ທ່ານພັນໂທ ເດດລືຊາ ໄຊຍະສານ ຮອງຫົວໜ້າພະແນກຕຳຫຼວດຈະລາຈອນ ນະຄອນຫຼວງວຽງຈັນ ອອກມາຊີ້ແຈງກ່ຽວກັບເຫດການລົດຕຳກັນຫຼາຍຄັນຊ້ອນ ໃນເວລາປະມານ 22:30-23:00 ຕອນຄໍ່າຂອງ ວັນທີ 23 ສິງຫາ 2023 ຜ່ານມາ, ທີ່ 4 ແຍກໄຟອຳນາດໂພນສະອາດ (ໜ້າທະນາຄານICBC) ນະຄອນຫຼວງວຽງຈັນ.
ອຸບັດຕິເຫດດັ້ງກ່າວແມ່ນໄດ້ສ້າງຄວາມສູນເສຍຫຼາຍພໍສົມຄວນ ຕາມການເກັບກຳຂໍ້ມູນຂອງເຈົ້າໜ້າທີ່ໄດ້ລະບຸວ່າ: ສາເຫດທີ 1 ຜູ້ກ່ຽວໄດ້ໃຊ້ຄວາມໄວເກີນກຳນົດແລ້ວໄດ້ຕຳເອົາລົດທັງ 4 ຄັນທີ່ກຳລັງລໍຖ້າໄຟແດງ, ສາເຫດທີ 2 ຜູ້ກ່ຍວມີສຸຂະພາບອ່ອນເພຍ ຫຼື ອາດຈະຫຼັບໃນ ແລ້ວລົດທີ່ຂັບມາບໍ່ໄດ້ເບກ ໃນເບື້ອງຕົ້ນເຈົ້າໜ້າທີ່ລາຍງານຜູ້ບາດເຈັບທັງໝົດມີ 4 ຄົນທີ່ບາດເຈັບຫຼາຍພໍສົມຄວນ, ສ່ວນສາເຫດທີ 3 ເຈົ້າໜ້າທີ່ໄດ້ກວດພົບວ່າຜູ້ກ່ຽວໄດ້ດື່ມສິ່ງມຶນເມົາ ຕໍ່ກັບເຫດການດັ່ງກ່າວທີ່ເກີດຂຶ້ນທາງເຈົ້າຂອງລົດທີ່ໄປຕຳນັ້ນຈະໄດ້ຮັບຜິດຊອບຄ່າສ້ອມແປງທັງໝົດ.
ສຸດທ້າຍນີ້ ທ່ານຝາກເຖິງປະຊາຊົນໃຫ້ປະຕິບັດຕາມກົດລະບຽບຢ່າງເຂັ້ມງວດ ເປັນຕົ້ນການຂັບຂີ່ໃນໃນທາງທີ່ມາແຍກຄວນຫຼຸດຜ່ອນຄວາມໄວລົງ ເບິ່ງຊ້າຍ ແລະ ຂວາກ່ອນ, ຕ້ອງປະຕິບັດຕາມບັງຄັບເຊັ່ນ: ປ້າຍທາງແຍກ, ທາງໃຫຍ່, ທາງນ້ອຍ ຫຼື ປ້າຍສຳລັບຕ່າງໆ ແລະ ການປະຕິບັດຕາມໄຟອຳນາດດ້ວຍຈຶ່ງຈະສາມາດສຶບຕໍ່ການສັນຈອນໄດ້ ທັງນີ້ກໍເພື່ອຫຼີກຫຼ່ຽງການເກີດອຸດບັດຕິເຫດ ການສູນເສຍຊັບສິນ, ສຸຂະພາບ ແລະ ຊີວິດ