຕ່າງປະເທດ: ປະຕິບັດໄດ້ 38.106 ລ້ານກິໂລວັດໂມງ, ມີມູນຄ່າ 2.368 ລ້ານໂດລາສະຫະລັດ, ທຽບໃສ່ຜົນຜະລິດປີຜ່ານມາ ຫຼຸດລົງ 5%, ທຽບໃສ່ມູນຄ່າ ເພີ່ມຂຶ້ນ 0,4%, ທຽບໃສ່ແຜນການປີ 2023 ມະຕິສະພາ ປະຕິບັດໄດ້ 94%, ທຽບໃສ່ມູນຄ່າຂອງມະຕິສະພາ ປະຕິບັດໄດ້ 97%.
ນໍາເຂົ້າກະແສໄຟຟ້າຈາກຕ່າງປະເທດ: ປະຕິບັດໄດ້ 1.658 ລ້ານກິໂລວັດໂມງ, ມູນຄ່າ 110 ລ້ານໂດລາສະຫະລັດທຽບໃສ່ຜົນຜະລິດປີຜ່ານມາ ເພີ່ມຂຶ້ນ 90%, ທຽບໃສ່ມູນຄ່າ ເພີ່ມຂຶ້ນ 175% (ສາເຫດຍ້ອນສະພາບໄພແຫ້ງແລ້ງການຜະລິດພາຍໃນບໍ່ສາມາດປະຕິບັດໄດ້ຕາມແຜນ ແລະ ຄວາມຕ້ອງການຊົມໃຊ້ພາຍໃນເພີ່ມຂຶ້ນເປັນຕົ້ນແມ່ນ ເຂດເສດຖະກິດພິເສດ, ບິດຄອຍ ແລະ ທີ່ຢູ່ອາໄສ).
ທີ່ມາ: Lao youth