ໃນວັນທີ 19 ສິງຫາ 2023 ຜ່ານມານີ້ ພົນລະເມືອງດີໄດ້ແຈ້ງຕໍ່ເຈົ້າໜ້າທີ່ຕໍາຫຼວດວ່າມີລົດຂົນສົ່ງສີນຄ້າມາຈອດປະໄວ້ຢູ່ແຄມທາງຂອບເຂດບ້ານຖໍ້າໃຕ້ ເມືອງກາສີ ແຂວງວຽງຈັນ ຈາກນັ້ນເຈົ້າໜ້າທີ່ຕໍາຫຼວດ ພະແນກສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດ ປກສ ແຂວງ ວຽງຈັນ ໄດ້ລົງສົມທົບ ກັບເຈົ້າໜ້າທີ່ກອງບັນຊາການ ປກສ ເມືອງກາສີ ລົງກວດກາຢູ່ສະຖານທີ່ດັ່ງກ່າວພ້ອມທັງກວດກາລົດຄັນດັ່ງກ່າວແມ່ນ ຂອງ ທ້າວ ຄຳສອນ ຢູ່ບ້ານ ທົ່ງແສງຈັນ ເມືອງຫ້ວຍຊາຍ ແຂວງບໍ່ແກ້ວ ຈຶ່ງພົບເຫັນຢາບ້າຈຳນວນຈໍານວນ 1 ເປົ່າ ເທົ່າກັບ 243.800 ເມັດ ທີ່ຊຸກເຊື່ອງຢູ່ໃນລົດຄັນດັ່ງກ່າວ, ຈາກນັ້ນເຈົ້າໜ້າທີ່ຈຶ່ງໄດ້ກັກຕົວ ທ້າວ ຄຳສອນ ອາຍຸ 38 ປີ, ອາຊີບກຳມະກອນ ພ້ອມດ້ວຍລົດຂົນສົ່ງ ແລະ ຢາບ້າຈຳນວນດັ່ງກ່າວ ມາສືບສວນ – ສອບສວນຕາມຂັ້ນຕອນຂອງກົດໝາຍ.
ຜ່ານການສືບສວນ-ສອບສວນ ທ້າວ ຄຳສອນ ໃຫ້ການຮັບສາລະພາບວ່າ: ຢາບ້າຈຳນວນ 243.800 ເມັດ ແມ່ນຜູ້ກ່ຽວໄດ້ຮັບຂົນສົ່ງແທ້ ເບື້ອງຕົ້ນໃນຄັ້ງວັນທີ 18 ສິງຫາ 2023 ເວລາປະມານ 04 ໂມງ ທ້າວ ຄໍາສອນ ແມ່ນໄດ້ ຂັບລົດຂົນສົ່ງສິນຄ້າ ຢູ່ບ້ານໃໝ່ພູຄໍາ ເມືອງຫ້ວຍຊາຍ ແຂວງບໍ່ແກ້ວ ທີ່ມີຢາບ້າຈຳນວນ 20 ເປົາ ໂດຍໄດ້ຮັບຄ້າຈ້າງ 20.000 ບາດ ຈຸດປະສົງແມ່ນຈະມາສົ່ງໃຫ້ພໍ່ຄ້າຢູ່ສະຖານນີທາງດ່ວນບ້ານນາຊອນ ເມືອງນາຊາຍທອງ ນະຄອນຫຼວງ ຈາກນັ້ນພໍຜູ້ກ່ຽວຂັບຂີ່ລົດຄັນດັ່ງກ່າວມາຮອດເສັ້ນທາງຂອບເຂດບ້ານ ຫ້ວຍສ້ານ ເມືອງກາສີ ແຂວງວຽງຈັນ ຈິ່ງໄດ້ມີລົດກະບະ 2 ຄັນ(ບໍ່ມີປ້າຍທະບຽນ)ມາຈອດຕັນທາງໜ້າ ແລ້ວເອົາຕົວ ທ້າວ ຄຳສອນ ໄປມັດໄວ້ ຢູ່ຂອບເຂດ ບ້ານຖໍ້າໃຕ້ ເມືອງກາສີ ແຂວງວຽງຈັນ ແລະໄດ້ຂົນເອົາຢາບ້າໄປຈໍານວນ 19 ເປົາ ຍັງເຫຼືອ 1 ເປົາ ຈາກນັ້ນປະຊາຊົນຈິ່ງໄດ້ນຳຕົວຜູ້ກ່ຽວມາ ປກສ ກຸ່ມບ້ານກາສີ ຈາກນັ້ນ ປກສ ກຸ່ມຈຶ່ງໄດ້ແຈ້ງຕໍ່ ເຈົ້າໜ້າທີ່ຕໍາຫຼວດ ພະແນກສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດ ປກສ ແຂວງ ວຽງຈັນ ພ້ອມດ້ວຍ ເຈົ້າໜ້າທີ່ກອງບັນຊາການ ປກສ ເມືອງກາສີ ໄດ້ລົງກວດກາສະຖານທີ່ເກີດເຫດຈື່ງພົບເຫັນລົດຂົນສົ່ງສີນຄ້າຄັນດັ່ງກ່າວພ້ອມຂອງກາງຢາບ້າຈໍານວນ 243.800 ເມັດ ທີ່ຊຸກເຊື່ອງໄວ້ໃນລົດຄັນດັ່ງກ່າວ ຈາກນັ້ນເຈົ້າໜ້າທີ່ຈຶ່ງໄດ້ນຳຕົວ ທ້າວ ຄໍາສອນ ມາສືບສວນ-ສອບສວນ ຕາມຂັ້ນຕອນຂອງກົດໝາຍ.
ປະຈຸບັນເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ຫ້ອງຕຳຫຼວດ ປກສ ແຂວງວຽງຈັນ ພວມດໍາເນີນການສືບສວນ-ສອບສວນຜູ້ກ່ຽວ ເພື່ອຂະຫຍາຍຜົນຫາກຸ່ມແກ້ງ ເຄືອຄ່າຍແລະຜູ້ຮ່ວມຂະບວນການມາລົງໂທດຕາມລະບຽບກົດໝາຍຂອງບ້ານເມືອງ.
ຂ່າວ ປ້ອງກັນຄວາມສະຫງົບ ແຂວງວຽງຈັນ