ຣັດເຊຍໄດ້ຊຸກຍູ້ໃຫ້ຈັດກອງປະຊຸມ ABIS-2024 ທີ່ປະເທດລາວ ພາຍຫຼັງສິ້ນສຸດຂອງກອງປະຊຸມສຸດຍອດພາກທຸລະກິດ ແລະການລົງທຶນອາຊຽນ (ASEAN Business and Investment Summit ABIS-2023) ທີ່ຈາກາຕາ ປະເທດອິນໂດເນເຊຍ.
Ivan Polyakov ປະທານສະພາທຸລະກິດອາຊຽນ-ຣັດເຊຍ ກ່າວວ່າ ກອງປະຊຸມສຸດຍອດອາຊຽນ-ຣັດເຊຍ 2024 ຄວນຈັດຂຶ້ນທີ່ປະເທດລາວ ໂດຍປະທານສະພາຈະເປັນທີ່ປຶກສາໃຫ້ແກ່ກອງປະຊຸມສຸດຍອດອາຊຽນ-ຣັດເຊຍ.
ຂໍ້ສະເໜີດັ່ງກ່າວ ໄດ້ຮັບການຫາລືຮ່ວມກັນກັບສະພາທີ່ປຶກສາທຸລະກິດອາຊຽນລາວ (the Lao ASEAN Business Advisory Council) ນຳໂດຍ ທ່ານ ອຸເດດ ສຸວັນນະວົງ ປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ, ທ່ານ ທະນົງສິນ ກັນລະຍາ ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ.
ອີງຕາມຂໍ້ມູນຂອງ Polyakov ໃຫ້ຮູ້ວ່າ: ຣັດເຊຍຈຳເປັນຕ້ອງເຮັດວຽກຮ່ວມກັບສະມາຊິກກຸ່ມໃນຫຼາຍພາກສ່ວນ ເພື່ອຊ່ວຍຊຸກຍູ້ພັດທະນາ ແລະ ຂະຫຍາຍທຸລະກິດຂອງອາຊຽນ ໄປຫາຕະຫຼາດພາຍໃນອາຊີ ແລະ ຣັດເຊຍ.
ນອກນີ້ ຍັງໄດ້ຕັ້ງຂໍ້ສັງເກດອີກວ່າ ລາວມີຄວາມສຳພັນທີ່ດີໃນການເຮັດວຽກຮ່ວມມື ເຈລະຈາ ລະຫວ່າງຣັດເຊຍ ແລະ ປະເທດໃນກຸ່ມອາຊຽນ.
ຣັດເຊຍຍັງຈະເປັນທີ່ປຶກສາໃຫ້ແກ່ລາວ ສຳລັບການຫາລືເພີ່ມເຕີມກ່ຽວກັບກອງປະຊຸມສຸດຍອດອາຊຽນ-ຣັດເຊຍ 2024 ເນື່ອງຈາກຄະນະຜູ້ແທນສະພາທີ່ປຶກສາທຸລະກິດອາຊຽນລາວ (the Lao ASEAN Business Advisory Council) ຈະເຂົ້າຮ່ວມກອງປະຊຸມ Eastern Economic Forum ທີ່ເມືອງວະລາດິວອສຕັອກ ປະເທດຣັດເຊຍ ໃນເດືອນກັນຍານີ້.
ກອງປະຊຸມສຸດຍອດອາຊຽນ-ຣັດເຊຍຄັ້ງທຳອິດໄດ້ຈັດຂຶ້ນທີ່ກົວລາລຳເປີ ປະເທດມາເລເຊຍ ໃນວັນທີ 13 ທັນວາ 2005.
ຄວາມສຳພັນອັນດີທາງການທູດລະຫວ່າງ ລາວ ແລະ ຣັດເຊຍ ໄດ້ສະຖາປະນາຂຶ້ນຕັ້ງແຕ່ວັນທີ 7 ຕຸລາ 1960.
ແຫຼ່ງຂ່າວ ສຳນັກຂ່າວຣັດເຊຍ tvbrics