ໃນວັນທີ 23 ທັນວາ 2023 ຜ່ານມາ, ຄະນະຮັບຜິດຊອບຕິດຕາມ ກວດກາ ແລະ ແກ້ໄຂສຽງເນືອງນັນໃນທຸລະກິດຮ້ານອາຫານ ແລະ ຮ້ານບັນເທີງຢູ່ ນວ ຈຸທີ 4 ເຊິ່ງມີຂອບເຂດຮັບຜິດຊອບ 3 ເມືອງ ຄື: ສີໂຄດຕະບອງ ນາຊາຍທອງ ແລະ ສັງທອງ ນໍາໂດຍທ່ານ ພັນໂທ ອິນພອນ ບຸນພະຈັນ ຮອງຫົວໜ້າຫ້ອງສັນຕິບານ ປກສ ນວ ໄດ້ສືບຕໍ່ເຄື່ອນໄຫວຕິດຕາມ ກວດກາສະພາບຕົວຈິງຢູ່ບັນດາຮ້ານອາຫານ ແລະ ຮ້ານບັນເທີງເມືອງສີໂຄດຕະບອງ.
ໃນນີ້ໄດ້ລົງກວດກາຮ້ານກິນ-ດື່ມກຣີນບາ ຢູ່ບ້ານສີຖານເໜືອ ມີການເປີດບໍລິການສຽງເພງກາຍເວລາທີ່ກໍານົດ ຮ້ານກິນ-ດື່ມຄອນເທີນເນີແຄມຂອງ ບ້ານສີຖານເໜືອ ເປີດບໍລິການສຽງເພງກາຍເວລາທີ່ກໍານົດ ຮ້ານອາຫານທູຊິດເຕີ້ ບ້ານສີຖານເໜືອ ເປີດບໍລິການສຽງເພງກາຍເວລາທີ່ກໍານົດ ຮ້ານອາຫານເບຍແຄັມ ບ້ານດົງນາໂຊກ ເຊິ່ງຮ້ານດັ່ງກ່າວໄດ້ເຊົ່າສະຖານທີ່ເປີດແຄັມເບຍ ມີການເປີດບໍລິການສຽງເພງກາຍເວລາທີ່ກໍານົດ ສໍາລັບຮ້ານບັນເທີງ ທີຈີ ທ່ຽນກຸ່ງ ບ້ານດົງນາໂຊກ ຮ້ານອາຫານ 4 ເອື້ອຍນ້ອງ ແລະ ຮ້ານອາຫານແຄມຂອງເຈົ້າເກົ່າ ບ້ານສີຖານເໜືອ ແມ່ນບໍ່ພົບການລະເມີດ ມີການເປີດ-ປີດຕາມເວລາທີ່ກໍານົດໄວ້.
ສໍາລັບບັນດາຮ້ານທີ່ລະເມີດ ຄະນະຮັບຜິດຊອບໄດ້ເຮັດບົດບັນທຶກປັບໄໝຕາມລະບຽບ ພ້ອມທັງໄດ້ອອກໜັງສືເຊີນໃຫ້ເຈົ້າຂອງທຸລະກິດ ໄປເສຍຄ່າປັບໄໝຢູ່ກອງບັນຊາການ ປກສ ນວ ເຊິ່ງລະບຽບທີ່ກໍານົດໄວ້ແມ່ນຮ້ານອາຫານກາງແຈ້ງໃຫ້ປິດສຽງເພງ ປິດຮັບລູກຄ້າ ເວລາ 23:00 ໂມງ ແລະ ປິດຮ້ານເວລາ 24:00 ໂມງ ສ່ວນຮ້ານບັນເທີງ ໃຫ້ປິດສຽງເພງ ປິດຮັບລູກຄ້າ ເວລາ 24:00 ໂມງ ແລະ ປິດຮ້ານເວລາ 1:00 ໂມງ ໃນນີ້ລະເມີດລະບຽບການ ຄັ້ງທີ 1 ຈະກ່າວເຕືອນ ແລະ ປັບໄໝ ຄັ້ງທີ 2 ສັ່ງໃຫ້ຢຸດກິດຈະການ 1 ເດືອນ ພ້ອມທັງຍຶດເຄື່ອງສຽງ ແລະ ຕິດປ້າຍປະກາດຮ້ານຜິດກົດໝາຍ ສ່ວນຄັ້ງທີ 3 ຈະລົບລ້າງໃບອະນຸຍາດດໍາເນີນທຸລະກິດ.
ທີ່ມາ: ວຽງຈັນໃໝ່