ເປັນເລື່ອງອຸທາຫອນໃຫ້ຜູ້ປົກຄອງຫຼາຍໆຄົນທີ່ປ່ອຍໃຫ້ລູກທີ່ຍັງບໍ່ຮອດ 15 ປີ ຂັບຂີ່ລົດຈັກກ່ອນອາຍຸກຳນົດ.
ໃນວັນທີ 4 ພະຈິກ 2023 ໄດ້ເກີດອຸບັດຕິເຫດລົດບັນທຸກ 12 ລໍ້ຕຳລົດຈັກໄຟຟ້າ ຢູ່ໜ້າວັດສາລາຄຳ ເມືອງຫາດຊາຍຟອງ ນະຄອນຫຼວງວຽງຈັນ ມີຄົນບາດເຈັບ 1 ຄົນ ແລະ ເສຍຊີວິດ 1 ຄົນ, ໃນນັ້ນ ຜູ້ເສຍຊີວິດເປັນເດັກນັກຮຽນເພດຍິງ ອາຍຸ 8ປີ ຢູ່ບ້ານສາລາຄຳ ເມືອງຫາດຊາຍຟອງ ນະຄອນຫລວງວຽງຈັນ ອາການເບື້ອງຕົ້ນແມ່ນມີບາດຈີກໃຫ່ຍຢູ່ເເຂນເບື້ອງຊ້າຍ ກະທົບຫົວ ເລືອດອອກດັງອອກປາກອອກຫູ ແລະ ເສຍຊີວິດຢູ່ໂຮງໝໍໃນເວລາຕໍ່ມາ.
ສ່ວນອີກຄົນໜຶ່ງ ແມ່ນໄດ້ຮັບບາດເຈັບເປັນເດັກນັກຮຽນ ເພດຍິງ ອາຍຸ 7 ປີ ຢູ່ບ້ານສາລະຄຳ ເມືອງຫາດຊາຍຟອງ ນະຄອນຫຼວງວຽງຈັນ ໂດຍອາການເບື້ອງຕົ້ນແມ່ນມີບາດເປີດຢູ່ຂາເບື້ອງຊ້າຍຂາຫັກເບື້ອງຂວາ.
ຈາກເຫດການດັ່ງກ່າວ ເຮັດໃຫ້ສັງຄົມອອນລາຍຕ່າງວິພາກວິຈານຜູ້ປົກຄອງທີ່ປ່ອຍປະລະເລີຍລູກທີ່ອາຍຸບໍ່ເຖິງ 10 ປີຂັບຂີ່ລົດຈັກຢູ່ທາງໃຫຍ່ ເຊິ່ງມັນກໍສ່ຽງເກີດອຸບັດຕິເຫດ ແລະ ຍັງໄດ້ສະທ້ອນສັງຄົມໃນປັດຈຸບັນວ່າ ພົບເດັກນ້ອຍຈຳນວນຫຼາຍທີ່ອາຍຸບໍ່ຮອດເກນກຳນົດ ແຕ່ກໍຂັບທັງລົດຈັກ ແລະ ລົດໃຫຍ່.
ທັ້ງນີ້ ການຂັບຂີ່ດັ່ງກ່າວ ຍັງລະເມີດກົດຈະລາຈອນທາງບົກ ສະບັບເລກທີ 615/ລບ ມາດຕາ 113 ຜູ້ຂັບຂີ່ລົດປະເພດ A (ລົດຈັກ) ຕ້ອງມີອາຍຸ 15 ປີຂຶ້ນໄປ.