ໂຈນປຸ້ນຊັບຄັ້ງໃຫຍ່ໃນເວລາຕິດຕໍ່ກັນ 2 ມື້ ກັບເຮືອນ 2 ຫຼັງ ເຂດບ້ານດອນໜູນ ເມືອງໄຊທານີ ນະຄອນຫຼວງວຽງຈັນ.

ຜູ້ໃຊ້ເຟສບຸກຊື່ Phouthasack Lou ໄດ້ໂພສວ່າ: ໃນວັນທີ 7 ທັນວາ 2023 ເວລາ 1:37 ໂມງເຊົ້າມືດ ໄດ້ມີຄົນຮ້າຍບຸກເຂົ້າປຸ້ນຊັບສິນທີ່ເຮືອນປະຊາຊົນຢູ່ບ້ານດອນໜູນ ເມືອງໄຊທານີ ນະຄອນຫຼວງວຽງຈັນ ລວມມູນຄ່າຄວາມເສຍຫາຍເຄື່ອງປະດັບເພັດ, ກະເປົາ-ເຄື່ອງຂອງແບນເນມ ມູນຄ່າຫຼາຍກວ່າ 20.000 ໂດລາສະຫະລັດ.

ເຊິ່ງທາງຜູ້ເສຍຫາຍຄົນນີ້ກໍໄດ້ຕັ້ງລາງວັນນຳຈັບເຖິງ 50 ລ້ານກີບ.

ຕໍ່ມາໃນວັນທີ 8 ທັນວາ 2023 ກໍມີເຫດການໃກ້ຄຽງກັນນີ້ ໂດຍ Lar noi Taiourane ກໍໂພສວ່າ: ໂຈນຂຶ້ນເຮືອນລັກຊັບສິນເຮືອນ ຢູ່ບ້ານໄຊ (ຂົງເຂດດອນໜູນ) ເມືອງໄຊທານີ ນະຄອນຫຼວງວຽງຈັນ ກໍລະນີນີ້ແມ່ນຊັບສິນເສຍຫາຍມີຄຳ 60 ບາດ ແລະ ເງິນສະກຸນຕ່າງໆອີກຈຳນວນຫຼາຍ ທັ້ງນີ້ ໂຈນຍັງໄດ້ເອົາງັດເອົາກາດເກັບຄວາມຈຳກ້ອງວົງຈອນປິດອອກ ເຮັດໃຫ້ບໍ່ມີພາບທີ່ເປັນລັກຖານຂອງໂຈນ.

ເຫດການດັ່ງກ່າວ ທາງຜູ້ເສຍຫາຍຕັ້ງລາງວັນນຳຈັບ ຫຼາຍເຖິງ 200 ລ້ານກີບ.

ຈາກເຫດການທັງ 2 ເຫດການທີ່ມີໂຈນຂຶ້ນເຮືອນ 2 ມື້ລຽນຕິດ ແລະ ເຂົ້າປຸ້ນຊັບໃນຂົງເຂດບ້ານໃກ້ກັນ ຈຶ່ງເຮັດໃຫ້ຫຼາຍຄົນສັນນິຖານວ່າທັງສອງເຫດການອາດເປັນໂຈນກຸ່ມແກ້ງດຽວກັນທີ່ເຂົ້າມາປຸ້ນຊັບ.

ຢ່າງໃດກໍຕາມ ກໍຂໍໃຫ້ເຈົ້າໜ້າທີ່ຕຳຫຼວດສືບສວນ-ສອບສວນ ແລະ ຈັບຄົນຮ້າຍໄດ້ໂດຍໄວ.