ຄົນມັກກິນກະແລັມເຖິງຕ້ອງຄິດໜັກ ພາຍຫຼັງກວດພົບເຊື້ອແບັກທີເລຍໃນເຄື່ອງເຮັດກະແລັມໃນຮ້ານອາຫານທີ່ວໍຊິງຕັນ ສະຫະລັດອາເມຣິກາ ໂດຍພົບຜູ້ເສຍຊີວິດທີ່ມີຄວາມກ່ຽວຂ້ອງແລ້ວຢ່າງໜ້ອຍ 3 ຄົນ.
ທາງດ້ານສາທາລະນະສຸກຂອງສະຫະລັດອາເມຣິກາ ລາຍງານວ່າພົບເຊື້ອແບັກທີເລຍ “ລິສທີເລຍ” ປົນເປື້ອນໃນນົມປັ່ນຈາກເຄື່ອງເຮັດກາແລັມທີ່ຮ້ານອາຫານຟຣູກັສ ໃນທາໂຄມາ ລັດວໍຊິງຕັນ ສະຫະລັດອາເມຣິກາ ເປັນສາເຫດທີ່ເຮັດໃຫ້ຄົນທີ່ກິນເຂົ້າໄປ ມີອາການບໍ່ສະບາຍຈົນເຂົ້າໂຮງໝໍ ຕັ້ງແຕ່ວັນທີ 27 ກຸມພາ-22 ກໍລະກົດ ລວມມີທັງໝົດ 6 ຄົນທີ່ເຂົ້າໂຮງໝໍ ໃນນັ້ນມີ 3 ຄົນທີ່ເສຍຊີວິດໃນເວລາຕໍ່ມາ ເຊິ່ງຄາດວ່າສາເຫດມາຈາກການອະນາໄມບໍ່ຖືກວິທີ ເຮັດໃຫ້ເກີດເຊື້ອພະຍາດດັ່ງກ່າວ.
ໂດຍໜ່ວຍງານສາທາລະນະສຸກລະບຸວ່າ ທາງຮ້ານໄດ້ຢຸດການໃຊ້ເຄື່ອງເຮັດກາແລັມແຕ່ວັນທີ 8 ສິງຫາ ທີ່ຜ່ານມາ ແຕ່ຍັງມີເຊື້ອແບັກທີເລຍຢູ່ ແລະ ສາມາດເຮັດໃຫ້ຄົນບໍ່ສະບາຍໄດ້ໃນໄລຍະເວລາ 70 ມື້ຫຼັງຈາກທີ່ກິນໄປ.
ທັ້ງນີ້ ໜ່ວຍງານສາທາລະນະສຸກຂອງລັດວໍຊິງຕັນ ລະບຸວ່າ ເຊື້ອແບັດທີເລຍ ເປັນສາເຫດທີ່ເຮັດໃຫ້ອາຫານເນົ່າ ແລະ ມັກພົບໃນສັດປີກ ນ້ຳນົມ ແລະ ຜະລິດຕະພັນນົມຕ່າງໆ ໂດຍສ່ວນໃຫຍ່ຄົນທີ່ກິນອາຫານປົນເປື້ອນເຊື້ອແບັກທີເລຍຊະນິດນີ້ ມັກຈະບໍ່ສະບາຍດ້ວຍອາການທີ່ບໍ່ຮຸນແຮງ ແຕ່ຖ້າຫາກເປັນ ແມ່ມານ ຫຼື ຜູ້ສູງອາຍຸ 65 ປີຂຶ້ນໄປ ຫຼື ຜູ້ທີ່ບໍ່ມີລະບົບຄຸ້ມກັນແຂງແຮງ ຄວນໄດ້ໄປປຶກສາແພດໝໍ ເມື່ອກິນເຂົ້າໄປ.
ຮ້ານອາຫານຟຣູກັສ ກໍໄດ້ໂພສຂໍ້ຄວາມໃນ Instagram ວ່າ: ທາງຮ້ານກຳລັງຮ່ວມກັບໜ່ວຍງານສາທາລະນະສຸກ ແລະ ຮູ້ສຶກເສຍໃຈຫຼາຍທີ່ຕ້ອງມີຄົນບໍ່ສະບາຍ ຫຼື ເສຍຊີວິດຈາກເຫດການນີ້ ໂດຍຕອນນີ້ມີການສົ່ງເຄື່ອງດັ່ງກ່າວໄປໂຮງງານທຳຄວາມສະອາດ ເພື່ອອະນາໄມຂ້າເຊື້ອ ແລະ ກວດອີກຄັ້ງເພື່ອຄວາມໝັ້ນໃຈວ່າ ເຄື່ອງເຮັດກະແລັມຈະບໍ່ມີເຊື້ອແບັກທີເລຍປົນເປື້ອນມາອີກ.
ແຫຼ່ງຂ່າວ ABC