ເຈົ້າໜ້າທີ່ຊ່ວຍຜູ້ຍິງສັນຊາດກຳປູເຈຍ 6 ຄົນ ຈາກທັງໝົດ 7 ຄົນ ທີ່ຕົກເປັນເຫຍື່ອຂອງການຄ້າມະນຸດໃນແຂວງບໍ່ແກ້ວ.
ໃນວັນທີ 1 ຕຸລາ 2023 ອີງຕາມແຫຼ່ງຂ່າວ Kiripost ຂອງກຳປູເຈຍ ໄດ້ລາຍງານວ່າ: ມີຜູ້ຍິງທີ່ຖືກຕົວະໄປເຮັດວຽກຢູ່ເຂດເສດຖະກິດພິເສດໃນແຂວງບໍ່ແກ້ວ ໃນຂະນະທີ່ພວກເຂົາໄດ້ຍິນກ່ຽວກັບການບັງຄັບຍ້າຍຖິ່ນຖານໃນຕ່າງປະເທດທີ່ກຳລັງຈະເກີດຂຶ້ນ ພວກເຂົາຈຶ່ງໄດ້ໜີ ແລະ ໂພສວິດີໂອ ເພື່ອຂໍຄວາມຊ່ວຍເຫຼືອໃນ Facebook.
ຈາກການຂໍຄວາມຊ່ວຍເຫຼືອ ເມື່ອສະຖານທູດກຳປູເຈຍປະຈຳລາວ ໄດ້ຮັບຮູ້ກໍຮີບດຳເນີນການເພື່ອຊ່ວຍເຫຼືອທັນທີ.
ແຜນດັ່ງກ່າວ ປະສົບຄວາມສຳເລັດໂດຍຊ່ວຍເຫຼືອຜູ້ຍິງ 6 ຄົນ ຈາກທັງໝົດ 7 ຄົນ ປັດຈຸບັນພວກເຂົາແມ່ນຢູ່ໃນສະຖານທີ່ປອດໄພແລ້ວ ແລະ ສະຖານທູດ ພ້ອມທາງການລາວ ກຳລັງຄົ້ນຫາຄົນທີ 7.
ສຳນັກຂ່າວກຳປູເຈຍ ກໍໄດ້ລາຍງານວ່າ ຜູ້ຍິງຄົນທີ່ 7 ບໍ່ສາມາດລົບໜີໄດ້ທັນຄົນອື່ນ ເນື່ອງຈາກວ່າລາວບໍ່ສະບາຍ.
Am Sam Ath ຜູ້ອຳນວຍການຝ່າຍປະຕິບັດການ ອົງກອນດ້ານສິດທິມະນຸດຂອງກຳປູເຈຍ ກ່າວວ່າ ຄະດີການຄ້າມະນຸດໃນຄັ້ງນີ້ ເຮັດໃຫ້ຊື່ສຽງຂອງກຳປູເຈຍໄດ້ເສື່ອມເສຍ, ເມື່ອວິດີໂອ ແລະ ຮູບພາບຂອງເຫຍື່ອແຜ່ລະບາດໃນອອນລາຍ ພວກເຂົາບໍ່ໄດ້ເຮັດຫຍັງເລີຍນອກຈາກຈະເຮັດໃຫ້ກຳປູເຈຍເສື່ອມເສຍ ໂດຍສະເພາະຢ່າງຍິ່ງ ສົ່ງຜົນເສຍຕໍ່ການທ່ອງທ່ຽວໄດ້.
ນອກນີ້ Sam Ath ຍັງໄດ້ກ່າວຄຳຂອບໃຈ ຕໍ່ການຮ່ວມມືລະຫວ່າງສອງປະເທດ ທີ່ດຳເນີນການແກ້ໄຂສະຖານະການໂດຍທັນທີ ເພື່ອປ້ອງກັນບໍ່ໃຫ້ເກີດເຫດການທີ່ບໍ່ດີຊ້ຳອີກ.
ໃນປີ 2022 ປະຊາຊົນຂອງປະເທດຕ່າງໆເຊັ່ນ ເນປານ ອິນເດຍ ປາກິດສະຖານ ມາເລເຊຍ ແລະ ຟິລິບປິນ ໄດ້ຮັບການຊ່ວຍເຫຼືອຈາກການຄ້າມະນຸດໃນລາວ ນອກນີ້ ອົດສະຕຣາລີຍັງໄດ້ອອກຄຳແນະນຳກ່ຽວກັບການເດີນທາງຂອງປະຊາຊົນອົດສະຕຣາລີວ່າ ໃຫ້ລະວັງໃນການເດີນທາງທ່ອງທ່ຽວໃນແຂວງບໍ່ແກ້ວ ແລະ ເຂດເສດຖະກິດພິເສດສາມຫຼ່ຽມຄຳ.