ຮ່ອງຄວາມກົດດັນອາກາດຕ່ຳມີກໍາລັງປານກາງຍັງພາດຜ່ານຢູ່ແຂວງພາກເຫນືອ ລົງຫາ ພາກກາງຂອງປະເທດລາວ, ສົມທົບກັບລົມມໍລະສຸມຕາ ເວັນຕົກສ່ຽງໃຕ້ພັດປົກຄຸມ, ຊຶ່ງຈະເຮັດໃຫ້ມີຝົນຕົກຟ້າຮ້ອງ ຟ້າເຫຼື້ອມໃນລະດັບຄ່ອຍ ຫາ ປານກາງ ໃນແຕ່ລະພາກ ແລະຕົກຫນັກ ພ້ອມລົມ ພັດແຮງຢູ່ບາງທ້ອງຖິ່ນແຂວງພາກເຫນືອດ້ານຕາເວັນຕົກ ລົງຫາ ພາກກາງ ແລະ ພາກໃຕ້. ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ ແລະ ອໍານາດການປົກຄອງທຸກພາກສ່ວນ ທີ່ອາໄສຢູ່ແຂວງ ພາກເຫນືອດ້ານຕາເວັນຕົກ ໂດຍສະເພາະຢູ່ແຂວງ ອຸດົມໄຊ, ບໍ່ແກ້ວ ແລະ ຫຼວງພະບາງ ຈົ່ງມີ ສະຕິລະວັງຕໍ່ສະພາບນໍ້າ ນໍ້າຖ້ວມ ທີ່ອາດຈະເກີດຂຶ້ນໄດ້ໃນໄລຍະນີ້ ພ້ອມນີ້ຂໍໃຫ້ຕິດຕາມການລາຍງານຂ່າວພະຍາກອນອາກາດ ແລະ ລະດັບ ນໍ້າຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.
