ຕະຫຼອດເວລາ 500 ປີ ທີ່ຜ່ານມາ ໂລກເຮົາປະສົບກັບການສູນເສຍຄັ້ງໃຫຍ່ມາ 5 ຄັ້ງແລ້ວ ໜຶ່ງໃນນັ້ນທີ່ນຳໄປສູ່ການສູນພັນຂອງສາຍພັນຕ່າງໆໃນໂລກເຖິງ 90% ໃນຊ່ວງ 252 ລ້ານປີກ່ອນ ເຫດການເຫຼົ່ານີ້ສ່ວນໃຫຍ່ເກີດຂຶ້ນພ້ອມກັບການກໍ່ຕົວຂອງມະຫາທະວີບຢູ່ແຜ່ນເປືອກໂລກຄ່ອຍໆມາລວມກັນ, ຢ່າງໃດກໍຕາມ ນັກວິທະຍາສາດທຳນາຍວ່າ ທະວີບຕ່າງໆຂອງໂລກ ຈະລວມກັນອີກຄັ້ງໃນ 250 ລ້ານປີຕໍ່ໜ້າ ເພື່ອລວມຕົວເປັນມະຫາທະວີບ ທີ່ເອີ້ນວ່າ “Pangea Ultima” ຫຼື ແພນເຈຍ ອັລຕິມາ.

Pangea Ultima ຈະຢູ່ກາງເສັ້ນສູນສູດ ແລະ ຈະຮ້ອນຫຼາຍ ເຊິ່ງການວິໄຈໃໝ່ຈາກທີມນັກວິທະຍາສາດ ຂອງມະຫາວິທະຍາໄລລີດ ໃນອັງກິດ ແລະ ມະຫາວິທະຍາໄລນອດ ເວສເທິນ ໃນສະຫະລັດອາເມຣິກາ ລະບຸວ່າ ສະພາບຂອງ Pangea Ultima ຈະບໍ່ເອື້ອອຳນວຍຕໍ່ສັດລ້ຽງລູກດ້ວຍນ້ຳນົມສ່ວນໃຫຍ່ພວກມັນບໍ່ໜ້າຈະຢູ່ລອດໄດ້ ເພາະການລວມຕົວຂອງມະຫາທະວີບໃຫຍ່ນີ້ ຈະກະຕຸ້ນໃຫ້ເກີດການລະເບີດຂອງພູເຂົາໄຟຫຼາຍຂຶ້ນ ແລະ ຕາເວັນທີ່ມີອາຍຸຫຼາຍຂຶ້ນ ກໍຈະປ່ອຍລັງສີມາໃສ່ໂລກຫຼາຍຂຶ້ນ ຈະສົ່ງຜົນໃຫ້ອຸນຫະພູມໂລກຮ້ອນຫຼາຍເກີນໄປ ມີໂອກາດປ່ຽນພື້ນທີ່ສ່ວນໃຫຍ່ຂອງທະວີບ ໃຫ້ກາຍເປັນທະເລຊາຍຮ້ອນອັນກວ້າງໃຫຍ່ ແລະ ໃນຊ່ວງເດືອນທີ່ຮ້ອນທີ່ສຸດຂອງປີ ອຸນຫະພູມອາດຈະເກີນ 40 ອົງສາເກືອບທົ່ວທະວີບ ພ້ອມມີທ່າອ່ຽງວ່າອຸນຫະພູມຈະເກີນ 50 ອົງສາອີກດ້ວຍ.

ການປະເມີນຍັງລະບຸວ່າ ເມື່ອ Pangea Ultima ລວມຕົວ ຕາເວັນຈະແຈ້ງກວ່າປັດຈຸບັນເຖິງ 2,5% ຄວາມເຂັ້ມຂອງແສງຕາເວັນຫຼາຍຂຶ້ນ ຈະເຮັດໃຫ້ອຸນຫະພູມຢູ່ເທິງໂລກສູງຂຶ້ນອີກປະມານ 25 ອົງສາ ເຮັດໃຫ້ພື້ນຜິວໂລກພຽງ 1 ສ່ວນ 4 ເທົ່ານັ້ນ ທີ່ສາມາດຢູ່ອາໄສໄດ້ ສິ່ງນີ້ຈະເຮັດໃຫ້ສັດລ້ຽງລູກດ້ວຍນ້ຳນົມເດີນທາງໄກເພື່ອຄົ້ນຫາພື້ນທີ່ ທີ່ເຢັນກວ່າ.

ທີ່ມາ the atlantic