ວັນທີ 20 ຕຸລາຜ່ານມາ, ແຂວງສາລະວັນ ໄດ້ຈູດທຳລາຍຢາເສບຕິດເນື່ອງໃນໂອກາດວັນແຫ່ງຊາດ ຕ້ານຢາເສບຕິດ ຄົບຮອບ 22 ປີ (12 ຕຸລາ 2001 – ວັນທີ 12 ຕຸລາ 2023) ໂດຍມີ ພົຈວ ພູວັນ ພິມມະຈັນ ຫົວໜ້າກອງບັນຊາການທະຫານແຂວງ, ມີຄະນະປະຈໍາພັກ-ກໍາມະການພັກແຂວງ, ພະນັກງານທະຫານ-ຕຳຫຼວດ, ພ້ອມດ້ວຍພະແນກການອ້ອມຂ້າງ, ອົງການປົກຄອງ, ຄູ-ອາຈານ ແລະ ນັກຮຽນ-ນັກສຶກສາ ເຂົ້າຮ່ວມ.
ພັອ ເອກະລາດ ແທ່ງສົມບັດ ຮອງຫົວໜ້າກອງບັນຊາການ ປກສ ແຂວງສາລະວັນ ໄດ້ຜ່ານບົດລາຍງານ, ເຊິ່ງບາງຕອນທ່ານໄດ້ກ່າວວ່າ: ພັກ-ລັດຖະບານ ໄດ້ຖືເປັນສຳ ຄັນໃນການແກ້ໄຂບັນຫາຢາເສບຕິດຫັນເປັນວາລະແຫ່ງຊາດທີ່ພົນລະເມືອງລາວທຸກຊັ້ນຄົນໃນສັງຄົມ ມີສ່ວນຮ່ວມໃນການຈັດຕັ້ງປະຕິບັດ, ການສະເຫຼີມສະຫຼອງວັນແຫ່ງຊາດຕ້ານຢາເສບຕິດ ປີນີ້ພະນັກງານທີ່ຖືກມອບໝາຍ ໄດ້ເພີ່ມທະວີໃນການເຄື່ອນໄຫວ ແລະ ຈັດຕັ້ງປະຕິບັດວຽກງານວິຊາສະເພາະ ທັງໄດ້ເຄື່ອນໄຫວລົງເລິກໃນການໂຄສະນາໃຫ້ຮູ້ໄດ້ຜົນຮ້າຍ ແລະ ໄພອັນຕະລາຍຈາກຢາເສບຕິດທັງຜູ້ຂາຍ ແລະ ຜູ້ເສບ ເພາະຢາເສບຕິດໄດ້ສົ່ງຜົນກະທົບເຖິງຄວາມໝັ້ນຄົງຂອ’ຊາດ, ບ້ານ, ເມືອງໂດຍກົງ. ຈາກນັ້ນ, ກໍສົ່ງຜົນກະທົບຕໍ່ເສດຖະກິດ-ສັງຄົມ ແລະ ແຊກຊຶມເລິກເຂົ້າຫາຊາວ ໜຸ່ມ, ເຍົາວະຊົນ, ອະນຸຊົນທີ່ເປັນໜໍ່ແໜງຂອງຊາດ.
ໄລຍະ 1 ປີຜ່ານມາ, ເຈົ້າໜ້າທີ່ ປກສ ແຂວງສາລະວັນ ສາມາດມ້າງລາຍຄະດີຢາເສບ ຕິດ ແລະ ສານຕັດສິນໃຊ້ໄດ້ຢ່າງເດັດຂາດມີທັງໝົດ 253 ເລື່ອງ, ມີນັກໂທດ 312 ຄົນ ຍິງ 26 ຄົນ, ຢຶດຂອງກາງປະເພດຢາບ້າໄດ້ເກືອບ 4 ແສນເມັດ, ຢາໄອສ໌ 2 ກິໂລ ແລະ ເຄື່ອງຂອງກາງອື່ນໆ.
ທີ່ມາ: ຄວາມສະຫງົບ