ສຳນັກຂ່າວຕ່າງປະເທດລາຍງານໃນວັນທີ 31 ຕຸລາ 2023 ທີ່ຜ່ານມານີ້ວ່າ: ຕຳຫຼວດຍີ່ປຸ່ນຄວບຄຸມໂຕຜູ້ຕ້ອງງສົງໃສເປັນມືປືນ ທີ່ກໍ່ເຫດຍິງຄົນບາດເຈັບ 2 ຄົນໃນໂຮງໝໍແຫ່ງໜຶ່ງ ກ່ອນຈະຈັບໂຕປະກັນຫຼາຍຄົນໄວ້ທີ່ສຳນັກງານໄປສະນີ ທີ່ເມືອງວາຣາບິ ແຂວງໄຊຕາມະ ປະເທດຍີ່ປຸ່ນ.

ຕາມການລາຍງານລະບຸວ່າ: ມືປືນລາຍນີ້ເປັນຊາຍສູງອາຍຸ 86 ປີ ກໍ່ເຫດຍິງປືນຈາກຫົນທາງເຂົ້າໃສ່ໂຮງໝໍໃນເມືອງໂທດະ ເຮັດໃຫ້ໝໍກັບຜູ້ປ່ວຍລາຍໜຶ່ງໄດ້ຮັບບາດເຈັບເລັກໜ້ອຍ ກ່ອນຈະໜີໄປເມືອງວາຣາບິ ທີ່ຢູ່ຕິດກັນແລ້ວບຸກເຂົ້າໄປໃນສຳນັກງານໄປສະນີ ແລ້ວຂັງໂຕເອງໄວ້ພ້ອມໂຕປະກັນຫຼາຍຄົນ.

ຕຳຫຼວດໄດ້ພະຍາຍາມເຈລະຈາກັບມືປືນໂດຍໃນເວລາປະມານ 19:30 ໂມງ ຜູ້ຍິງຄົນໜຶ່ງອາຍຸ 20 ປີທີ່ເປັນໂຕປະກັນໄດ້ຮັບການປ່ອຍໂຕອອກມາ ຈາກນັ້ນຜູ້ກໍ່ເຫດຍັງຢູ່ໃນດ້ານໃນຫຼາຍຊົ່ວໂມງເຈົ້າໜ້າທີ່ຕຳຫຼວດຈຶ່ງຕັດສິນໃຈບຸກເຂົ້າໃນໂຕອາຄານ ເພື່ອເຂົ້າຈັບກຸມຄົນຮ້າຍ ແລະ ຍຶດອາວຸດປືນເອົາໄວ້ໄດ້ສຳເລັດ.

ໃນເບື້ອງຕົ້ນຍັງບໍ່ມີການເປີດເຜີຍແຮງຈູງໃຈໃນການກໍ່ເຫດຈຂອງພໍ່ຕູ້ຄົນນີ້ ແຕ່ຕຳຫຼວດຄາດວ່າລາວມີສ່ວນກ່ຽວຂ້ອງກັບເຫດໄຟໄໝ້ອາພາດເມັ້ນແຫ່ງໜຶ່ງໃນຕອນເຊົ້າວັນທີ 31 ຕຸລາ 2023 ຜ່ານມາ, ແຕ່ບໍ່ມີລາຍງານຜູ້ໄດ້ຮັບບາດເຈັບ.