ຕອນບ່າຍວັນທີ 5 ທັນວາ 2014 ທີ່ໂຮງແຮມເມີກຽວ ນະຄອນຫລວງວຽງຈັນ
ໄດ້ມີພິທີຖະແຫລງຂ່າວການອອກ ມິນິອາລະບ້ຳ My Radio ຊຶ່ງເປັນຜົນງານ
ຊຸດໃໝ່ຂອງ ອາເລັກຊານດຣາ ບຸນຊ່ວຍ ພາຍຫລັງງຽບຫາຍໄປຈາກວົງການ
ເພງລາວ ມາດົນພໍສົມຄວນ ໂດຍການເຂົ້າຮ່ວມຂອງທ່ານ ສົມສະໜຸກ ມີໄຊ
ຮອງປະທານສະມາຄົມນັກຂ່າວແຫ່ງ ສປປ.ລາວ ມີບັນດາແຟນເພງ ແລະ
ຜູ້ໃຫ້ການສະໜັບສະໜູນອຸປະຖຳ ເຂົ້າຮ່ວມ.
ອາເລັກຊານດຣ້າ ບຸນຊ່ວຍ ຖະແຫລງຂ່າວ ການອອກມີນິອາລະບໍ້າໃໝ່ (ທີ່ ໂຮງແຮມ ເມີກຽວ 05/12/2014)
ທ່ານນາງ ອາເລັກຊານດຣາ ບຸນຊ່ວຍ ໄດ້ຖະແຫລງຕໍ່ສື່ມວນຊົນວ່າ
ການຜະລິດຜົນງານເພງຊຸດໃໝ່ຫລ້າສຸດນີ້ມີຊື່ວ່າ My Radio ແນໃສ່ເອົາໃຈ
ແຟນເພງທີ່ຄອງຄອຍມາດົນ ແລະ ໄດ້ຄິດຄົ້ນແຕ່ງຂຶ້ນໃນເວລາໄປຮຽນຢູ່
ປະເທດຍີ່ປຸ່ນເປັນເວລາ 3 ປີ ຊຶ່ງເປັນເພງປະເພດຟັງສະບາຍທີ່ເປັນເອກະລັກ
ສະເພາະ ເພື່ອຜ່ອນຄາຍຄວາມອິດເມື່ອຍຈາກການເຮັດວຽກຫຼືໜ້າທີ່ການງານ
ສຳລັບຜົນງານເພງຊຶ່ງເປັນມິນິອາລາບ້ຳໃໝ່ຂອງນາງຊຸດນີ້ ປະກອບມີທັງໝົດ
4 ເພງຄື My Radio ຮັກເຈົ້າຕະຫລອດໄປ ຄົນທຳມະດາ ແລະ ເຈົ້າໄດ້ບໍ່
ຊຶ່ງຈະວາງແຜງຂາຍຕາມຮ້ານຂາຍແຜ່ນຊີດີ-ດີວີດີເພງທົ່ວໄປ ໂດຍເລີ່ມແຕ່
ວັນທີ່ 6 ທັນວາ 2014 ນີ້ເປັນຕົ້ນໄປ ໃນລາຄາ 20.000 ກີບຕໍ່ໜຶ່ງແຜ່ນ
ໂດຍລາຍໄດ້ຈາກການຂາຍແຜ່ນຊີດີເພງທັງໝົດ ຈະນຳເຂົ້າມູນນິທິບຸນຊ່ວຍ
ເພື່ອປະກອບສ່ວນຊ່ອຍເຫລືອເດັກນ້ອຍທີ່ພິການທາງສະໝອງ ຫຼື ອໍທິສຕິກ
ພ້ອມນີ້ ທ່ານນາງ ອາເລັກຊານດຣາ ຍັງເປີດເຜີຍໃຫ້ຮູ້ອີກວ່າ ໃນລະຫວ່າງ
ຕົ້ນປີ 2015 ຈະກຽມເຄື່ອນໄຫວຈັດການສະແດງຄອນເສີດໃຫ່ຍເພື່ອການກຸສົນ
ສົມທົບທຶນກຽມຄວາມພ້ອມໃຫ້ແກ່ການເປີດຫ້ອງການຂອງມູນນິທິບຸນຊ່ວຍ
ແລະ ຊື້ວັດຖຸ ອຸປະກອນຈຳເປັນຈຳນວນໜຶ່ງ ພ້ອມທັງເປັນທຶນໝູນໃຊ້ເຂົ້າ
ໃນວຽກງານ ເພື່ອຊ່ອຍເຫລືອເດັກພິການທາງສະໝອງ ຫຼື ອໍທິສຕິກ ຂອງ
ມູນນິທິດັ່ງກ່າວ.
ຂ່າວ/ພາບ: ເທບພະວົງ
ທີ່ມາ http://www.vtetoday.la/