ບຸນທາດຫຼວງປີ 2023 ມີປະກົດການຫຍໍ້ທໍ້ເກີດຂຶ້ນ 19 ເລື່ອງ

0
1137

ເຈົ້າໜ້າທີ່ຈຸງານສືບສວນ-ສອບສວນຄະດີອາຍາ ສັງລວມແກ້ໄຂເຫດສຸກເສີນກໍລະນີຕ່າງໆ ທີ່ເກີດຂຶ້ນພາຍໃນບຸນນະມັດສະການພຣະທາດຫຼວງວຽງຈັນ ປີ 2023 ເລີ່ມແຕ່ວັນທີ 23-27 ພະຈິກນີ້, ໄດ້ສະຫຼຸບສັງລວມເຫດການປາກົດການຫຍໍ້ທໍ້ເກີດຂຶ້ນ ຈໍານວນ 19 ເລື່ອງ. ໃນນີ້, ແຫກກະເປົາ 6 ເລື່ອງ, ກະເປົາເສຍ 1 ເລື່ອງ ລວມຜົນເສຍຫາຍມີ ເງິນ 31.100.000 ກີບ, 220 ໂດລາ, 7.300 ບາດ, ຄຳຮູບປະພັນໜັກ 3 ບາດ ກັບ 5 ຫຸນ ແລະ ໂທລະສັບ ຈຳນວນ 5 ເຄື່ອງ.

ເຈົ້າໜ້າທີ່ໃຫ້ຂໍ້ມູນວ່າ: ໃນວັນທີ 23 ພະຈິກ 2023, ເຈົ້າໜ້າທີ່ໄດ້ຢືດໂດຼນ ຈໍານວນ 2 ລໍາ ໂດຍເກັບຮັກສາໄວ້ ທີ່ກອງບັນຊາການທະຫານ ນະຄອນຫຼວງວຽງຈັນ ເປັນຜູ້ເກັບຮັກສາໄວ້ ແລະ ໃນເວລາ 22:30 ໂມງ ໄດ້ມີໄວລຸ້ນຊາຍ ຈໍານວນ 5 ຄົນ ໄດ້ກໍ່ເຫດອາລະວາດຕີກັນຢູ່ທີ່ງານນະມັດສະການບຸນພະທາດຫຼວງ; ຕໍ່ກັບພວກກ່ຽວ 5 ຄົນ ແມ່ນໄດ້ຝາກຂັງໄວ້ຄ້າຍຄຸມຂັງຊົວຄາວ ຫ້ອງຕໍາຫຼວດ ປກສ ນະຄອນຫຼວງວຽງຈັນ.

ເວລາປະມານ 19:40 ໂມງ, ຄົນຮ້າຍໄດ້ໃຊ້ມີດແຫກກະເປົາຂອງແມ່ຍິງ ອາຍຸ 58 ປີ ບ້ານໂພນຄໍາ ເມືອງໄຊທນີ ທີ່ມາທ່ຽວບຸນ ຜົນເສຍຫາຍເງິນ 700.000 ກີບ, 220 ໂດລາສະຫະລັດ, ສາຍແຂນ 1 ເສັ້ນ ນ້ຳໜັກ 2 ສະຫຼຶງ ແລະ ສາຍຄໍຄໍາ 1 ເສັ້ນ ນ້ຳໜັກ 2 ສະຫຼຶງ ພ້ອມດ້ວຍປື້ມບັນຊີທະນາຄານ 4 ຫົວ.

ເວລາ 19:00 ໂມງ ຄົນຮ້າຍໄດ້ໃຊ້ມີດແຫກກະເປົາແມ່ຍິງຄົນໜຶ່ງທີ່ບ້ານໜອງແຕ່ງເໜືອ ເມືອງສີໂຄດຕະບອງ, ເຊິ່ງຖືກແຫກກະເປາຈາກທາງຫຼັກຢູ່ບໍລິເວນບຸດກະເຟດາວຄໍາ ຜົນເສຍຫາຍໂທລະສັບຊໍາຊຸງ A27 ຈໍານວນ 1 ເຄື່ອງ.

ໃນເວລາປະມານ 19:00 ໂມງ, ແມ່ຍິງ ອາຍຸ 42 ປີ ຢູ່ບ້ານນາຫວ້າ ເມືອງທຸລະຄົມ ແຂວງວຽງຈັນ ໄດ້ມາທ່ຽວບຸນທາດຫຼວງ. ພໍຍ່າງມາຮອດບໍລິເວນສະພາ ສັງເກດເບິ່ງກະເປົາວ່າຜິດປົກກະຕິ ຈຶ່ງໄດ້ເປີດເບິ່ງພົບວ່າ ເງິນ 3.600.000 ກີບ, ໂທລະສັບ 1 ເຄື່ອງ ແລະ ບັດ ຖືກຄົນຮ້າຍລ່ວງໄປ.

ໃນວັນທີ 27 ພະຈິກ 2023, ເປັນຄືນວຽນທຽນ ຄືນດັ່ງກ່າວມີປະກົພການຫຍໍ້ທໍ້ເກີດຂຶ້ນ 4 ເລື່ອງ. ໃນນີ້, ມີເຫດການຄົນຮ້າຍແຫກກະເປົາ 3 ເລື່ອງ ແລະ ລັກຊັບ 1 ເລື່ອງຄື:

ໃນເວລາປະມານ 17:30 ໂມງ, ແມ່ຍິງ ອາຍຸ 53 ປີ ຢູ່ບ້ານບຶງກາງ ເມືອງຄົງເຊໂດນ ແຂວງສະລະວັນ ໄດ້ມາທ່ຽວບຸນທາດຫຼວງກັບຫຼານຊາຍ. ພໍຍ່າງມາຮອດໜ້າສະພາແຫ່ງຊາດ ໃນຂະນະທີ່ຈົກເງິນຈ່າຍຄ່າສີ້ນໄໝພົບວ່າ ກະເປົາຂອງຜູ້ກ່ຽວຖືກຂອງມີຄົມແຫກຍາວ 1 ຄືບ ຜົນເສຍຫາຍ ມີເງິນ 4.300.000 ກີບ, 7.300 ບາດ, ຄໍາຮູບ ປະພັນ ນ້ຳໜັກ 2 ບາດ, ຕິບນວດເງິນ 2 ອັນ (ຂອງເກົ່າ).

ໃນເວລາ 17:30 ໂມງ, ແມ່ຍິງ ອາຍຸ 42 ປີ ບ້ານໜອງພະຍາ ເມືອງໄຊທານີ ໄດ້ມາທ່ຽວບຸນທາດຫຼວງກັບຄອບຄົວ ພໍຍ່າງມາຮອດໜ້າສະພາແຫ່ງຊາດ ແລະ ມາຊື້ເຄື່ອງຢູ່ຮ້ານຜ້າໄໝ ກຳລັງຈົກເງິນຈ່າຍ ພົບວ່າກະເປົາຖືກ ແຫກຍາວປະ ມານຄືບໜຶ່ງ ຜົນເສຍຫາຍເງິນ 500.000 ກີບ.

ໃນເວລາ 18:30 ໂມງ, ແມ່ຍິງ ອາຍຸ 56 ປີ ບ້ານໂພນປ່າເປົ້າ ເມືອງສີສັດຕະນາກ ໄດ້ແຫ່ຜະສາດເຜິ້ງໄປທີ່ກົມມະລຽນພຣະທາດຫຼວງ. ຈາກນັ້ນ, ໄດ້ຂຶ້ນໄປໄຫວ້ພຣະທາດ, ໄຕ້-ທູບທຽນບູຊາຢູ່ທາງຂຶ້ນ ໄດ້ວາງກະເປົາໄວ້ ພາຍຫຼັງໄຫວ້ພຣະທາດແລ້ວ ພົບວ່າບໍ່ເຫັນກະເປົາ ຜົນເສຍຫາຍ ເງິນ 8 ລ້ານກີບ, ໂທລະສັບໄອໂພນ 1 ເຄື່ອງ. ໃນເວລາຕໍ່ມາ,ມີຄົນເກັບໂທລະສັບ ແລະ ກະເປົາມາຄືນ.

ເວລາປະມານ 20:30 ໂມງ, ນັກສຶກສາຍິງ ອາຍຸ 20 ປີ ພັກເຊົາ ຢູ່ບ້ານນາແຖ ເມືອງໄຊທານີ ໄດ້ມາທ່ຽວບຸນທາດຫຼວງກັບໝູ່ 3 ຄົນ, ພໍຍ່າງມາຮອດໜ້າສະພາແຫ່ງຊາດ ບ່ອນສາຍຮູບເງົາ ແລະ ຍ່າງມາຮອດໜ້າຮູບປັ້ນເຈົ້າໄຊເສດຖາ ພົບວ່າ ກະເປົາຂອງຜູ້ກ່ຽວຖືກແຫກ ຜົນເສຍຫາຍ ເງິນ 3.000.000 ກີບ, ຕຸ້ມຫູຄໍາ 5 ຫຸນ ແລະ ກະເປົາໃສ່ເງິນ 1 ໜ່ວຍ.

ນອກນັ້ນ, ກໍຍັງມີເຫດການລວນລາມ, ນໍາລູກປືນອັດເຈ້ຍເຂົ້າມາໃນງານບຸນ ເຈົ້າ ໜ້າທີ່ໄດ້ສຶກສາອົບຮົມກ່າວເຕືອນ ແລະ ປ່ອຍຕົວ. ຈາກນັ້ນ, ກໍໄດ້ເກີດມີການພັດຫຼົງກັນໃນງານບຸນເປັນຈໍານວນຫຼາຍ. ເຈົ້າໜ້າທີ່ຮັບຜິດຊອບ ກໍໄດ້ປະກາດຫາຍາດພີ່ນ້ອງມາຮັບສໍາເລັດ.

ເວລາປະມານ 13:30 ໂມງ, ເຈົ້າໜ້າທີ່ປະຈໍາຈຸແກ້ໄຂເຫດສຸກເສີນກໍລະນີຕ່າງໆ ໄດ້ເຮັດບົດບັນທຶກມອບ-ຮັບຜູ້ຖືກສົງໄສຄົນຕ່າງປະເທດ 1 ຄົນ ພັກເຊົາຢູ່ບ້ານທົ່ງສາງນາງ ເມືອງຈັນທະບູລີ ນະຄອນຫຼວງວຽງຈັນ ພ້ອມລົດຈັກດິ້ມສີຂາວ-ຕັບໝູ ທີ່ໄດ້ລະເມີດລະບຽບ ທີ່ຄະນະຈັດງານບຸນນະມັດສະການພຣະທາດຫຼວງວຽງຈັນ ວາງອອກໄດ້ມອບໃຫ້ພະແນກສັນຕິບານກອງບັນຊາການປກສເມືອງໄຊເສດຖາ.

ໃນເວລາ 19:00 ໂມງ, ໄດ້ຮັບແຈ້ງຄວາມຈາກຜູ້ເສຍຫາຍວ່າ: ໂທລະສັບ Iphone 12 pro max ສີບົວທອງ ຂອງຜູ້ກ່ຽວທີ່ວາງໄວ້ຕັ່ງນັ່ງບໍລິເວນໜ້າຮູບປັັ້ນເຈົ້າໄຊເສດຖາທິຣາດ ແລ້ວເສຍ; ຕໍ່ກັບໂທລະສັບທີ່ຜູ້ກ່ຽວເຮັດເສຍນັ້ນ ປັດຈຸບັນແມ່ນໄດ້ຄືນແລ້ວ.

ໃນເວລາ 8:30 ໂມງ, ໄດ້ຮັບແຈ້ງຄວາມວ່າ: ໄດ້ມາໃສ່ບາດງານບຸນນະມັດສະການພຣະທາດຫຼວງ ກັບໝູ່ ແລະ ນ້ອງສາວ ນຳກັນ 5 ຄົນ, ພາຍຫຼັງມາຮອດກໍໄດ້ເລີ່ມໃສ່ບາດຕາມປົກກະຕິ ຈົນຮອດເວລາ 8:30 ໂມງ ກຳລັງຈະກັບບ້ານ ແລ້ວໄດ້ຍ່າງຂຶ້ນມາຮອດບໍລິເວນໜ້າບຸດກາເຟດາວຄຳ ຈຶ່ງໄດ້ຮູ້ສຶກຕົວວ່າກະເປົາ ຖືກແຫກ. ຜົນເສຍຫາຍມີ: ເງິນ 10.000.000 ກີບ.

ເວລາປະມານ 9:00 ໂມງ, ໄດ້ຮັບແຈ້ງຄວາມຈາກຜູ້ເສຍຫາຍວ່າ: ຜູ້ກ່ຽວໄດ້ມາໃສ່ບາດໃນງານບຸນນະມັດ ສະ ການພຣະທາດຫຼວງກັບຄອບຄົວ. ມາຮອດເວລາ 8:50 ໂມງ, ຜູ້ກ່ຽວກັບຄອບຄົວກໍາລັງຈະກັບບ້ານ ແຕ່ໄດ້ວາງໂທລະສັບໄວ້ໃນກະຕ່າເຄື່ອງໃສ່ບາດ, ແລ້ວໄດ້ຍ່າງມາຮອດທາງດ້ານຫຼັງກົມມະລຽນ. ຈາກນັ້ນ, ກໍຮູ້ຕົວວ່າ ໂທລະສັບ Iphone 14 Pro max ເສຍ.

ແຫຼ່ງຂ່າວ ຄວາມສະຫງົບ