ໃນວັນທີ 27 ຕຸລາ 2023 ເຈົ້າໜ້າທີ່ຕຳຫຼວດ ກອງບັນຊາການ ປກສ ເມືອງໄຊທານີ ນະຄອນຫຼວງວຽງຈັນ ໄດ້ເຮັດບົດບັນທຶກສຶກສາອົບຮົມ ນາງ ຍິງເພີຍ ແຊ່ຈ່າວ ອາຍຸ 23 ປີ, ອາຊີບ ຄ້າຂາຍ, ພັກເຊົາຢູ່ບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ທີ່ຖືກຫາໃນການສ້າງຄວາມເສຍຫາຍຜ່ານສື່ສັງຄົມອອນລາຍ ໂດຍມີ ພັທ ເພັດມາລີ ຂັນທະລັດ ຫົວໜ້າພະແນກຕຳຫຼວດ ປກສ ເມືອງໄຊທານີ ເປັນຜູ້ສຶກສາອົບຮົມ ໂດຍມີເຈົ້າໜ້າທີ່ຕຳຫຼວດວິຊາສະເພາະ ແລະ ຜູ້ປົກຄອງ ເຂົ້າຮ່ວມ.

ພັທ ປທ ສຸນີ ໄຊຍະວົງ ຮອງຫົວໜ້າພະແນກຕຳຫຼວດ, ຜູ້ຊີ້ນຳກອງຕຳຫຼວດຈະລາຈອນ ເມືອງໄຊທານີ ໄດ້ໃຫ້ຮູ້ວ່າ: ນາງ ຍິງເພີຍ ແຊ່ຈ່າວ ໄດ້ລັກບັນທຶກຮູບພາບຂອງເຈົ້າໜ້າທີ່ຕໍາຫຼວດຈະລາຈອນ ເມືອງໄຊທານີ ໃນຂະນະປະຕິບັດໜ້າທີ່ລະບາຍການສັນຈອນ ຢູ່ 4 ແຍກໄຟອຳນາດ ຕານມີໄຊ ໃນວັນທີ 26 ກໍລະກົດ 2023 ແລ້ວຜູ້ກ່ຽວນຳເອົາຮູບພາບຂອງເຈົ້າໜ້າທີ່ຕໍາຫຼວດຈະລາຈອນລົງທາງສື່ອອນລາຍ ຜ່ານຊື່ເຟດບຸກ Nicky ຂາຍຖືກ ເຊິ່ງເປັນເຟດບຸກຂອງ ນາງ ຍິງເພີຍ ແຊ່ຈ່າວ ພ້ອມທັງຂຽນຫົວຂໍ້ໃນເຟດບຸກ ວ່າ: “ຮູ້ສຶກບໍ່ໂອເຄກັບການທີ່ເຫັນຕໍາຫຼວດນັ່ງຈຸ້ມກັນຕາມ 4 ແຍກໄຟອຳນາດ ກຸ່ມລະແຈແລ້ວກໍຍ່າງມາກັກເອົາເລືອກກັກອີກ ມັນເປັນບ່ອນໂຄງບ່ອນລ້ຽວ ເຮັດໃຫ້ສັນຈອນໄປມາຍາກ ຖ້າຢາກກວດຕາມລະບຽບຄືບໍ່ຕັ້ງດ່ານກວດ”.

ພາຍຫຼັງທີ່ໂພດຮູບລົງໄດ້ມີຄົນກົດໄລ ກົດແຊ ພ້ອມທັງສະແດງຄວາມເຫັນໃສ່ຮ້າຍປ້າຍສີບໍ່ດີຕໍ່ເຈົ້າໜ້າທີ່.

ພັທ ປທ ສຸນີ ໄຊຍະວົງ ຍັງໃຫ້ຮູ້ຕື່ມວ່າ ເຈົ້າໜ້າທີ່ຕໍາຫຼວດຈະລາຈອນ ໄດ້ປະຕິບັດຕາມການຊີ້ນຳຂອງຂັ້ນເທິງ ເພື່ອບັງຄັບໃຊ້ກົດໝາຍ, ສຶກສາອົບຮົມປູກຈິດສໍານຶກໃຫ້ຜູ້ໃຊ້ລົດໃຊ້ຖະໜົນມີຄວາມເປັນເຈົ້າການໃນການເຄົາລົບ ແລະ ປະຕິບັດກົດລະບຽບການສັນຈອນຢ່າງເຂັ້ມງວດ, ເຮັດໃຫ້ການສັນຈອນຕາມເສັ້ນທາງຫຼວງໃນຂອບເຂດເມືອງໄຊທານີ ມີຄວາມເປັນລະບຽບຮຽບຮ້ອຍ, ສະດວກປອດໄພ ແລະ ຄ່ອງຕົວດີ ພ້ອມທັງເຮັດໃຫ້ອຸບັດຕິເຫດທາງຖະໜົນຫຼຸດໜ້ອຍຖອຍລົງເທື່ອລະກ້າວ.

ຕໍ່ກັບການກະທຳຂອງ ນາງ ຍິງເພີຍ ແຊ່ຈ່າວ ເປັນການກະທຳຜິດດ້ວຍຄວາມຮູ້ເທົ່າບໍ່ເຖິງການ ຜິດຕໍ່ລະບຽບກົດໝາຍໃນການສ້າງຄວາມເສຍຫາຍຜ່ານສື່ສັງຄົມອອນລາຍ; ດັ່ງນັ້ນ, ເຈົ້າໜ້າທີ່ຕຳຫຼວດ ປກສ ເມືອງໄຊທານີ ຈຶ່ງໄດ້ນຳຜູ້ກ່ຽວມາເຮັດບົດບັນທຶກສຶກສາອົບຮົມກ່າວເຕືອນ ພ້ອມທັງປັບໃໝຕາມລະບຽບ ໂດຍຊ່ອງໜ້າຜູ້ປົກຄອງ ເພື່ອບໍ່ໃຫ້ຜູ້ກ່ຽວໄດ້ກະທຳຜິດອີກ.

ແຫຼ່ງຂ່າວ ວາລະສານ ປ້ອງກັນຄວາມສະຫງົບ