ທ່ານ ນາງ ປິງ ກິດນິກອນ Ping Kitnikone ເຂົ້າຢືນສານຕາຕັ້ງເພື່ອດຳລົງຕຳແໜ່ງເອກອັກຄະລັດຖະທູດ ແຕ່ງຕັ້ງ ແຫ່ງ ການາດາ ປະຈໍາ ສປປ ລາວ ຕໍ່ ທ່ານ ທອງລຸນ ສີສຸດລິດ ປະທານປະເທດ ແຫ່ງ ສປປ ລາວ ໃນວັນທີ 28 ກັນຍາ ທີ່ຜ່ານມາ. ໂດຍມີສໍານັກງານຕັ້ງຢູ່ ບາງກອກ ປະເທດໄທ ຫຼື ສາມາດເວົ້າໄດ້ວ່າ ທ່ານ ນາງ ປິ້ງ ກິດນິກອນ ເປັນເອກອັກຄະລັດຖະທູດການາດາ ປະຈຳຢູ່ ປະຈຳລາວ, ລວມທັງເປັນເອກອັກຄະລັດຖະທູດ ປະຈຳໄທ ແລະ ກຳປູເຈຍ.
ທ່ານ ນາງ ປິງ ກິດນິກອນ ເກີດທີ່ປະເທດລາວ (ສະໄໝທີ່ຍັງມີສົງຄາມ) ໂດຍມີເຊື້ອສາຍລາວຈາກທາງແມ່, ຫຼັງຈາກອາຍຸ 9 ປີ ກໍຍ້າຍ (ອົບພະຍົບ) ໄປຢູ່ ການາດາ ຢ່າງຖາວອນ ທັງສຶກສາ ແລະ ເຮັດວຽກ. ແລະກ່ອນໜ້າ ທ່ານ ຍັງເຄີຍເປັນເອກອັກຄະລັດຖະທູດແຫ່ງ ການາດາ ປະຈຳຢູ່ ສສ ຫວຽດນາມ ເປັນເວລາ 2 ປີ.
ເມື່ອບໍ່ດົນມານີ້, ສຳນັກຂ່າວ The Laotian Times ໄດ້ມີໂອກາດສຳພາດພິເສດ ທ່ານ ນາງ ປິງ ກິດນິກອນ ກ່ຽວກັບການດຳລົງຊີວິດ ແລະ ຄວາມຮູ້ສຶກ ທີ່ໄດ້ເດີນທາງກັບມາ ສປປ ລາວ ອີກຄັ້ງໜຶ່ງ.
ໂດຍ ທ່ານ ນາງ ປິງ ກິດນິກອນ ກ່າວວ່າ: ຂ້ອຍເປັນຄົນສັນຊາດການາດາ ແຕ່ມີສາຍເລືອດ ແລະ ກຳເນີດທີ່ລາວ, ເຊິ່ງຂ້ອຍສາມາດກັບມາເປັນຕົວແທນຂອງຂອງປະເທດ ແລະ ພ້ອມທີ່ຈະນຳເອົາປະສົບທີ່ສະສົມມາ ເພື່ອນຳມາເຮັດວຽກເຕັມທີ່ ແລະ ຂ້ອຍຮູ້ສຶກດີໃຈທີ່ຈະໄດ້ຮຽນຮູ້ວັດທະນາທຳລາວ ແລະ ສາມາດເວົ້າໄດ້ວ່າ ຂ້ອຍຮູ້ສຶກເປັນກຽດຢ່າງຍິ່ງທີ່ໄດ້ເຮັດໜ້າທີ່ເປັນເອກອັກຄະລັດຖະທູດ ແຫ່ງ ການາດາ ມາປະຈໍາ ສປປ ລາວ ເຊິ່ງເປັນສິ່’ໜຶ່ງທີ່ປະທັບໃຈໃນການເຮັດວຽກໃນສາຍອາຊີບນີ້.
ສາມາດເວົ້າໄດ້ວ່າ ທ່ານ ນາງ ປິງ ກິດນິກອນ ເປັນບຸກຄົນທຳອິດ ທີ່ມີເຊື້ອສາຍລາວ ແລະມີບົດບາດລະດັບສູງ ໃນຕ່າງປະເທດ.