ແຂວງ ຈໍາປາສັກ ພະແນກກະສິກໍາ ແລະ ປ່າໄມ້ ອອກແຈ້ງການຫ້າມເກັບກູ້ ແລະ ຊື້ – ຂາຍ ປະເພດ ຂີ້ກະເດືອນ ແລະ ນົກ ທໍາມະຊາດ.
ອີງຕາມ ຂໍ້ຕົກລົງ ຂອງທ່ານເຈົ້າແຂວງ ສະບັບເລກທີ 424/ຈຂ.ຈສ, ລົງວັນທີ 17 ພຶດສະພາ 2022 ວ່າດ້ວຍ ການຈັດຕັ້ງປະຕິບັດ ແລະ ການເຄື່ອນໄຫວ ຂອງພະແນກກະສິກໍາ ແລະ ປ່າໄມ້ ແຂວງ ຈໍາປາສັກ. ອີງຕາມ ກົດຫມາຍວ່າດ້ວຍ ສັດນໍ້າ ແລະ ສັດປ່າ ສະບັບເລກທີ 07/ ສພຂ, ລົງວັນທີ 24 ທັນວາ 2008. ອີງຕາມ ຂໍ້ຕົກລົງ ຂອງລັດຖະມົນຕີ ກະຊວງກະສິກໍາ ແລະ ປ່າໄມ້ ສະບັບເລກທີ 2220/ກປ, ລົງວັນທີ 07 ພະຈິກ 2020 ວ່າດ້ວຍ ການຮັບຮອງເອົາບັນຊີ ສັດນໍ້າ ແລະ ສັດປ່າ ປະເພດທົ່ວໄປ ຫລື ບັນຊີ III.
ພະແນກກະສິກໍາ ແລະ ປ່າໄມ້ ອອກແຈ້ງການ ດັ່ງລຸ່ມນີ້:
1. ຫ້າມບຸກຄົນ, ນິຕິບຸກຄົນ, ພະນັກງານ, ທະຫານ, ຕໍາຫລວດ, ພໍ່ ແມ່ປະຊາຊົນ, ນັກທຸລະກິດ, ທາງພາຍໃນ ແລະ ຕ່າງປະເທດ ເກັບກູ້ ແລະ ຊື້ – ຂາຍ ຂີ້ກະເດືອນ ແລະ ຕັກຈັບ ນົກ ທຸກຊະນິດ ຢູ່ຕາມທໍາມະຊາດ ເພື່ອ ລ້ຽງ ເປັນທຸລະກິດ ຢ່າງເດັດຂາດ, ໂດຍບໍ່ໃຫ້ໃຊ້ເຄື່ອງມືລັກສະນະດັບສູນ.
2.ຖ້າຫາກບຸກຄົນ ຫລື ບໍລິສັດໃດຢາກເກັບກູ້, ຊື້- ຂາຍ ຂີ້ກະເດືອນ ແລະ ດັກຈັບ ນົກ ທຸກຊະນິດ ຢູ່ຕາມທໍາ ມະຊາດ ເພື່ອເປັນທຸລະກິດ ແມ່ນຕ້ອງໄດ້ເຮັດຫນັງສືສະເຫນີ ຫາ ພະແນກກະສິກໍາ ແລະ ປ່າໄມ້ (ຂະແຫນງປ່າໄມ້) ເພື່ອລົງສໍາຫລວດ ແລະ ເກັບກໍາຂໍ້ມູນ ສຶກສາຄວາມເປັນໄປໄດ້ ໂດຍຮັບປະກັນບໍ່ໃຫ້ມີຜົນກະທົບຕໍ່ລະບົບນິເວດ ທາງທໍາມະຊາດ ແລະ ຕ້ອງໄດ້ຮັບອະນຸຍາດ ຈາກພະແນກກະສິກໍາ ແລະ ປ່າໄມ້ ຈື່ງສາມາດຈັດຕັ້ງປະຕິບັດໄດ້.
3.ມອບໃຫ້ຫ້ອງການກະສິກໍາ ແລະ ປ່າໄມ້ 1 ນະຄອນ 9 ເມືອງ ເຜີຍແຜ່ແຈ້ງການ ສະບັບນີ້ໃຫ້ ພໍ່ ແມ່ ປະຊາຊົນ, ອໍານາດການປົກຄອງບ້ານ ແລະ ນັກທຸລະກິດ ຈົ່ງຮັບຮູ້ ແລະ ເຂົ້າໃຈ ພ້ອມທັງຈັດຕັ້ງປະຕິບັດ ໃຫ້ມີປະສິດທິຜົນ ໃນກໍລະນີຜູ້ໃດ ຫາກລະເມີດ ຕໍ່ແຈ້ງການສະບັບນີ້ ຈະຖືກປັບໃຫມ່ດໍາເນີນຄະດີ ຕາມມາດຕາ 70, 71 ຂອງກົດ ຫມາຍ ວ່າດ້ວຍ ສັດນໍ້າ ແລະ ສັດປ່າ, ສະບັບເລກທີ 07/ສພຊ, ລົງວັນທີ 24 ທັນວາ 2008.
ດັ່ງນັ້ນ, ຈື່ງໄດ້ແຈ້ງການມາຍັງທ່ານເພື່ອຊາບ ແລະ ພ້ອມກັນຈັດຕັ້ງປະຕິບັດຢ່າງເຂັ້ມງວດ.