ໃນວັນທີ 12 ສິງຫາ 2023 ເຊິ່ງເປັນມື້ທີ 02 ຂອງການປະຕິບັດພາລະກິດຢູ່ແຂວງຄໍາມ່ວນຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະໂດຍມີລັດຖະມົນຕີ, ຮອງລັດຖະມົນຕີຈາກກະຊວງທີ່ກ່ຽວຂ້ອງຮ່ວມເຄື່ອນໄຫວເພື່ອຕິດຕາມເບິ່ງສະພາບພື້ນຖານໂຄງລ່າງຢູ່ດ່ານສາກົນນາເພົ້າ. ຮ່ວມເຄື່ອນໄຫວໃນຄັ້ງນີ້ມີທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ , ທ່ານ ບຸນມີ ພິມມະສອນ ປະທານສະພາປະຊາຊົນແຂວງ , ບັນດາທ່ານຮອງເຈົ້າແຂວງ , ເຈົ້າເມືອງບົວລະພາ ,ມີບັນດາເຈົ້າໜ້າທີ່ທຸກຂະແໜງການພາຍໃນດ່ານ ແລະ ພາກສ່ວນຕ່າງໆທີ່ກ່ຽວຂ້ອງຮ່ວມເຄື່ອນໄຫວຕິດຕາມ ແລະ ໃຫ້ການຕ້ອນຮັບຢູ່ທີ່ສາງພັກສິນຄ້າດ່ານສາກົນນາເພົ້າ ເມືອງບົວລະພາ ແຂວງຄໍາມ່ວນ.
ໃນໂອກາດດັ່ງກ່າວທ່ານນາຍົກລັດຖະມົນຕີພ້ອມດ້ວຍຄະນະໄດ້ເຄື່ອນໄຫວຕິດຕາມ, ກວດກາຈຸດບໍລິການລະບົບມາດຕະຖານຂອງລະບົບຊິງຊັ່ງນໍ້າໜັກຣົດບັນທຸກສິນຄ້າ ແລະ ການແຈ້ງພາສີທີ່ໃຊ້ລະບົົບອີເລັກໂຕຣນິກເຂົ້າໃນການຄຸ້ມຄອງຈັດເກັບລາຍຮັບ ແລະ ສະຖານທີ່ເຮັດວຽກຂອງເຈົ້າໜ້າທີ່ປະຈໍາດ່ານລວມທັງພື້ນຖານໂຄງລ່າງສິ່ງອໍານວຍຄວາມສະດວກຕ່າງໆທີ່ນໍາໃຊ້ໃນການສົ່ງອອກ – ນໍາເຂົ້າສິນຄ້າ ແລະ ການບໍລິການຜ່ານດ່ານສາກົນຕະຫຼອດການປະຕິບັດໜ້າທີ່ໃນຄວາມຮັບຜິດຊອບທາງດ້ານວຽກງານວິຊາການ ແລະ ວິຊາສະເພາະຂອງພະນັກງານໃນການບໍລິການສິນຄ້າຜ່ານແດນພ້ອມນີ້ຍັງໄດ້ແນະນໍາໃຫ້ເພິ້ມຄວາມກະທັດຮັດ , ສອດຄ່ອງຕາມລະບຽບກົດໝາຍ , ລຸດຜ່ອນຂັ້ນຕອນຕ່າງໆທີ່ບໍ່ເປັນເພື່ອສ້າງເງື່ອນໄຂອໍານວຍຄວາມສະດວກໃຫ້ແກ່ການນໍາເຂົ້າ -ສົ່ງອອກສິນຄ້າເຄື່ອງຂອງ ແລະ ການບໍລິການຜູ້ຄົນຜ່ານດ່ານຊາຍແດນໃຫ້ຖືກຕ້ອງຕາມລະບຽບກົດໝາຍເພື່ອສຸມໃສ່ໃນການຄຸ້ມຄອງການຈັດເກັບລາຍຮັບ , ຂຸດຄົ້ນທ່າແຮງທີ່ບົ່ມຊ້ອນ , ເພິ້ມທະວີການຄຸ້ມຄອງ ແລະ ຕ້ານການຮົ່ວໄຫຼເຮັດໃຫ້ການເກັບພັນທະມີຄວາມຖືກຕ້ອງ,ຄົບຖ້ວນ , ທັນຕາມກໍານົດເວລາ ແລະ ຮັກສາໄດ້ຄວາມເປັນລະບຽບຮຽບຮ້ອຍພາຍໃນດ່ານ.
ພາຍຫຼັງທີ່ໄດ້ສໍາເລັດການເຄື່ອນໄຫວຕິດຕາມ,ກວດກາພາຍໃນດ່ານດັ່ງກ່າວແລ້ວທ່ານ ສອນໄຊ ສີພັນດອນ ນາຍົກລັດຖະມົນຕີພ້ອມຄະນະກໍ່ໄດ້ສືບຕໍ່ເດີນທາງໄປປະຕິບັດພາລະກິດຢູ່ແຂວງສະຫວັນນະເຂດໂດຍມີທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນພ້ອມດ້ວຍຄະນະນໍາຂອງແຂວງ ແລະ ການນໍາເມືອງບົວລະພາຮ່ວມສົ່ງທ່ານນາຍົກລັດຖະມົນຕີພ້ອມຄະນະໃນຄັ້ງນີ້ດ້ວຍ.
ທີ່ມາ: MediaLAOS