ແຂວງໄຊຍະບູລີ ຈະຈັດງານມະຫະກໍາບຸນຊ້າງຄັ້ງທີ 17 ພ້ອມກັບການເປີດປີທ່ອງທ່ຽວລາວ 2024 ຂອງແຂວງຢ່າງເປັນທາງການໃນລະຫວ່າງວັນທີ 12-18 ກຸມພາ ປີ 2024, ແຕ່ປັດຈຸບັນ ຄະນະກໍາມະການຈັດງານຍັງບໍ່ທັນໄດ້ລະບຸຢ່າງຈະແຈ້ງເທື່ອວ່າຈະມີຊ້າງເຂົ້າຮ່ວມຫລາຍ ຫລື ໜ້ອຍເທົ່າໃດ.
ສຳລັບງານມະຫະກຳບຸນຊ້າງ ແມ່ນໜຶ່ງໃນ 12 ກິດຈະກໍາທີ່ຕິດພັນກັບປີທ່ອງທ່ຽວລາວ2024 ຂອງແຂວງໄຊຍະບູລີ ແລະ ຖືເປັນກິດຈະກໍາລະດັບຊາດ ແລະ ກິດຈະກໍາຕົ້ນຕໍພາຍໃນງານ ມີຄື:
- ວັນທີ 12 ກຸມພາ 2024 ເປີດງານຕະຫຼາດນັດວາງສະແດງສິນຄ້າທັງພາຍໃນ ແລະ ຕ່າງປະເທດ, ຕອນຄໍ່າຂອງວັນທີ 12-13 ກຸມພາ ມີການສະແດງສິນລະປະວັນນະຄະດີ.
- ວັນທີ 14-15 ກຸມພາ 2024 ຊ້ອມໃຫຍ່ຂະບວນແຫ່ກ້ອນສະແດງຕ່າງໆ ໃນພິທີເປີດງານ, ຕອນຄໍ່າວັນທີ 14 ກຸມພາ ມີການແຂ່ງຂັນປະກວດນັກຮ້ອງສຽງດີ ແລະ ດົນຕີພື້ນເມືອງ ແລະ ຕອນຄໍ່າຂອງວັນທີ 15 ກຸມພາ ປະກວດນາງສາວງາມທິດາບຸນຊ້າງ.
- ວັນທີ 16 ກຸມພາ 2024 ພິທີຕັກບາດອຸທິດສ່ວນກຸສົນໃຫ້ຊ້າງ ແລະ ຕອນຄໍ່າແຂ່ງຂັນຕີກອງຫາງ
- ວັນທີ 17 ກຸມພາ 2024 ເປີດງານມະຫະກໍາບຸນຊ້າງ ແລະ ເປີດປີທ່ອງທ່ຽວລາວ 2024 ຢູ່ແຂວງໄຊຍະບູລີ ຢ່າງເປັນທາງການ ແລະ ຊົມການສະແດງໂດດຈ້ອງ.
- ວັນທີ 18 ກຸມພາ 2024 ສືບຕໍ່ກິດຈະກໍາທີ່ຕິດພັນກັບຊ້າງ ແລະ ການອະນຸລັກຊ້າງ ໂດຍສະເພາະການສະ ແດງຂອງຊ້າງຄຳຮູ້, ການໃຫ້ອາຫານຊ້າງ, ການບໍລິການຂີ່ຊ້າງ, ການສະແດງສິລະປະວັນນະຄະດີ ແລະ ຕອນຄໍ່າຊົມການສະແດງກາຍຍະສິນຈາກກອງກາຍຍະສິນແຫ່ງຊາດ.
ສໍາລັບກິດຈະກຳປິ່ນອ້ອມ ລວມມີ: ວັນທີ 12 ກຸມພາ 2024 ມີການຍ່າງເພື່ອການກຸສົນ ຈາກເດີ່ນກິລາຮົ່ມຂອງແຂວງ ຫາ ເດີ່ນສະໜາມຫຼວງ ຫາ ສະຖານທີ່ຈັດງານຕະຫຼາດນັດ (ໃນມື້ເປີດງານຕະຫຼາດນັດ) ແລະ ວັນທີ 14 ກຸມພາ ຈະມີການແຂ່ງຂັນກິລາຟຸດຊໍ, ສ່ວນກິດຈະກໍາດ້ານການທ່ອງທ່ຽວ ມີຄື: ກາບໄຫວ້ບູຊາວັດສີບຸນເຮືອງ (ບ້ານໃຫຍ່), ຫໍຫຼັກເມືອງ ແລະ ວັດພູທອກ, ທ່ຽວຊົມສູນອະນຸລັກຊ້າງລາວ (ອ່າງນ້ຳຕຽນ), ສູນອະນຸລັກ ແລະ ຂະຫຍາຍພັນຊ້າງອາຊີ (ຢູ່ພູແຄນ) ແລະ ມູນນິທິອະນຸລັກສັດ ແລະ ສິ່ງແວດລ້ອມລາວ (ບ້ານນາຕໍໃຫຍ່), ຢ້ຽມຊົມຫໍສະໝຸດຊ້າງ ແລະ ກິດຈະກຳອະນຸລັກຊ້າງຢູ່ສູນອະນຸລັກຊ້າງນໍ້າຕຽນ, ນອກຈາກນີ້ຍັງມີກິດຈະກໍາແຂ່ງຂັນແຕ້ມຮູບ ແລະ ພັດກ໋ອບເພື່ອສ້າງທັກສະ ແລະ ສ້າງຈິດສໍານຶກກ່ຽວກັບຊ້າງ ໃຫ້ເຍົາວະຊົນ, ຊາວໜຸ່ມ ຢູ່ສະໜາມຊ້າງນ້ອຍກ໋ອບ. ພ້ອມກັນນີ້ ໄດ້ມີຄວາມພ້ອມບໍລິການເຕັ້ນນອນຢູ່ແຄມນໍ້າຮຸ່ງສໍາລັບນັກທ່ອງທ່ຽວ ແລະ ຂີ່ເຮືອຊົມວິວນ້ຳຂອງ (ບ້ານທ່າເດື່ອ).
ທີ່ມາ: Lao Youth