ວັນທີ 1 ທັນວາ 2023 ຜ່ານມາ, ທີ່ຫ້ອງການກະສິກຳ ແລະ ປ່າໄມ້ເມືອງຍົມມະລາດ ແຂວງຄຳມ່ວນ ໄດ້ຈັດພິທີທຳລາຍສັດປ່າທີ່ຢຶດມາໄດ້ຕາມທ້ອງຕະຫຼາດ ໃຫ້ກຽດເຂົ້າຮ່ວມໂດຍທ່ານ ບຸນທະໄຫວ ໂດໄລສານ ຮອງເຈົ້າເມືອງໆຍົມມະລາດ, ທ່ານ ພົມມາ ຈັນທະວົງ ຫົວໜ້າຫ້ອງການກະສິກຳ ແລະ ປ່າໄມ້ເມືອງ, ມີບັນດາທ່ານຫົວໜ້າຫ້ອງການອ້ອມຂ້າງເມືອງ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.
ເຊິ່ງໜ່ວຍງານກວດປ່າໄມ້ ຫ້ອງການກະສິກຳ ແລະ ປ່າໄມ້ເມືອງ ໄດ້ລົງກວດກາ ຕະຫຼາດບ້ານໂຄກສະຫວ່າງ ເມືອງຍົມມະລາດ ແຂວງຄຳມ່ວນ ຜົນການກວດກາໄດ້ພົບເຫັນການລັກລອບຊື້ – ຂາຍສັດປ່າຄຸ້ມຄອງ ແລະ ສັດປ່າສະຫງວນທີ່ຜິດຕໍ່ລະບຽບກົດໝາຍ ສັດນ້ຳ – ສັດປ່າ ທັງວາງຂາຍ ແລະ ຊຸກເຊື່ອງຢູ່ກ້ອງໂຕະ ຈຳນວນ 88 ໂຕ ມີນ້ຳໜັກລວມທັງໝົດ 114,1 ກິໂລກຼາມ ເຊິ່ງປະກອບມີ: ກະຮອກ ຈໍານວນ 19 ໂຕ ມີນ້ຳໜັກຈຳນວນ 5,8 ກິໂລ, ອົ້ນ ຈຳນວນ 2 ໂຕ ນ້ຳໜັກ 2 ກິໂລ, ເຫງັນ ຈໍານວນ 4 ໂຕ ມີນ້ຳໜັກຈຳນວນ 4,7 ກິໂລ, ໜູຫວາຍ ຈຳນວນ 12 ໂຕ ມີນ້ຳໜັກຈຳນວນ 4,9 ກິໂລ, ບ່າງລົ້ວ ຈຳນວນ 27 ໂຕ ມີນ້ຳໜັກຈຳນວນ 53,2 ກິໂລ, ຂາດາງ ຈໍານວນ 2 ໂຕ ມີນ້ຳໜັກຈຳນວນ 3 ກິໂລ, ຂະຍຸ 8 ໂຕ ມີນ້ຳໜັກຈຳນວນ 3,5 ກິໂລ, ນົກຫອນຈຸກ 14 ໂຕ, ຊີ້ນສ່ວນໝູປ່າ ຈຳນວນ 36 ກິໂລ ແລະ ຊີ້ນຟານຈໍານວນໜຶ່ງ.
ລວມມີນ້ຳໜັກທັງໝົດ 114,1 ກິໂລ ສ່ວນເຈົ້າຂອງສັດປ່າແມ່ນໄດ້ເອົາຕົວຫລົບໜີໄປ ຫຼັງຈາກນັ້ນ, ທາງໜ່ວຍງານປ່າໄມ້ ກໍ່ໄດ້ເຮັດບົດບັນທຶກອາຍັດໄວ້ ແລະ ນຳມາເກັບຮັກສາໄວ້ທີ່ຫ້ອງການກະສິກຳ ແລະ ປ່າໄມ້ເມືອງ. ຫຼັງຈາກນັ້ນ, ໃນວັນທີ 1 ທັນວາ 2023 ທາງຫ້ອງການກະສິກຳ ແລະ ປ່າໄມ້ເມືອງ ກໍ່ໄດ້ຈັດພິທີທຳລາຍ ຊິ້ນສ່ວນສັດທີ່ຢຶດມາໄດ້ແມ່ນນຳມາທຳລາຍດ້ວຍວິທີການຝັງດິນ.
ທີ່ມາ: Media Laos