ຄະນະລັດຖະມົນຕີ ແຫ່ງປະເທດໄທຮັບຮອງເອົາກົດໝາຍແຕ່ງງານເທົ່າທຽມ ກຽມສົ່ງສະພາໃຫ້ພິຈະລະນາໃນວັນທີ 12 ທັນວາ 2023 ນີ້, ທ່ານ ຄາລົມ ພົມພອນກາງ ຮອງໂຄສົກປະຈຳສຳນັກງານນາຍົກລັດຖະມົນຕີແຫ່ງປະເທດໄທ ເປີດເຜີຍວ່າ: ຄະນະລັດຖະມົນຕີມີຄຳເຫັນອະນຸມັດຫຼັກການຮ່າງກົດໝາຍແກ້ໄຂເພີ່ມເຕີມໃນການປະມວນກົດໝາຍແພ່ງ ແລະ ພານິດ (ແຕ່ງງານເທົ່າທຽມ) ຕາມທີ່ກະຊວງຍຸດຕິດທຳສະເໜີ.
ທ່ານ ຄາລົມ ກ່າວວ່າ: ຄວງາມສຳຄັນໃນກົດໝາຍນີ້ ເປັນການແກ້ໄຂເພີ່ມເຕີມປະມວນກົດໝາຍແພ່ງ ແລະ ພານິດ ເພື່ອໃຫ້ບຸກຄົນ 2 ຄົນ ບໍ່ວ່າເພດໃດກໍສາມາດທຳການໝັ້ນ ແລະ ແຕ່ງງານໄດ້. ເພື່ອໃຫ້ມີຄວາມໝາຍຄວບຄຸມຄູ່ໝັ້ນ ຫຼື ຄູ່ແຕ່ງງານ ບໍ່ວ່າຈະມີເພດໃດ ລວມທັງແກ້ໄຂກົດໝາຍໃນຂໍ້ອື່ນໆ ທີ່ກ່ຽວຂ້ອງ ເຊິ່ງຈະເຮັດໃຫ້ບຸກຄົນນັ້ນມີສິດ, ໜ້າທີ່ ແລະ ສະຖານະທາງຄອບຄົວເທົ່າທຽມກັບຄູ່ແຕ່ງງານທີ່ເປັນຊາຍ ແລະ ຍິງ.
ເນື່ອງຈາກປັດຈຸບັນປະເທດໄທຍັງບໍ່ມີກົດໝາຍໃຫ້ການຮັບຮອງສິດໃນການກໍ່ຕັ້ງຄອບຄົວຂອງຄູ່ຮັກເພດດຽວກັນ ເຊິ່ງແຕກຕ່າງຈາກສະພາບສັງຄົມໃນປັດຈຸບັນທີ່ມີຄູ່ຮັກດຽວກັນອາໄສຢູ່ຮ່ວມກັນເປັນຄອບຄົວຈຳນວນຫຼາຍ ໂດຍຂາດເຄື່ອງມືທາງກົດໝາຍໃນການຈັດການຄວາມສຳພັນທາງຄອບຄົວ ສົ່ງຜົນໃຫ້ເກີດປັນຫາຕໍ່ຄອບຄົວຫຼາກຫຼາຍທາງເພດຫຼາຍຢ່າງເຊັ່ນ: ສິດໃນການຕັດສິນໃຈໃນການຮັກສາພະຍາບານ, ສິດໃນການຮັບລ້ຽງເຊິ່ງກັນ ແລະ ກັນ, ສິດໃນການຈັດການຊັບສິນຮ່ວມກັນ ແລະ ສິດໃນການຮັບມໍລະດົກ.
ທີ່ມາ: PPTV