ອີງຕາມ ລາຍການ ຄວາມສະຫງົບແຂວງຄຳມ່ວນລາຍງານໃນວັນທີ 8 ກັນຍາ 2023 ຜ່ານມານີ້ວ່າ: ເຈົ້າໜ້າທີ່ວິຊາສະເພາະ ປກສ ເມືອງທ່າແຂກ ແຂວງຄຳມ່ວນໄດ້ຮັບລາຍງານຈາກພົນລະເມືອງດີວ່າ: ຈະມີກຸ່ມຄົນບໍ່ດີຈຳນວນໜື່ງ ມີການເຄື່ອນໄຫວຂົນສົ່ງຄ້າຂາຍຢາເສບຕິດປະເພດຢາບ້າ ຢູ່ຂອບເຂດ ບ້ານວຽງທອງ ເມືອງປາກກະດີງ ແຂວງບໍລິຄຳໄຊ ພາຍຫຼັງໄດ້ຮັບການລາຍງານຄືແນວນັ້ນ ທາງເຈົ້າໜ້າທີ່ຕຳຫຼວດວິຊາສະເພາະ ຈື່ງໄດ້ຈັດຕັ້ງກຳລັງ ລົງກວດກາຕິດຕາມສະຖານທີ່ດັ່ງກ່າວ ແລະ ໄດ້ພົບເຫັນເປົ້າໝາຍ ຂັບຂີ່ລົດກະບະຍີ່ຫໍ້ ໂຕໂຍຕ້າ ລີໂວ້ ສີຂາວ ຫມາຍເລກທະບຽນ ມລ 8988 ກຳແພງນະຄອນ ແລະ ລົດກະບະຍີ່ຫໍ້ ໂຕໂຍຕ້າ ລີໂວ້ ສີຂາວ ຫມາຍເລກທະບຽນ ກອ 1125 ກຳແພງນະຄອນ ໄດ້ຂັບຂີ່ມາເພື່ອຈະສົ່ງຢາເສບຕິດຢູ່ຈຸດນັດໝາຍ.
ດັ່ງນັ້ນ, ທາງເຈົ້າໜ້າທີ່ຕຳຫຼວດ ປກສ ເມືອງທ່າແຂກ ຈື່ງໄດ້ສະກັດກັ້ນ ແລະ ສະແດງຕົວເຂົ້າກວດຄົ້ນລົດຈຳນວນ 2 ຄັນດັ່ງກ່າວ ຜ່ານການກວດຄົ້ນຈື່ງໄດ້ພົບເຫັນຢາບ້າຈຳນວນ 48 ແຟັກເທົ່າກັບ 144 ມັດ ທີ່ຊຸກເຊື່ອງໄວ້ໃນເບາະທາງຫຼັງຂອງລົດ ກະບະ ຫມາຍເລກທະບຽນ ມລ 8988 ກຳແພງນະຄອນ.
ຜ່ານການສືບສວນ – ສອບສວນຂອງເຈົ້າໜ້າທີ່ຕຳຫຼວດວິຊາສະເພາະຈື່ງຮູ້ວ່າ : ຜູ້ຖືກຫາຊື່ ທ້າວ ນ້ອຍ ດວງວິໄລ ອາຍຸ 34 ປີ ແລະ ທ້າວ ຮັກຈ່ອຍ ດວງວິໄລ ທັງສອງເປັນປະຊາຊົນ ຢູ່ບ້ານ ທົ່ງນາມີ ເມືອງປາກກະດີງ ແຂວງບໍລິຄຳໄຊ. ເຊີ່ງພວກກ່ງວທັງສອງ ເປັນອ້າຍນ້ອງກັນ. ນອກນັ້ນພວກກ່ຽວທັງສອງຍັງຮັບສາລະພາບຕື່ມອີກວ່າ : ສຳລັບຢາບ້າທີ່ນຳມາສົ່ງຂາຍໃນຄັ້ງນີ້ແມ່ນເປັນຂອງພວກກ່ຽວແທ້.
ຕໍ່ກັບຄະດີດັ່ງກ່າວ ປະຈຸບັນທາງເຈົ້າໜ້າທີ່ວິຊາສະເພາະ ກຳລັງທຳການສືບສວນ – ສອບສວນ ເພື່ອຂະຫຍາຍຜົນຫາກຸ່ມແກ້ງຜູ້ຮ່ວມຂະບວນການມາດຳເນີນຄະດີຕາມຂັ້ນຕອນຂອງກົດໝາຍ.