ເປັນປະເດັນກັນຫຼາຍໃນສັງຄົມອອນລາຍ ເມື່ອຄະນະສະເພາະກິດແຂວງບໍ່ແກ້ວໄດ້ສຶກສາອົບຮົມ ແລະ ກ່າວເຕືອນ ຄູ່ຮັກ 1 ຄູ່ ທີ່ຢູ່ກິນກັນກ່ອນຈົດທະບຽນສົມຣົດຕາມກົດໝາຍ.
ປັດຈຸບັນ ໂລກເຮົາກໍເປີດກວ້າງຂຶ້ນຫຼາຍ ແລະ ຫຼາຍໆຄູ່ຮັກກໍມີການຢູ່ກິນນຳກັນກ່ອນແຕ່ງ ດ້ວຍເຫດຜົນຫຼາຍຢ່າງເຊັ່ນ ເພື່ອສຶກສາການຢູ່ຮ່ວມກັນ ເປັນຕົ້ນ, ຈຶ່ງເຮັດໃຫ້ສັງຄົມເຮົາກໍພົບຫຼາຍໆຄູ່ທີ່ຢູ່ກິນນຳກັນກ່ອນແຕ່ງດອງ.
ແຕ່ໃນວັນທີ 20 ກັນຍາ 2023 ທີ່ຜ່ານມາ ທາງຄະນະສະເພາະກິດແຂວງບໍ່ແກ້ວສຶກສາອົບຮົມ ແລະ ກ່າວເຕືອນ 1 ຄູ່ຮັກ ທີ່ອາໄສຢູ່ບ້ານດອນມູນ ເມືອງຕົ້ນເຜິ້ງ ແຂວງບໍ່ແກ້ວ ໂດຍລະບຸວ່າ ທັງສອງຢູ່ກິນໂດຍບໍ່ຖືກຕ້ອງຕາມລະບຽບກົດໝາຍ.
ຈາກເຫດການດັ່ງກ່າວ ເຮັດໃຫ້ສັງຄົມອອນລາຍມີຫາງສຽງໃນທາງທີ່ບໍ່ດີຕໍ່ເຈົ້າໜ້າທີ່ ເຊິ່ງກໍມີຫຼາຍຄຳເຫັນເຊັ່ນ ມັນເປັນເລື່ອງຂອງສອງຄົນ ຂຶ້ນກັບຄວາມພໍໃຈຂອງທັງສອງ ແລະ ອີກທັງບໍ່ຢາກໃຫ້ມີກົດລະບຽບນີ້.
ຢ່າງໃດກໍຕາມໃນທາງກົດໝາຍແລ້ວ ເຮົາກໍຍັງບໍ່ສາມາດຮັບຮູ້ໄດ້ວ່າ ການທີ່ຢູ່ກິນນຳກັນກ່ອນແຕ່ງນັ້ນມັນຜິດກົດໝາຍຫຼືບໍ່.
