ວັນທີ 2 ພະຈິກ 2023 ພະແນກສາທາລະນະສຸກແຂວງຜົ້ງສາລີ ໄດ້ຈັດພິທີທຳລາຍຢາ ແລະ ອຸປະກອນການແພດໝົດອາຍຸການນຳໃຊ້, ໂດຍການເຂົ້າຮ່ວມຂອງ ທ່ານ ດຣ ບຸນສາລີ ຈິດດາພອນ ຫົວໜ້າພະແນກສາທາລະນະສຸກ ແຂວງຜົ້ງສາລີ.

ການທຳລາຍຄັ້ງນີ້ ປະກອບມີຢາ ແລະ ຜະລິດຕະພັນການແພດ ທີ່ທາງຂະແໜງອາຫານ ແລະ ຢາ ຍຶດມາໄດ້ຈາກດ່ານສາກົນປາງຫົກ ປະກອບມີ ສິນຄ້າຢາເຖື່ອນ ມີຄື: ຢານໍ້າ, ຢາເມັດ, ອຸປະກອນການແພດ, ຢາສູບໄຟຟ້າ, ອາຫານ, ອາຫານເສີມ ທີ່ເປັນສິນຄ້ານຳເຂົ້າບໍ່ຖືກຕ້ອງ ລວມ 40 ກວ່າລາຍການ ມູນຄ່າ 128.102.587 ກີບ, ການທຳລາຍຄັ້ງນີ້ ບາງຊະນິດແມ່ນໄດ້ຈູດທຳລາຍ ແລະ ບາງຊະນິດແມ່ນໄດ້ຂຸດຂຸມຝັງເພື່ອຮັບປະກັນຄວາມປອດໄພ.

ການທຳລາຍໃນຄັ້ງນີ້ ກໍເພື່ອເປັນການປົກປ້ອງຄວາມປອດໄພຂອງຜູ້ຊົມໃຊ້, ຍົກສູງປະສິດທິພາບທາງດ້ານການຢາ, ການບໍລິການທາງການແພດພາຍໃນແຂວງຜົ້ງສາລີ ໃຫ້ມີຄວາມປອດໄພ ແລະ ຮັບປະກັນການປິ່ນປົວສຸຂະພາບໃຫ້ສູງຂື້ນ.