ໃນຕອນເຊົ້າຂອງມື້ນີ້ ວັນທີ 14 ທັນວາ 2023, ຜູ້ໃຊ້ເຟສບຸກທ່ານໜຶ່ງໄດ້ເຜີຍແຜ່ ຄຣິບວີດີໂອການໃຊ້ຄວາມຮຸນແຮງຕໍ່ເດັກ ຢູ່ໂຮງຮຽນແຫ່ງໜຶ່ງໃນນະຄອນປາກເຊ, ແຂວງຈຳປາສັກ. ຫຼັງຈາກນັ້ນ, ຜູ້ໃຊ້ສື່ອອນລາຍຫຼາຍຄົນກໍເຂົ້າມາສະແດງຄວາມຄິດເຫັນບໍ່ພໍ່ໃຈຕໍ່ການກະທຳດັ່ງກ່າວ.
ເຊິ່ງໃນຄຣິບວີດີໂອ ແມ່ນສາວຄູໄດ້ສອນຄຳສັບໃຫ້ເດັກ ແຕ່ບໍ່ດົນສາວຄູກໍໄດ້ໃຊ້ເຈ້ຍຄຳສັບຈຳນວນຫຼາຍໃບຊ້ອນກັນຟາດໃສ່ຫົວເດັກດ້ວຍຄວາມແຮງ ເຮັດໃຫ້ເດັກເກືອບຫງ່າຍ. ພາບດັ່ງກ່າວເຮັດໃຫ້ຫົວອົກຜູ້ເປັນພໍ່ແມ່ ແລະ ຜູ້ໃຊ້ສື່ສັງຄົມອອນລາຍທີ່ເຫັນພາບແມ່ນອີ່ຕົນເດັກ ແລະ ບໍ່ພໍໃຈຢ່າງທີ່ສຸດ ພ້ອມຮຽກຮ້ອງໃຫ້ໂຮງຮຽນມີການກວດສອບ ແລະ ລົງໂທດສາວຄູດັ່ງກ່າວຕາມລະບຽບ.
ຫຼ້າສຸດ, ໃນຕອນບ່າຍຂອງມື້ດຽວກັນ ທາງໂຮງຮຽນກໍໄດ້ອອກມາຊີ້ແຈງ ພ້ອມຂໍໂທດສຳລັບເລື່ອງທີ່ເກີດຂຶ້ນ ແລະ ໄດ້ລົງໂທດໂດຍໃຫ້ຢຸດການສິດສອນໃນໂຮຮຽນ (ໄລ່ອອກ) ແລະ ສາວຄູດັ່ງກ່າວ ກໍໄດ້ອອກມາຂໍໂທດ ແລະ ຍອມຮັບຜິດໃນການກະທຳຂອງຕົນ.
ຢ່າງໃດກໍຕາມ, ການກະທຳຜິດດັ່ງກ່າວແມ່ນເປັນພຽງຄວາມຜິດບຸກຄົນ ເພາະຄູອາຈານຫຼາຍໆຄົນກໍຮັກໃນອາຊີບຄູ, ຮັກໃນການສິດສ່ອນ ແລະ ຮັກເດັກນ້ອຍຂອງຕົນເອງ.
ຫວັງວ່າເຫດການນີ້ຈະເປັນຄວາມຜິດພາດສຸດທ້າຍ ແລະ ຈະບໍ່ເກີດຂຶ້ນອີກ.