ໃນຕອນບ່າຍ ວັນທີ 13 ທັນວາ 2023 ທີ່ສຳນັກງານນາຍົກລັດຖະມົນຕີ (ສນຍ) ໄດ້ຈັດພິທີມອບ-ຮັບລົດເມຊ່ວຍເຫຼືອລ້າ ຈາກບໍລິສັດ ບູຢອງລາວ ຈຳກັດ ໃຫ້ແກ່ລັດຖະບານ ແຫ່ງ ສປປ ລາວ ຈໍານວນ 600 ຄັນ ໂດຍການໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແລະ ພາກສ່ວນອື່ນທີ່ກ່ຽວຂ້ອງ.
[metaslider id=”150167″]
ດຣ. ລີ ຈຸງ ກຶນ, ປະທານກຸ່ມບໍລິສັດ ບູຢອງ ແມ່ນນັກລົງທຶນຈາກ ສ. ເກົາຫຼີ ທີ່ໄດ້ມາລົງທຶນຢູ່ ສປປ ລາວ ເປັນເວລາຫຼາຍປີ ແລະ ປະກອບສ່ວນທຶນຮອນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ລວມມູນຄ່າການຊ່ວຍເຫຼືອທັງໝົດ ນັບແຕ່ປີ 2006 ເປັນຕົ້ນມາ ປະມານ 30 ລ້ານກວ່າໂດລາສະຫະລັດ ເປັນຕົ້ນ: ໄດ້ຊ່ວຍສ້າງໂຮງຮຽນປະຖົມ ຈໍານວນ 300 ຫຼັງ; ຊ່ວຍເຫຼືອກະດານດຳ ໃຫ້ບັນດາໂຮງຮຽນ ຈຳນວນ 30.000 ແຜ່ນ; ຊ່ວຍເຫຼືອເຄື່ອງນຸ່ງຫົ່ມ ແລະ ເກີບ 950 ກວ່າໂຕນ; ມອບລົດເມໃຫ້ລັດຖະບານລາວ ຈໍານວນ 600 ຄັນ ແລະ ອື່ນໆ.
ສະເພາະລົດເມ ຈຳນວນ 600 ຄັນ ທີ່ມອບຊ່ວຍເຫຼືອລ້າໃນຄັ້ງນີ້ ມີມູນຄ່າທັງໝົດ 11.077.200 ໂດລາສະຫະລັດ; ໃນນີ້, ປີ 2023 ໄດ້ມອບ ຈໍານວນ 300 ຄັນ ແລະ ສ່ວນທີ່ເຫຼືອ ຈໍານວນ 300 ຄັນ ແມ່ນຈະສືບຕໍ່ນຳມາມອບໃນປີ 2024.
ຂ່າວ ແລະ ພາບ: ກົມປະຊາສຳພັນ ຫສນຍ