ອໍານາດການປົກຄອງແຂວງຈໍາປາສັກ ໄດ້ກະກຽມຫຼາຍກິດຈະກໍາເພື່ອປີທ່ອງທ່ຽວລາວ 2024 ໂດຍສະເພາະຈັດງານບຸນສົມໂພດຕົ້ນໄມ້ມະນີໂຄດ; ງານບຸນນະມັດສະການພຣະທາດ ສາມປາງ; ງານບຸນນະມັດສະການຜະສາດຫີນວັດພູຈໍາປາສັກ ມໍລະດົກໂລກ ແຫ່ງທີ 2 ຂອງ ສປປ ລາວ; ງານບຸນມະໂຫລານກາເຟ - ຊາ ບໍລະເວນ; ຜະລິດຕະພັນທີ່ລະນຶກປີທ່ອງທ່ຽວລາວ 2024.
ນອກນີ້ ກໍຍັງມີການຄຸ້ມຄອງການຮັກສາອະນາໄມ ແລະ ຄວາມສະອາດສວຍງາມພາຍໃນນະຄອນປາກເຊ ປັບປຸງຄິວລົດຂົ່ນສົ່ງໂດຍສານລວມສູນ, ການຄຸ້ມຄອງລົດບໍລິການ, ປ້າຍບອກທາງ ຕິດພັນກັບການທ່ອງທ່ຽວ ແລະ ອື່ນໆ.
ກ່ຽວກັບການກະກຽມກິດຈະກໍາດັ່ງກ່າວນີ້, ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງຈໍາປາສັກ ຮ່ວມກັບ ຄະນະຮັບຜິດຊອບຈັດກິດຈະກໍາປີທ່ອງ ທ່ຽວລາວ 2024 ໄດ້ຈັດກອງປະຊຸມຄົ້ນຄວ້າປຶກສາຫາລື ເມື່ອມໍ່ໆມານີ້ຢູ່ຫ້ອງວ່າການແຂວງ ໂດຍໃຫ້ກຽດເປັນປະທານຂອງ ທ່ານ ປອ.ວິໄລວົງ ບຸດດາຄໍາ ເຈົ້າແຂວງຈຳປາສັກ.
ແຫຼ່ງຂ່າວ ໜັງສືພິມວຽງຈັນທາຍ