ໃນວັນທີ 6 ພະຈິກ 2023 ທີ່ຜ່ານມາ ທາງກອງບັນຊາການ ປກສ ເມືອງເມິງ ແຂວງບໍ່ແກ້ວ ໄດ້ຮັບແຫຼ່ງຂ່າວຈາກພົນລະເມືອງດີວ່າ: ຈະມີການເຄື່ອນໄຫວ ຂົນສົ່ງຢາເສບຕິດແຕ່ເຂດບ້ານຜາດຳ ຫາ ບ້ານຊຽງດາວ ແລ້ວຈະຂົນສົ່ງຜ່ານເທດສະບານເມືອງເມິງ. ຈາກນັ້ນ, ກອງບັນຊາການ ປກສ ເມືອງເມິງ ຈຶ່ງໄດ້ແຕ່ງຕັ້ງເຈົ້າໜ້າທີ່ວິຊາສະເພາະ ລົງສົມທົບກັບ ປກສ ກຸ່ມບ້ານຊຽງດາວ ເພື່ອເຮັດໜ້າທີ່ເຄື່ອນໄຫວສະກັດກັ້ນ ແລະ ຕັ້ງຈຸດກວດກາຢູ່ເຂດບ້ານມອນແຫຼມ ເມືອງເມິງ ແຂວງບໍ່ແກ້ວ, ມາຮອດເວລາປະມານ 22:00 ໂມງ ໄດ້ມີລົດກະບະ ວີໂກແຄັບ ສີປອນ ໝາຍເລກທະບຽນ ກກ 6264 ບໍ່ແກ້ວ ແລ່ນມາແຕ່ທາງບ້ານປຸງຈອມແສງ ມຸ້ງໜ້າມາບ້ານມອນແຫຼມ, ທາງເຈົ້າໜ້າທີ່ກໍ່ໄດ້ສັນຍານໃຫ້ຈອດລົດ ແຕ່ພວກກ່ຽວ ມີປະມານ 7-8 ຄົນ ໄດ້ຢຸດລົດ ແລ້ວພາກັນເອົາຕົວລົບໜີເຂົ້າໄປໃນປ່າ, ສວ່ນລົດວີໂກອີກຄັນໜຶ່ງທີ່ຂັບມາຕາມຫຼັງແມ່ນໄດ້ລ້ຽວກັບຄືນ ທາງເຈົ້າໜ້າທີ່ແມ່ນໄດ້ໄລ່ຕາມແຕ່ບໍ່ທັນ.
ຜ່ານການກວດຄົ້ນລົດວີໂກແຄັບ ສີປອນ ໝາຍເລກທະບຽນ 6264 ບໍ່ແກ້ວ ແມ່ນບໍ່ພົບສິ່ງຜິດກົດໝາຍ, ຕົກມາຮອດຕອນເຊົ້າເວລາປະມານ 4:00 ໂມງ ຂອງວັນທີ 7 ພະຈິກ 2023 ເຈົ້າໜ້າທີ່ຈຶ່ງສາມາດກັກຕົວຜູ້ຕ້ອງສົງໄສ ໄດ້ 1 ຄົນຊື່ທ້າວ ເຢຍຕົວ ຢາງ ອາຍຸ 33 ປີ ອາຊີບເຮັດນາ ເຊື້ອຊາດລາວ ສັນຊາດລາວ ຊົນເຜົ່າມົ້ງ ປັດຈຸບັນ ຢູ່ບ້ານນໍ້າປອງ ເມືອງຫ້ວຍຊາຍ ແຂວງບໍ່ແກ້ວ.
ນອກນີ້ກໍໄດ້ພົບເຫັນລົດວີໂກ ສະມາດແຄັບ ບໍ່ມີປ້າຍທະບຽນ ຈຳນວນ 1 ຄັນ ຈອດຢູ່ກາງທົ່ງນາ ເຂດບ້ານຊຽງດາວ ແຕ່ບໍ່ພົບເຫັນສິ່ງທີ່ຜິດກົດໝາຍ.
ຕົກມາຮອດວັນທີ 8 ພະຈິກ 2023 ທາງເຈົ້າໜ້າທີ່ທະຫານ ແລະ ປກສ ເມືອງເມິງ ໄດ້ລົງກວດກາລາດຕະເວນຕາມຂອບເຂດສະຖານທີ່ເກີດເຫດເຂດສວນຢາງພາລາ ຈຶ່ງໄດ້ພົບເຫັນຢາເສບຕິດ ປະເພດຢາບ້າ ຈໍານວນ 8 ເປົາ ລວມມີ 800 ມັດ ເທົ່າກັບ 1.600.000 ເມັດ.
ດັ່ງນັ້ນ, ທາງເຈົ້າໜ້າທີ່ຈຶ່ງໄດ້ກັກຕົວທ້າວຜູ້ກ່ຽວ ພ້ອມດ້ວຍຂອງກາງລົດກະບະວີໂກແຄັບ ແລະ ຢາເສບຕິດຈໍານວນດັ່ງກ່າວ ໄວ້ເພື່ອດໍາເນີນການສືບສວນ-ສອບສວນຂະຫຍາຍຜົນຫາພັກພວກກຸ່ມແກ້ງດັ່ງກ່າວ ມາດໍາເນີນຄະດີຕາມລະບຽບກົດໝາຍຕໍ່ໄປ.
ແຫຼ່ງຂ່າວ ຂ່າວ ປກສ ແຂວງບໍ່ແກ້ວ